Գյումրի քաղաքի թիվ 1 և 40 երթուղիներն այսուհետև սպասարկելու են չինական հարմարավետ ավտոբուսները: Ներկրված 10 ավտոբուսից առայժմ միայն 5-ը կսպասարկի թիվ 1 երթուղին՝ ուղևորներին փոխադրելով օդնավակայանից մինչև Անի թաղամասի Պարույր Սևակ փողոց: Մյուս 5 ավտոբուսը թիվ 40 երթուղին կսպասարկի Շիրակացի փողոցի հիմնովին բարեկարգվելուց հետո միայն: Նշված երթուղում ժամանակավոր կշարունակեն աշխատել «Պազ» մակնիշի երեք ավտոբուսները:

Մինչև հունիսի 30-ը ուղևորատար նոր տրանսպորտային միջոցները կաշխատեն անվճար: Գյումրեցիներին առավել ուրախացրել էր արժանապատիվ երթևեկելու հնարավորությունը: «Պրծանք կռացած, իրար գիրկ նստած, մեկը մյուսի մեջքին թռած երթևեկելուց»,- նկատեց հրապարակում իրենց մեկնարկին սպասող ավտոբուսներով հիացող մի գյումրեցի:

Նոր ավտոբուսների համար հայտարարված մրցույթին մասնակացած 80 վարորդից ընտրվել են տասը: Հաշվի են առնվել անձի առողջական վիճակը, վարորդական փորձը (10 տարի և ավելի աշխատանքային փորձ): Նոր ավտոբուսների վարորդներին արգելվել է ծխել տրանսպորտում և միացնել բարձր երաժշտություն:

Գյումրիի բոլոր երթուղիները պատշաճ սպասարկելու համար հարկ կլինի ներկրել ևս մի քանի տասնյակ ավտոբուս: Սա հնարավորություն կտա ձերբազատվելու գազելներով երթևեկելու անհարմարություններից: Փողոցների ասֆալտապատման և տրանսպորտի նորացմանը զուգընթաց թարմացվում, վերանորոգվում են հին և կառուցվում նոր սպասարաններ: