Ոստիկանության ՔԳՎ ՀԿԳ քննության վարչության ՀԿԳ ավագ քննիչ, մայոր Ռ. Ադիլխանյանը, քննելով իր վայրույթում գտնվող գործի նյութերը, պարզել է, որ Աշոտ Սուքիասյանը, չարաշահելով գործարար Փայլակ Հայրապետյանի վստահությունը, խաբեությամբ հափշտակել է առանձնապես խոշոր չափերի՝ 4 միլիարդ 25 միլիոն 675 հազար դրամ, ինչպես նաեւ Փ. Հայրապետյանին, նրա որդուն՝ Վարդան Հայրապետյանին, եւ ազգական Գագիկ Ղարիբյանին խաբերությամբ պատճառել է առանձնապես խոշոր չափերի՝ 11 մլրդ 453 մլն 198 հազար դրամի գույքային վնաս:

«Հանցավոր գործունեության՝ խարդախության եւ խաբեությամբ գույքային վնաս պատճառելու արդյունքում ստացած եկամուտներն օրինականացնելու՝ դրանց ծագումը խեղաթյուրելու, տեղաշարժը եւ պատկանելիությունը թաքցնելու նպատակով Աշոտ Սուքիասյանը հափշտակված գումարներով կատարել է բանկային եւ առեւտրային գործարքներ՝ փոխանցում, փոխարկում, կանխիկացում, թանկարժեք մետաղների ձեռքբերում, օրինականացնելով առանձնապես խոշոր չափերի՝ 3 մլրդ 516 մլն 260 հազար 387 դրամին համարժեք 9 մլն 582 հազար 890 ԱՄՆ դոլարը»,- նշված է քննիչ Ադիլխանյանի որոշման մեջ:

Նկատի ունենալով վերոգրյալը՝ գործարար Փայլակ Հայրապետյանը ճանաչվել է տուժող:

Հիշեցնենք, որ այս տարվա հունիսի 17-ին Աշոտ Սուքիասյանին մեղադրանք էր առաջադրվել առանձնապես խոշոր չափերով խարդախության (ՀՀ. Քր. օր. 178-րդ հոդվածի 3-րդ մասի 1-ին կետ), խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու (184-րդ հոդ. 2-րդ մասի 1-ին կետ) եւ հանցավոր ճանապարհովստացված առանձնապես խոշոր չափերով եկամուտներն օրինականացնելու (190-րդ հոդ. 3-րդ մասի 1-ին կետ) համար: Քանի որ նախաքննական մարմնին նրա գտնվելու վայրը հայտնի չէ, Սուքիասյանի նկատմամբ հայտարարվել է հետախուզում:

Լուսանկարը՝ «Հրապարակի»