![](/static/articles/02/73/03/l-h4egTrP8zV.jpg)
Բայց ինչ պրիմիտիվ ենք
«Ռուսաստանի նորաստեղծ Հանրային հեռուստատեսությունը որոշել էր երեկվա եթերում կատակել Վլադիմիր Պուտինի ապահարզանի կապակցությամբ, բայց հաղորդումը անմիջապես էլ հանվել է... Ինչպես կարելի է կատակել նախագահի վերաբերյալ. դա պետական հեղաշրջման նման մի բան է... Բայց ինչ նման են ռուսաստանցի եւ հայաստանցի հեռուստապատասխանատուները իրենց պրիմիտիվության մակարդակով...»
Շաբաթ օրը Ֆեյսբուք սոցիալական ցանցում այս ստատուսը գրելու պատճառով «Շանթ» հեռուստաընկերության մեկնաբան Արմեն Դուլյանն ազատվել է աշխատանքից:
«Շանթից» որեւէ մեկնաբանություն ստանալ «Հետքին» չհաջողվեց: Ընդունարանից մի աղջիկ սկզբում ասաց, որ տեղեկատվությունն իրականությանը չի համապատասխանում. Արմեն Դուլյանն արձակուրդի մեջ է եւ ընդամենը մեկ շաբաթ եթերում չի լինի: Երբ խնդրեցինք ներկայանալ, նշեց, որ ճիշտ կլինի հեռուստաընկերության PR մասնագետի հետ զրուցենք, որովհետեւ նա է իրավասու լրագրողների վերաբերյալ մեկնաբանություններ տալ. «Բայց վաղը զանգեք, այսօր նա տեղում չէ»:
Հետո «Շանթի» աշխատակցուհին լրատվական ծառայության հեռախոսահամարը փոխանցեց, որ փորձենք «նրանցից մեկնաբանություն ստանալ»: Բայց այստեղից էլ հորդորեցին խոսել լրատվական ծառայության պետ Աղասի Հունանյանի հետ ու դարձյալ տվեցին ընդունարանի հեռախոսահամարը: Այս անգամ արդեն ընդունարանից հրաժարվեցին որեւէ հեռախոսահամար տրամադրելուց. «Բոլոր լրագրողներին էլ մերժում ենք, տնօրինությունից հեռախոսահամար ոչ մեկին չենք ասում»:
Լուսանկարը՝ Ա. Դուլյանի ֆեյսբուքյան էջից
Մեկնաբանություններ (12)
Մեկնաբանել