Տեսանյութեր
Լուսանկարներ
Սև մածուն դատարանների կողմից
Դատաիրավական բարեփոխումների այս անվերջանալի ժամանակահատվածում իբր ստեղծվեց եռաստիճան դատական համակարգ: Ուր է այդ համակարգը:
Ընդհանուր իրավասության առաջին ատյանի դատարանը եթե հաստատեց մածունը սև է, ուրեմն քիչ հավանակություն կա, որ բոլորիս հայտնի մածնի գույնը սպիտակ կմնա… ժողովրդի լեզվով ասած, «փողին մուննաթ». փողը տուր` կենդանի մարդուն կարող են մեռած ճանաչել, մեռածին` կենդանի: Արդար վճիռ կայացնեն, որ ինչ անեն:
Վերաքննիչ դատարանն էլ /երկրորդ ատյան/ գործը քննում է Վճռաբեկ դատարանում գործերի քննության համար սահմանված կարգով: Թե բախտդ բերեց, նախագահող դատավորը անաչառ և բանիմաց եղավ /երբեմն պատահում է/, ուրեմն սպասելի է արդարադատությունը, իսկ եթե ոչ` ստիպված ես ծեծել չբացվող դուռը Վճռաբեկ դատարանի: Վերջինս, ինչպես գիտենք, հայտնի է որպես վճռաբեկ բողոքները վերադարձնող /երրորդ ատյան/ դատարան:
Բողոքների գրեթե մեծ մասը հար և նման պատճառաբանությամբ վերադարձնում է բողոքաբերներին. «Վերլուծելով բողոքը` Վճռաբեկ դատարանը արձանագրում է, որ բողոքաբերի փաստարկները բավարար չեն եզրահանգելու, որ բողոքում բարձրացված հարցի վերաբերյալ Վճռաբեկ դատարանի որոշումը կարող է էական նշանակություն ունենալ օրենքի միատեսակ կիրառության համար: Վճռաբեկ դատարանը արձանագրում է նաև,որ բողոքաբերի փաստարկները բավարար չեն եզրահանգելու, որ առկա է գործի ելքի վրա ազդած դատական սխալ` նյութական կամ դատավարական իրավունքի խախտում, որը կարող է առաջացնել կամ առաջացրել է ծանր հետևանքներ»: Ակնհայտ է, որ «միատեսակ կիրառություն» և «ծանր հետևանք» եզրույթները խիստ հայեցողական են:
Մինչդեռ խեղճ քաղաքացին աչքը ջուր կտրած սպասում է, թե ուր որ է կընդունեն իր բողոքը, իր վկայակոչած 10-50 թերթ փաստարկները ուշադրության կարժանացնեն, և կհաղթի բաղձալի արդարությունը: Միամիտ սպասում: Վճռաբեկ դատարան դիմելը անհույս գործ է, Վերաքննիչը` կիսով չափ հուսալի:
Այո, մի զարմացեք: Մենք ունենք ընդամենը մեկուկես աստիճանի դատական համակարգ: Եռաստիճան դատական համակարգը մեր երկրի համար չէ: Քաղաքացին եթե փորձի բողոքարկել անարդար դատական ակտը, և եթե մի կողմը աշխատի օրենքի տառին ոչ համահունչ, ապա ինչ ուզում ես արա, միևնույնն է, անմեղը մեղավոր կդառնա, մածունը` սև, կենդանի մարդը` մեռած, մեռածը` կենդանի…
Ինչպես ասում են` մուրճն էլ է իրենց ձեռքին, պոպոկն էլ:
Անահիտ Հովհաննիսյան
փաստաբան-լրագրող
Մեկնաբանություններ (3)
Մեկնաբանել