Այսօր առավոտվանից Ազատության հրապարակում հացադուլ հայտարարած ազատամարտիկ Շամիր Սահակյանի հիմնական պահանջը ՀՀ պաշտպանության նախարարի մոտ ընդունելություն ստանալն է: Ողնաշարի խնդիր ունեցող, երրորդ խմբի հաշմանդամ ազատամարտիկը կնոջ (նույնպես հաշմանդամ) և երկու երեխայի հետ 13 տարի է, ինչ ապրում է վարձով մեկ սենյականոց բնակարանում:

Շամիրի խոսքով՝ 2011 թ. հոկտեմբերի 30-ին՝ Վազգեն Սարգսյանի կիսանդրու բացման օրն, անձամբ հանդիպել է նախարարին, ներկայացրել իր սոցիալական վիճակը, նախարարը հրահանգել է, որ բնակարան տրամադրեն, բայց առ այսօր ազատամարտիկին ընդունելության չեն գրանցում. քարտուղարությունը միանգամից մերժում է:

«13 տարեկան տղաս հարցնում է՝ պապա ջան, որ գնացել կռվել ես, դրա՞ համար ենք վարձով ապրում: Նա մտածում է, թե իմ արած կռիվն ինչ-որ չարություն է, և հիմա ես պատժվում եմ դրա համար: Երեխայի գիտակցությանը դեռ չի հասնում, թե ինչու եմ առողջությունս զոհել և հիմա ոչ մի պետական աջակցություն չեմ ստանում... Ու շատերի գիտակցությանը դա չի հասնում»,- «Հետքի» հետ զրույցի ժամանակ ասաց հացադուլ հայտարարած ազատամարտիկը՝ նշելով նաև, որ որպես պատերազմի մասնակից՝ ոչինչ չի ստանում, 50 հազար դրամ թոշակն էլ հաշմանդամության համար է, որը բավականացնում է միայն տան վարձին:

«Առողջ մարդը գնում է, ասում են՝ 18 տարեկան չես, ոտքերդ երկար չեն, տուն գնա, ուր մնաց՝ 37-ն անց հաշմանդամ ազատամարտիկը, ով ավելորդ պատասխանատվություն, դարդ է գործատու համար»,- ասաց Շամիրը:

Արցախյան պատերազմի տարիներին նա սովորել է պրոֆտեխուսումնարանում դերձակի մասնագիտություն ստանալու համար: Երբ կռիվը սկսվել է, կիսատ է թողել ուսումը և գնացել Արցախ: Վերադառնալուց հետո որպես պատերազմի մասնակցի՝ դիպլոմը տվել են, բայց մասնագիտական կրթությունը, փաստորեն, կիսատ է մնացել, հիմա էլ, իր խոսքով, որոշ բաներ կարողանում է անել, բայց աշխատատեղ չկա:

«20 տարի է, ատամներս կրճտացրել ենք, ձայն չենք հանել: Մեր պահանջն այն է, որ երկրի ղեկավարությունը դեմքով շրջվի դեպի ազատամարտիկը. վաղը ռուս զինվորը, կամ էլ ղազախ զինվորը սահման չի պահի»,- ասում է Շամիր Սահակյանը և հավելում, որ հացադուլը կդադարեցնի միայն այն դեպքում, եթե նախարարն իրեն ընդունի և իր բնակարանի խնդիրը լուծի:

Լուսանկարում Շամիր Սահակյանն աջից առաջինն է