«Վճարում ենք 100 դրամ» քաղաքացիական նախաձեռնությունը տարածել է հայտարարություն ոստիկանության գործողությունների վերաբերյալ: Այն ներկայացնում ենք ստորև:  

«Սույն թվակականի հուլիսի 22-ին Մաշտոցի պողոտայում` ուղեվարձի թանկացման դեմ տեղի ունեցած խաղաղ հավաքների վերաբերյալ ոստիկանությունը տարածել է հաղորդագրություն, որով փորձ է արվում  հավաքը պիտակավորել որպես «մի խումբ անձանց անօրինական գործողություններ», որոնք կարող են պատճառ հանդիսանալ  վարորդների  հոգեկան և բարոյահոգեբանական վիճակի վատթարացման առիթ և վտանգ ներկայացնել ուղևորների փոխադրման համար:

Ոստիկանության նմանատիպ հայտարությունները նպատակ են հետապնդում նախ ազատ կամարտահայտման և խաղաղ միավորման սկզբունքով օրենքի և միջազգային պայմանագրերի հիման վրա կազմակերպված միջոցառումները արհեստական ձևով ներակայացնել որպես ոչ օրինաչափ գործողություններ, ինչն էլ իր հերթին ոստիկանությանը հնարավորություն կտա օրենքի պահպանման մտացածին քողի տակ դիմել ուժի և  ոչ իրավաչափ գործողություններով խախտել խաղաղ հավաքների մասնակիցների իրավունքները:

Երկրորդ` հայտարարությամբ հանրության մոտ փորձ է արվում կարծիք ստեղծել, այն մասին, թե իբր ոստիկանության գործողությունները ուղղված են միայն նրանց անվտանգությունն ապահովելուն:

Հայտարարում և միաժամանակ ՀՀ ոստիկանությանը հիշեցնում ենք, որ`

Մարդու իրավունքների համընդհանուր հռչակագրի 20-րդ հոդվածի համաձայն` «Յուրաքանչյուր ոք խաղաղ հավաքների ու միություններ կազմելու իրավունք ունի»,

Մարդու իրավունքների և հիմնարարար ազատությունների պաշտպանության մասին եվրոպական կոնվենցիայի 11-րդ հոդվածի  համաձայն` «Յուրաքանչյուր մարդ իրավունք ունի խաղաղ ժողովների ազատության և ուրիշների հետ միավորվելու»

ՀՀ Սահմանադրության 29-րդ հոդվածի համաձայն «Յուրաքանչյուր ոք ունի խաղաղ, առանց զենքի հավաքներ անցկացնելու իրավունք»:

Հաշվի առնելով վերոնշյալը և այն, որ Երևանի քաղաքապետարանի որոշումը խախտում է ՀՀ սահմանադրության առաջին հոդվածում ամրագրված սոցիալական արդարության սզբունքը, մենք հայտարարում ենք, որ ոստիկանության գործողությունները (անհիմն ձերբակալություններ, բռնի ուժի կիրառում խաղաղ մասնակիցների նկատմամբ) ոչ իրավաչափ են և խոչընդոտում են մեր սահմանադրական իրավանուքների կենսագործմանը: 

Անդրադառնալով վարորդների բարոյահոգեբանական վիճակին` ոստիկանության ուշադրությունը հրավիրում ենք այն բոլորի համար ակնառու փաստերին, որ վարորդների նման վիճակը և ուղևորների անվտանգությունը ուղղակիորեն կախված են  վարորդների աշխատանքային պայմաններից, ինչպիսիք են օրական 8 ժամից ավելի առանց հանգստի և ծանր պայմաններում աշխատելուց, առանց նորմալ քնի ղեկին նստելուց, ինչպես նաև ոչ սարքին և ուղևորներով գերծանրաբեռնված մեքենաներով մարդկանց տեղեփոխելուց, ինչը բազմիցս և հանգեցրել է մարդկային անվերադարձ կորուստների: Ավելորդ լարվածություն է ստեղծում  նաև ոստիկանների ոչ իրավաչափ գործողությունները կանգառներում: Մենք հորդորում ենք զբաղվել ոչ թե մտացածին անօրինական գործողությունների կանխարգելմամբ, այլ դրա փոխարեն ուշադրությունը սևեռել վերը հիշատակված իրական իրավախախտումներին, ինչը կբացառի վարոդների բարոյահոգեբանական վիճակի վատթարացումը և կապահովի ուղևորների անվտանգությունը:

Նաև պահանջում ենք, որպեսզի ոստիկանությունը կանխի խաղաղ ակցիաների ընթացքում թաղային խուժանի և գծատերերի միջամտությունները` լարված մթնոլորտ հրահարելը, բռնություններ կիրառելը և անկառավարելի վիճակներ ստեղծելը:  

Վերջում ցանկանում ենք տեղեկացնել, որ մենք` իրավագիտակից ՀՀ քաղաքացիներս, Երևանի բնակիչներս, հիմք ընդունելով իրավունքի գերակայության ու սահմանադրականության սկզբունքները` առաջնորդվում ենք բացառապես խաղաղ ու ոչ բռնի պայքարի սկզբունքներով»: