Օձուն համայնքի բյուջեով նախատեսված 25.2 մլն դրամ հողի հարկի եկամուտների հավաքագրումը հունիսի 28-ի դրությամբ կազմել է 9,2 մլն դրամ: Հողը չմշակելու պատճառով գյուղացիները դարձել են անվճարունակ հարկատուներ:

Գյուղապետ Արսեն Տիտանյանն ասաց, որ այս տարի մշակվել է գյուղի 1400 հա վարելահողի մոտ 30 տոկոսը, եւ նախորդ տարվա համեմատ հողի մշակության գործում աճ է արձանագրվել: Դրան նպաստել է Օձունի 20 գյուղացիների սուբսիդավորված վարկի տրամադրումը:

Սուբսիդավորված վարկ ստանալու համար բանկերին դիմել է 50 օձունցի, սակայն նրանցից 30-ը կամ անվճարունակ, կամ էլ անբարեխիղճ վարկառու է ճանաչվել եւ մերժվել է: Օձունում հողը ճիշտ մշակելու եւ ցորենի որակյալ սերմացու հողին հանձնելու դեպքում գյուղացիները կարող են լուծել իրենց հացի խնդիրը, սակայն հողերի 70 տոկոսը չի մշակվում:

«Մենք կարող ենք ոռոգման ջրով ապահովել գյուղի 1400 հա վարելահողերը: Ուղղակի գյուղացիների ֆինանսական հնարավորությունները չեն բավարարում, մեխանիզմները հնացած են, քիչ են, մարդիկ քաշքշուկների մեջ են ընկնում»,-ասաց «Լոռու ջրանցք» ջրօգտագործողների ընկերության տնօրեն Սամվել Ապրեսյանը:

Գյուղացիների մեծ մասը ստեղծված իրավիճակի համար մեղադրում է գյուղապետ Արսեն Տիտանյանին, ով նախընտրական քարոզարշավի ժամանակ խոստացել էր 300 հա վարելահող մշակելու գործում աջակցել գյուղացիներին: Գյուղապետն իր ընտրողներին խոստացել էր նաեւ բարեկարգել գյուղամիջյան ճանապարհները:

Ա. Տիտանյանն ասում է, որ իր խոստացած 300 հա հողի մշակության գործում գյուղացիներին կարող է օգնել, բայց մասնակիորեն. «Ի՞նչ է նշանակում` ուրիշի հողը վարես, ինքն էլ ոչ մի բան չցանի: Ախր տենց չի լինի: Գյուղացիներին հողի մշակման գործում աջակցելու նպատակով այս տարի Կենդանարար հանդամասում համայնքի բյուջեի միջոցներով հակակարկտային կայան ենք տեղադրել, որը Եզնանիստ հանդամասի վարելահողերը եւ գյուղացիների տնամերձերի կեսից ավելին մի քանի անգամ փրկել է կարկտահարությունից: Այս տարի Կառավարության կողմից համայնքի բյուջեին 20 մլն դրամ գումար է հատկացվել, որով գյուղի` դեպի գերեզմաններ տանող ճանապարհներն ենք վերանորոգելու` Օձունի բժշկական ամբուլատորիայից մինչեւ գյուղի վերջին տունը»:

Օձունի բժշկական ամբուլատորիայից մինչեւ գյուղի վերջին տուն տանող ճանապարհը տանում է դեպի գյուղապետի հորեղբայրներին` Տիտանյաններին պատկանող հանգստյան տուն: Օձունցիները կարծում են, որ գյուղապետը, գյուղամիջյան անանցանելի ճանապարհները թողած, պետական միջոցներով դեպի ազգականների հանգստյան տուն տանող ճանապարհն է վերանորոգում:

Ա. Տիտանյանը բացատրեց, որ գյուղամիջյան ճանապարհները հեղեղատարներ չունեն, իսկ գերեզման տանող ճանապարհի 2 եզրերին հեղեղատարներ կան, ասֆալտը երկար կմնա: Գյուղամիջյան ճանապարհների անանցանելի վիճակը գյուղապետը բացատրում էր այս տարվա հորդառատ անձրեւներով եւ վերանորոգելու համար բյուջեում անհրաժեշտ միջոցների բացակայությամբ:

«Լոռու ջրանցք» ջրօգտագործողների ընկերության տնօրեն Սամվել Ապրեսյանը դրական է գնահատում կառավարության ուշադրությունը գյուղի նկատմամբ:

«Բայց գիտեք, դա ոչ թե թռուցիկ պետք է վերեւից ասվի, պետք է կառավարությունը գյուղերի խնդիրների մեջ խորանա: Հենց այն ֆերմերները, ովքեր հողով զբաղվում են, կառավարությունը պետք է այդ մարդկանց հետ խորհրդակցի, թե ոնց անեն, որ հողերը ավելի խոշորացնեն, վարկային լուրջ միջոցներ տան հողը մշակել իմացող գյուղացուն: Ես «Ակբա-Կրեդիտ Ագրիկոլ» բանկից 2,5մլն դրամ սուբսիդավորված վարկ եմ վերցրել: Ունեմ 50 գլուխ խոշոր եղջերավոր անասուն: Վարկային գումարով անասնագոմ եմ կառուցում, 8 կով եմ գնել, տրակտոր եմ գնել, մեխանիզմներ պետք է գնեմ, հող պետք է վարձակալեմ, բայց 2,5մլն դրամն իմ այս ծրագրերի համար չի բավականացնում: Գյուղատնտեսությունը մի տարում եկամուտ չի տալիս: Կարող է գյուղացին վարկ վերցնի եւ երեք տարի վնասով գնա: Սուբսիդավորված վարկերը 2 տարով են տրվում: Իհարկե, քիչ ժամանակ է»,- ասում է Ս. Ապրեսյանը:

Նա որդու` Արսենի հետ ընտանեկան բիզնեսով է զբաղվում: Այդ նպատակով որդին «Հայէկոնոմբանկից» 5մլն դրամ վարկ է վերցրել: Իր վերցրած վարկով Արսենը փուռ եւ խանութ է կառուցում, որտեղ պետք է իրացնեն իրենց արտադրանքը: «Տղաս ժողինստիտուտն ավարտել է գերազանց դիպլոմով, հիմա էլ հեռակայում է պետական կառավարման ակադեմիայում»,- պարծեցավ հայրը:

Հայր ու որդի իրենց ընտանեկան բիզնեսում աշխատանքի բաժանում են կատարել: Հայրը ղեկավարում է անասնապահական աշխատանքները, որդին զբաղվում է հացահատիկի, փռի հարցերով: «Ուզում ենք ցորենը մենք արտադրենք, տանենք ջաղաց, աղանք, ալյուրը մենք ստեղծենք, մենք փուռը ստեղծենք, մենք հացը թխենք եւ իրացնենք»,- բացատրում է գործարարը: