![](/static/articles/02/83/60/l-b3KJjmNTa4.jpg)
Գրողների միության անդամ. «Երբեք գործարքի մեջ մի մտիր սատանայի հետ»
Հայաստանի գրողների միության անդամ, գրող, թարգմանիչ, «9-րդ հրաշալիք» շաբաթաթերթի գլխավոր խմբագիր Վաչագան Սարգսյանը «Հետքի» հետ զրույցում ասաց, որ հետևում է վերջին օրերին տեղի ունեցող բողոքի ակցիաներին: Հարցին, թե մտավորականներին ինչու են իրենց հեռու պահում հասարակ քաղաքացուն հուզող խնդիրներից, Վաչագան Սարգսյանը նշեց, որ դասական ձևակերպմամբ` մտավորականը նա է, ով ապրում է նաև այլոց հոգսերով:
«Այսօրվա ըմբռնմամբ գուցե այդպես չէ: Մի մասը հոգնել է, մի մասը միշտ էլ պասիվ է, մի մասն էլ միշտ ակտիվ է եղել: Մտավորականն առաջին հերթին հոգնել է ինքն իրենից, երկրորդ` տարբեր շարժումներից, երրորդ` խաբված լինելուց: Մի հայտնի միտք կա. մինչև հասկանում ես, որ այդ մարդն ագահ է և անազնիվ, արդեն ծառայած ես լինում նրան»,- նշեց Վ. Սարգսյանը:
Մտավորականների մի մասն այսօր սերտաճած է իշխանության հետ, մի մասը դարձել է կուսակցական եւ առաջնորդվում է իր կուսակցության շահերով` հետին պլան մղելով հասարակական շահը: Գրողների միության անդամը հանցակազմ չի տեսնում, որ մտավորականների մի մասին հովանավորում են օլիգարխները:
«Եթե մեկը մտածում է, որ օլիգարխ հովանավորից փող վերցնելով ստեղծում է արժեք և ծառայում իր ժողովրդին, իր գործն է, թեև մի առակ կա. եթե գործարքի մեջ ես մտնում սատանայի հետ, ապա նայիր պայմանագրի առաջին կետը` երբեք գործարքի մեջ մի մտիր սատանայի հետ… Բոլորից պահանջել հայրենասիրություն, ազգային հոգսերով մտահոգ լինելու ունակություն, կարծում եմ, ճիշտ չէ. այդպիսին կամ լինում են կամ չեն լինում: Այդպիսին չեն դառնում հաստատ»,- ավելացրեց նա:
Լուսանկարը՝ granish.org-ի
Մեկնաբանել