ՀՀ փոխվարչապետ, տարածքային կառավարման նախարար  Արմեն Գեւորգյանը ոռոգման աշխատանքների ընթացքին ծանոթանալու նպատակով  այսօր այցելեց  Արարատի մարզ:

Մարզպետ Է. Բարսեղյանի, ՏԿՆ Ջրային տնտեսության պետական կոմիտեի պատասխանատուների ուղեկցությամբ փոխվարչապետը նախ այցելեց «Ավշար» եւ «Ավշար –Այգեւան» պոմպակայաններ, ծանոթացավ կառույցների վիճակին եւ հզորություններին: Փոխվարչապետին զեկուցվեց, որ «Հազարամյակի մարտահրավեր հիմնադրամ –Հայաստան»-ի  ծրագրով 2011թ. վերականգնված պոմպակայանների տեխնիկական վիճակը  բավարար է, գործում են ողջ հզորությամբ` ապահովելով շրջակա համայնքների ոռոգումը:

Փոխվարչապետն այնուհետեւ խորհրդակցություն անցկացերց «Արարատ» ՋՕԸ-ում` ՏԿՆ Ջրային տնտեսության պետական կոմիտեի պատասխանատուների, մարզի ջրօգտագործողների ընկերությունների ղեկավարների մասնակցությամբ:

Քննարկվեցին մարզում ոռոգման շրջանի ընթացքին վերաբերող հարցեր: ՋՕԸ ղեկավարները ներկայացրեցին ընթացիկ իրավիճակը` տեղեկացնելով, որ իրենց սպասարկման տարածքում այս տարի լուրջ խնդիրներ չեն առաջացել եւ հաջողվում է բավարարել պահանջարկը:

Փոխվարչապետը կարեւորեց ՋՕԸ-երի աշխատանքների արդյունավետ կազմակերպումը, որը պետք է ուղղված լինի ինչպես գյուղացիական տնտեսություններին ժամանակին անհրաժեշտ ջրաքանակով ապահովելուն, այնպես էլ մատակարարված ջրի հաշվառմանը, ձեւավորված հասույթների դիմաց վարձավճարների ամբողջական հավաքագրմանը: Ա. Գեւորգյանն ընդգծեց  բոլոր գանձումները բացառապես ջրօգտագործողների հետ կնքված պայմանագրերի համապատասխան իրականացնելու անհրաժեշտությունը: Նրա խոսքով` ոռգման համակարգի անխափան գործունեությունը կախված է նաեւ ՋՕԸ-երի բարեխիղճ եւ արդյունավետ աշխատանքից:

Փոխվարչապետն առանձնահատուկ կարեւորեց  ՋՕԸ-ի կառավարման խորհուրդների` հանրության համար բաց գործելաոճը` նշելով, որ ջրօգտագործողներին հուզող բոլոր հարցերը պետք է քննարկվեն կառավարման խորհրդում եւ համապատասխան  լուծումներ ու պարզաբանումներ ստանան:   Այս մասին հայտնում է ՏԿՆ հասարակայնության հետ կապերի բաժինը: