Վերջին շաբաթվա ընթացքում արձանագրված շոգ եղանակի կապակցությամբ ՀՀ առողջապահության նախարարությունը հայտնում է, որ բարձր ջերմաստիճանային պայմաններում աշխատանքի կազմակերպման նկատմամբ ՀՀ օրենսդրությամբ սահմանված պահանջները հիմնված են աշխատանքային տեղերում առկա ջերմաստիճանի վրա և սահմանված են Աշխատանքային օրենսգքրի 153 հոդվածով:

Չնայած Հայհիդրոմետի կանխատեսմանը, որ եկող շաբաթվա ընթացքում սպասվող ջերմաստիճանը 3-4 աստիճանով կիջնի, հաշվի առնելով ամառային եղանակը` առողջապահության նախարարությունը խորհուրդ է տալիս այն դեպքերում, երբ աշխատատեղերում, աշխատանքի բնույթից կախված, հնարավոր չէ ապահովել պատշաճ ջերմաստիճանային ռեժիմ (օդի լավորակում), հատկապես ծանր ֆիզիկական և լարված մտավոր աշխատանքի դեպքերում.

-աշխատողներին հովանալու և հանգստանալու հնարավորություն տալ,

-ապահովել բաձր ջերմաստիճանի ազդեցությունից պաշտպանվելու միջոցներ` գլխարկներ, բաց գույնի, բնական նյութերից, օդափոխությունը ապահովող արտահագուստ, ստվեր առաջացնող հովանոցներ, ակնոցներ և այլն,

-բարձր ջերմաստիճանի ազդեցությունը մեղմելու համար անհրաժեշտ պայմանների առկայություն` խմելու ջրի, հանքային ջրի, թանի, լվացվելու միջոցով հովանալու հնարավորություն,

-բարձր ջերմաստիճանի պայմաններում աշխատանքային ռեժիմի փոփոխություն` հատկապես առավել ծանր և լարված աշխատանքի կատարումը նախատեսելով օրվա զով ժամերին, և աշխատանքի երկարատև ընդմիջում` օրվա շոգ ժամերին:

Առողջության պահպանման նպատակով առողջապահության նախարարությունը բոլոր գործատուներին և աշխատողներին կոչ է անում կիրառել վերը նշված խորհուրդները: