Կարկուտից արմավիրցիների կրած վնասը 25 մլրդ դրամ է, բայց հանգանակվել է 51 մլն դրամ
Արմավիրից մեծամասնական ընտրակարգով ընտրված պատգամավոր Ալեքսան Պետրոսյանը հայտարարությունների ժամին խոսեց մայիսի 12-ին Արմավիրի մարզում կարկտահարության մասին: Նրա նախաձեռնությամբ ստեղծվել էր հիմնադրամ՝ տուժած գյուղացիներին օգնելու նպատակով:
Ա. Պետրոսյանը տեղեկացրեց, որ հավաքվել է 51 մլն դրամ, իսկ ամենախոշոր գումարներ փոխանցած առաջին 3 կառույցն են ոստիկանությունը (20 մլն դրամ), Կենտրոնական բանկը (10 մլն դրամ) և Ազգային ժողովը (6 մլն դրամ):
Ալեքսան Պետրոսյանի խոսքով՝ կարկտահարության հասցրած վնասի չափը կազմում է 25 մլրդ դրամ, և բոլորն էլ գիտակցում են, որ հավաքված գումարը հնարավորություն չի տալիս մեծ չափերով օգնել գյուղացուն: Նա հորդորեց չհանգստանալ ու չբավարարվել հավաքվածով, և ամեն ինչ նել, որ հիմնադրամում հավաքվի առավելագույն գումար:
«Այսօր շատ կարևոր է մասնակցությունը և այդ հիմնադրամին գումար փոխանցելը: Այդ գումարները մինչև օգոստոսի 1-ը կհատկացվի տուժածներին: Խոսքը 12 հազար ընտանիքի, այսինքն՝ 60 հազար բնակչի մասին է»,- ավելացրեց Ալեքսանդր Պետրոսյանը:
Պատգամավորի խոսքով՝ այսօր այդ մարդկանց օգնելու համար ոչ շատ փող, ոչ էլ շատ խելք է պետք ունենալ, ընդամենը ցանկություն, որ օգնությունը սկսվի թեկուզ 1000 դրամ փոխանցելով:
«Ինձ չի թվում, որ Հայաստանում շատ մեծ տոկոս մարդիկ այդ 1000 դրամի կարիքը շատ խիստ ունեն: Այստեղ անտարբերության խնդիրն է, որը չեմ ուզում այս պահին ասած լինեմ»,- ավելացրեց Ալեքսան Պետրոսյանը:
Մեկնաբանություններ (2)
Մեկնաբանել