ՀՀ վարչապետ պարոն Տիգրան Սարգսյանին

Մեծարգո պարոն վարչապետ.

Տեղեկացնում ենք Ձեզ, որ Մեղրու տարածաշրջանում 14 մետաղական հանքերի երկրաբանահետախուզական աշխատանքներ իրականացնելու նպատակով կառավարության կողմից տրված արտոնագրերը մտահոգության լուրջ հիմքեր են առաջացրել տեղաբնակների և բնապահպանների շրջանում:

Մենք կարծում ենք, որ անառարկելի է միևնույն տարածաշրջանում հանքարդյունաբերության և գյուղատնտեսության զարգացման անհամատեղելիությունը, որը կարծեք անտեսվում է կառավարության կողմից: Նախքան նման որոշումներ կայացնելը, կառավարությունը առնվազը  պետք հաշվի առներ, թե ինչքանով է արդյունավետ հանքարդյունաբերության  զարգացումը տարածաշրջանի բնակչության և պետության համար առհասարակ:

Հանքերի երկրաբանահետախուզական աշխատանքները և շահագործումը իրականացվում են Մեղրի քաղաքի հարակից բարձրադիր բնակավայրերում, որը վտանգում է տարածաշրջանի ողջ ոռոգման համակարգը: Մեղրու տարածաշրջանի վիճակը, որը քաղցրահամ մրգերի խորհրդանիշ է համարվում, մտահոգում է ոչ միայն տեղաբնակներին, փոքր և խոշոր գյուղատնտեսներին, այլ նաև Հայաստանում և արտերկրում մրգի իրացումն ապահովող ընկերություններին:

Չխուսափելով իրերն իրենց անուններով կոչելուց, մենք հայտարարում ենք, որ խախտվել են շրջակա միջավայրի պահպանության ոլորտում որոշումների կայացման գործընթացներին մասնակցելու, տեղաբնակների` միջազգային պայմանագրերով և ազգային օրենսդրությամբ ամրագրված իրավունքները: Մեղրի համայնքի բնակչության դիրքորոշումը կառավարությանը և ազգային ժողովին ներկայացնելու նպատակով «Կայուն զարգացում» ՀԿ-ն կազմակերպել է ստորագրահավաք, որի մասնակիցները իրենց դիրքորոշումը արտահայտել են կողմ, դեմ, ձեռնպահ պատասխաններով: Տեղեկացնում ենք Ձեզ որ ստորագրահավաքին մասնակցել է մոտ 2400 քաղաքացի և մասնակիցների 99 %-ից ավելին դեմ են արտահայտվել Մեղրու տարածաշրջանում իրականացվող հանքերի երկրաբանահետախուզական աշխատանքներին և դրանց հնարավոր շահագործմանը:

Հիմք ընդունելով մարդու կյանքի և առողջության հիմնարար իրավունքները, ստորագրահավաքի արդյունքները, պահանջում ենք անհապաղ միջոցներ ձեռնարկել` դադարեցնելու տարածաշրջանում  հանքերի երկրաբանահետախուզական, շահագործման  աշխատանքները և կասեցնել տվյալ ընկերություններին տրված արտոնագրերը:

Կից ներկայացնում ենք ստորագրահավաքի արդյունքները /100 թերթ/:

Հարգանքով՝ «Կայուն զարգացում» ՀԿ նախագահ Արմեն Փարսադանյան

Հ.Գ. Ստորագրահավաքի արդյունքները կներկայացվի վարչապետ Տիգրան Սարգսյանին և ԱԺ բոլոր խմբակցություններին` ԱԺ-ի արձակուրդը ավարտելուց անմիջապես հետո: Ստորագրահավաքին մասնակցել է 2398 քաղաքացի, որին աջակցել են «Մեղրու կանանց ռեսուրս կենտրոն» ՀԿ-ն և «Ընդդեմ իրավական կամայականությունների» ՀԿ-ի Մեղրու կենտրոնը: Ստորագրահավաքի մասնակիցներից 2382 քաղաքացի դեմ են արտահայտվել, 5 քաղաքացի` կողմ, 11 քաղաքացի` ձեռնպահ, Մեղրու տարածաշրջանում իրականացվող հանքերի երկրաբանահետախուզական աշխատանքներին և դրանց հնարավոր շահագործմանը: Տարածաշրջանում ինտենսիվ երկրաբանահետախուզական և արդյունահանման աշխատանքներ են իրականացվում և, եթե աշխատանքները առաջիկա օրերին չդադարեցվեն, մենք չենք սպասի նույնիսկ վարչապետի պատասխանին: Առաջիկայում կհայտարարենք մեր ծրագրերի մասին: