Գերմանացի ներդրող, «Իստինվեստոր» ՍՊԸ տնօրեն Ստեֆան Լաքսհուբերի՝ ընդդեմ ԱԺ պատգամավոր Գագիկ Ծառուկյանին պատկանող «Երևանի «Արարատ» կոնյակի-գինու-օղու կոմբինատ»-ի բողոքն այսօր քննվեց ՀՀ վերաքննիչ քաղաքացիական դատարանում:  

Այսօրվա նիստին ներկա էին թե հայցվորի, թե պատասխանողի ներկայացուցիչները: Դատարանը, նախագահությամբ դատավոր Արսեն Մկրտչյանի, հայցվորի ներկայացուցիչ Դավիթ Դանելյանին հարցեր ուղղեղ բերված բողոքի առնչությամբ: Դավիթ Դանելյանը նշեց, որ բողոքի հիմքը բաժնետոմսերի համախմբումն է.  կատարվել է բաժնետոմսերի այնպիսի համախմբում, որի արդյունքում «ԻստԻնվեստոր»-ի1520 բաժնետոմսերը չեն կազմել 1 նոր բաժնետոմս, այսինքն`  համախմբման արդյունքում չի ձևավորվել գոնե մեկ բաժնետոմս, այլ առաջացել են կոտորակային` տասնորդական բաժնետոմսեր: Մինչդեռ կոտորոկային բաժնեմասի գոյությունը գործնականում հնարավոր չէ: 

Սակայն, փաստորեն, համախմբան արդյունքում նոր բաժնետոմսեր են առաջացել ընկերության մեծ փայատերերի մոտ, այն է` «Մուլտի գրուպի» և Գագիկ Ծառուկյանի: Առաջին ատյանի դատարանը, դատավոր Ա. Մելքումյանի գլխավորությամբ, վճռում նշել է, որ պարտադիր չէ, որ ամբողջական բաժնետոմս առաջանար «ԻստԻնվեստոր»-ի մոտ: 

Կոնյակի գործարանի ներկայացուցիչ Դավիթ Մանթաշյանը նշեց, որ բաժնետոմսերի համախմբման ժամանակ ընտրվել է գործակից, դրանով էլ առաջնորդվել են. «Դրա արդյունքում կոտորակային բաժնետոմսեր կառաջանային, թե չէին առաջանա, ում մոտ ինչպիսի բաժնետոմսերի քանակ կառաջանար` ամբողջական, թե կոտորակային, դա արդեն որևէ նշանակություն չուներ»,- ասաց Դավիթ Մանթաշյանը: 

Հաջորդ խախտումը Դավիթ Դանեիլյանը նշեց ընկերության բանժնետոմսերը ընկերության զուտ ակտվիների արժեքի հաշվարկմամբ գնահատելուն: Գույքի շուկայական արժեքի մասին «Անիկոմ» ՍՊԸ-ի վերաբերյալ գնահատումը դատարանը հաշվի չի առել, մինչդեռ, ըստ գնահատման, կոմբինատի գույքի շուկայական արժեքը ավելին է, քան նշված է ընկերության հաշվապահական փաստաթղթերում: Դավիթ Դանելյանը նշեց, որ դատարանը անտեսել է այդ ապացույցը: 

Դատարանը չավարտեց հարցերը, սակայն քանի որ այլ դատական նիստ կար նշանակված այդ ժամին, հետաձգեց «ԻստԻնվեստորի» բողոքի քննությունը մինչը հուլիսի 12-ը: 

Հիշեցնենք՝ գերմանացի ներդրողը սկսել է պայքարը Գագիկ Ծառուկյանի դեմ՝ կոմբինատում ունեցած իր բաժնետոմսերից զրկվելու պատճառով: Կենտրոն և Նորք-Մարաշ համայնքների ընդհանուր իրավասության դատարանը, նախագահությամբ դատավոր Արայիկ Մելքումյանի, վճռել էր «ԻստԻնվեստոր» ՍՊԸ-ի` «Երևանի «Արարատ» կոնյակի-գինու-օղու կոմբինատ» ՓԲԸ-ում ունեցած 1520 հատ բաժնետոմսերի նկատմամբ սեփականության իրավունքը վերականգնելու պահանջների մասով հայցը մերժել` անհիմն լինելու հիմքով: Միևնույն ժամանակ վճռել էր «ԻստԻնվեստոր»-ի օգտին բռնագանձել 14.8 մլն դրամին մոտ գումարը` որպես բաժնետոմսերի համախմբման հետևանքով ստացված կոտորակային բաժնետոմսի հետգնման արդյունքում բաժնետիրոջը վճարման ենթակա գումար: