ՕԵԿ խմբակցությունը գրավոր հարցապնդում է ներկայացրել կառավարությանը, որը վերաբերում է «Արմավիրա» ավիաընկերությանը: Հարցապնդումը ԱԺ ամբիոնից հնչեցրեց ՕԵԿ-ական պատգամավոր Հովհաննես Մարգարյանը:

Առաջին հարցը վերաբերում էր  կառավարության 2009 թ. այն որոշմանը, ըստ որի՝ «օդի փողը» ներառվում է ավիատոմսի արժեքի մեջ: ՕԵԿ-ին հետաքրքրում էր` 2009-ից մինչ օրս «Արմավիայի» կողմից գանձված «օդի փողը» որքա՞ն է եղել, արդյո՞ք մուտքագրվել են այդ միջոցները պետբյուջե, եթե այո, ապա ի՞նչ ուղղությամբ են ծախսվել:

Կառավարությունից խմբակցությանը պատասխանել էին, որ 2009 թ. մարտի 29-ից մինչեւ 2013 թ. մարտի 31-ն ընկած ժամանակահատվածում ֆիզիկական անձանցից ելքի համար գանձվել եւ պետբյուջե մուտքագրվել է 24 մլրդ 336 մլն դրամի «օդի» տուրք: Ինչ վերաբերում է «Արմավիրային», ապա ընկերությունը նշված ժամանակահատվածում ֆիզիկական անձանցից գանձել է 9 մլրդ 561 մլն դրամ: Կառավարության պատասխանում նշված չէր, թե արդյոք «Արմավիան» գանձած գումարները մուտքագրել է պետբյուջե, ուստի Հովհաննես Մարգարյանը խնդրեց, որ կառավարությունը պարզաբանի:

Ֆինանսների նախարար Դավիթ Սարգսյանը նշեց, որ «Արմավիան», ըստ հաշվետվությունների, 2009 թ. մարտի 31-ից մինչեւ այս տարվա փետրվարի 28-ը ուղեւորներից գանձել է 9.5 մլրդ դրամի տուրք:

«Ընկերության «օդի» տուրքի գծով պարտավորությունը պետության հանդեպ կազմում է 5 մլրդ 400 մլն դրամ, որը չի վճարվել պետական բյուջե: Բնական է, այդ գումարի նկատմամբ հաշվարկվել է եւ հաշվարկվում են օրենքով սահմանված բոլոր տույժ-տուգանքները: Այս պահի դրությամբ պետությունը դատական հայցով դիմել է դատարան` ընկերությունից նշված գումարը եւ տույժ-տուգանքները գանձելու համար»,- ասաց ֆինանսների նախարարը:

Ըստ Դավիթ Սարգսյանի` գոյություն ունի վեճ ինչպես պետական տուրքի մայր գումարի, այնպես էլ հաշվարկված տույժ-տուգանքների գծով, ինչն իր լուծումը կստանա դատարանում: