Երևանի քաղաքապետ Տարոն Մարգարյանի որոշմամբ քաղաքապետարանի աշխատակազմի կառուցվածքային ստորաբաժանումների ղեկավարների կողմից քաղաքացիների ընդունելության սահմանված ժամանակացույցի համաձայն՝ աշխատանքային յուրաքանչյուր օր աշխատակազմի երկու վարչության պետերն անձամբ են ընդունում քաղաքացիներին:

Վարչական շրջանների ղեկավարները ևս յուրաքանչյուր շաբաթվա հինգշաբթի օրը՝ ժամը 14:00-ից մինչև 16:00-ն, կազմակերպում են բնակիչների ընդունելություն:

Հուլիսի 18-ին Տարոն Մարգարյանը անակնկալ այցերով եղել է Արաբկիր և Աջափնյակ վարչական շրջաններում ու անձամբ լսել բնակիչներին:

Կոմունալ-կենցաղային ու սոցիալական բնույթի հարցերից բացի՝ բնակիչներն իրենց առաջարկներն են ներկայացրել քաղաքապետին: Տարոն Մարգարյանն ասել է, որ բնակիչների հետ անմիջական շփումները լինելու են պարբերական ու շարունակական:

«Լինելու ենք բոլոր վարչական շրջաններում, ու միայն սրանով չի սահմանափակվելու քաղաքացիների հետ մեր շփումը»,- ասել է նա:

Բնակիչները նշել են, որ քաղաքային իշխանություն-բնակիչ մշտական կապն անհրաժեշտ է:

Տարոն Մարգարյանը պատասխանատուներին հանձնարարել է հնարավորիս արագ լուծել քաղաքացիների բարձրացրած հարցերը: Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը: