ՀՀԿ-ն Սյունիքի մարզպետի պաշտոնում առաջարկել է թիվ 38 ընտրատարածքից մեծամասնական ընտրակարգով ընտրված պատգամավոր Վահե Հակոբյանի թեկնածությունը:

ՀՀԿ կենտրոնական գրասենյակում ավարտվել է կուսակցության գործադիր մարմնի նիստը, որը գլխավորել է ՀՀԿ նախագահ Սերժ Սարգսյանը:

ԱԺ փոխնախագահ, ՀՀԿ մամուլի խոսնակ Էդուարդ Շարմազանովը «Հետքի» հետ զրույցում ասաց, որ բացի Սյունիքի մարզպետի հարցը քննարկելուց գործադիր մարմնի նիստում այլ նշանակումների եւ պաշտոնանկությունների մասին քննարկումներ չեն եղել:

Ըստ մամուլի խոսնակի` Վահե Հակոբյանը վայելում է սյունեցիների սերն ու հարգանքը եւ կարծում է, որ ճիշտ ընտրություն է կատարվել:

Նշենք, որ Ազգային ժողովում Վահե Հակոբյանը պասիվ պատգամավորների թվին էր պատկանում: Հանդես չէր գալիս ելույթներով, հայտարարություններ չէր անում: Փոխարենը աչքի էր ընկնում լրագրողների հետ շփվելու կոպիտ պահվածքով:

Բացի այդ, նա ԱԺ-ի երկրորդ պատգամավորն էր իր կարողություններով: 2011թ. դրությամբ Վահե Հակոբյանն իր ունեցվածքով զիջում էր միայն Գագիկ Ծառուկյանին:

Տեղեկացնենք, որ ՀՀ Սահմանադրության 88.1 հոդվածի համաձայն` մարզպետները նշանակվում եւ ազատվում են կառավարության որոշմամբ: Կառավարության այդ որոշումները վավերացվում են հանրապետության նախագահի կողմից:

Իհարկե կասկածից վեր է, որ Վահե Հակոբյանը կնշանակվի Սյունիքի մարզպետի պաշտոնում, ինչը նշանակում է, որ առաջիկայում թիվ 38 ընտրատարածքում լինելու է պատգամավորի արտահերթ ընտրություն: