Հուլիսի 22-ին ԼՂՀ վարչապետ Արա Հարությունյանը հանդիպել է Հայ-ռուսական (սլավոնական) համալսարանի` Լեռնային Ղարաբաղի Հանրապետության սոցիալ-տնտեսական  զարգացման ծրագրի մշակման աշխատանքային խմբին, որում ընդգրկված են բուհի պրոֆեսորադասախոսական և ուսանողական անձնակազմի ներկայացուցիչներ:

Ողջունելով աշխատանքային խմբի անդամներին` կառավարության ղեկավարը կարևորել է նմանօրինակ նախաձեռնությունը, որ հնարավորություն է տալու խորությամբ և համակողմանիորեն վերլուծել Արցախի տնտեսական զարգացման եղանակները և հեռանկարները` ներկայացնելով մասնագիտական գնահատականներ:

Խմբի անունից շնորհակալություն հայտնելով ընդունելության համար` ՀՀ խորհրդարանի պատգամավոր, համալսարանի դասախոս, տնտեսագիտության դոկտոր Հրանտ Բագրատյանը ներկայացրել է տնտեսական այն ոլորտները, որոնք, խմբի կարծիքով, կարիք ունեն առաջնահերթ ուսումնասիրության և վերլուծության:

Այնուհետև քննարկվել են խմբի աշխատանքային գործունեության կազմակերպման և համակարգման հարցեր: Ուսումնասիրություններն արդյունավետ իրականացնելուն աջակցելու նպատակով հանդիպմանը մասնակցում էին հանրապետության մի շարք գերատեսչությունների ղեկավարներ և պատասխանատուներ, ովքեր գործուն մասնակցություն են ունենալու նախատեսվող աշխատանքներին: Այդ ուղղությամբ ևս կայացել են համապատասխան պայմանավորվածություններ:

Հանդիպմանը մասնակցում էին փոխվարչապետ Ա. Աղաբեկյանը, պաշտոնատար այլ անձինք:

Այս մասին հայտնում է ԼՂՀ կառավարության աշխատակազմի տեղեկատվության և հասակարայնության հետ կապերի բաժինը: