Տեսանյութեր
Լուսանկարներ
Սերժ Սարգսյանը բարձր է գնահատել Եվրոպական դատարանի դերը
Նախագահ Սերժ Սարգսյանն այսօր ընդունել է Մարդու իրավունքների եվրոպական դատարանի նախագահ Դին Շպիլմանին:
ՄԻԵԴ նախագահի այցը Հայաստան կայանում է Եվրոպայի խորհրդի նախարարների կոմիտեում Հայաստանի նախագահության շրջանակներում տեղի ունեցող միջոցառումներից մեկի՝ «Իրավունքի գերակայության եվրոպական չափորոշիչները և իշխանությունների հայեցողության սահմանները Եվրոպայի խորհրդի անդամ երկրներում» թեմայով խորհրդաժողովի կապակցությամբ:
Սերժ Սարգսյանը նշել է, որ Հայաստանն այսօր ԵԽ ակտիվ անդամներից է, մասնակցում է կազմակերպության աշխատանքներին բոլոր մակարդակներում՝ իր ներդրումն ունենալով կազմակերպությունում ընթացող գործընթացներին և համաեվրոպական օրակարգային հարցերի ձևավորմանը:
Սերժ Սարգսյանը բարձր է գնահատել ՄԻԵԴ դերը ԵԽ անդամ երկրներում բնակվող շուրջ 800 միլիոն մարդկանց իրավունքների պաշտպանության գործում:
Ընդգծելով, որ Եվրոպայի խորհրդի անդամ երկրները տարբեր են իրենց պատմությամբ և ներկայով, սակայն միավորված են ընդհանուր արժեքներով ՝ Սերժ Սարգսյանը նշել է, որ Հայաստանի ցանկությունն է, որ Եվրոպական դատարանը լինի հնարավորինս արդյունավետ աշխատող կառույց: Այս առումով Հայաստանն ամբողջապես աջակցում է բոլոր այն գործընթացներին ու բարեփոխումներին, որոնց նպատակը դատարանի արդյունավետությունը բարձրացնելն է:
Դին Շպիլմանը գոհունակությամբ է խոսել այցի շրջանակներում ՀՀ բարձրաստիճան մի շարք պաշտոնյաների հետ ունեցած արդյունավետ քննարկումների մասին: Այս մասին հայտնում է ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչությունը:
Մեկնաբանել