Երեկ կայացավ Չեմպիոնների լիգայի գավաթի խաղարկության որակավորման առաջին փուլի «Տրե Պենե»-«Շիրակ» պատասխան հանդիպումը: Հայաստանի չեմպիոնը Գյումրիում 3-0 հաշվով հաղթելուց հետո Սան Մարինոյում պարտվեց 0-1: Ինքնագոլի հեղինակ դարձավ Կյերեն: Այդուհանդերձ, ինչպես եւ սպասվում էր, գյումրեցիներն անցան երկրորդ փուլ, որտեղ նրանց մրցակիցը կլինի սերբական «Պարտիզանը»:

Երեւանի «Միկան», որը հանդես էր գալիս Եվրոպայի լիգայի խաղարկությունում, Երեւանում 1-1 խաղաց Մոնտենեգրոյի «Ռուդարի» հետ եւ դուրս մնաց հետագա պայքարից, քանի որ արտագնա խաղում զիջել էր 0-1 հաշվով: Հինգշաբթի օրը Երեւանի «Փյունիկը» կընդունի մակեդոնական «Տետեքսին», որի հետ առաջին խաղն ավարտվել է 1-1, իսկ Կապանի «Գանձասարը» կմեկնի Ղազախստան՝ «Ակտոբեի» հետ պատասխան խաղին. առաջին հանդիպումն ավարտվել է ղազախների 2-1 հաշվով հաղթանակով: