Այսօր Արցախի բանակի կենտրոնական ենթակայության զորամասերից մեկի հետ անցկացվել է գումարտակային մարտավարական զորավարժություն, որն ուղեկցվել է մարտական հրաձգությամբ:

«Ուժեղացված գումարտակի պաշտպանության անցնելը սպառնալից ժամանակաշրջանում: Պաշտպանողական մարտի վարումը և մխրճված հակառակորդի ջախջախումը մոտեցած ռեզերվների հետ համատեղ» թեմայով անցկացված զորախաղերի եզրափակիչ փուլին հետևում էր ԼՂՀ պաշտպանության նախարար, Պաշտպանության բանակի հրամանատար, գեներալ-լեյտենանտ Մովսես Հակոբյանը:

Հերթական քառափուլ զորավարժության ընթացքում տարբեր օղակների հրամանատարներին ինքնուրույն որոշումներ կայացնելու, մարտական խնդիրների կատարման ընթացքում անձնակազմի առավելագույնս ներդաշնակ գործողությունների հասնելու հնարավորություն է տրվել:

Զորավարժության ընթացքում անձնակազմը արձանագրել է լավ արդյունքներ, ինչն ապացուցում է, որ պաշտպանության բանակի զորամասերն ունակ են բարձր մակարդակով կատարել իրենց առջև դրվող ցանկացած մարտական խնդիր, ինչն էլ, իր հերթին, հավանական մարտական գործողություններում հաղթելու կարևորագույն գրավական է: Այս մասին հայտում է ԼՂՀ ՊՆ մամուլի ծառայությունը: