Ֆինանսների փոխնախարար Վարդան Արամյանը «Հետքի» հետ զրույցում անդրադառնալով վերջին օրերի թանկցումներին` նշեց, որ որպես սպառող թանկացումների վերաբերյալ բացասական դիրքորոշում ունենալու համար պարտադիր չէ, որ Հայաստանում անպայման բնակվես: Ըստ նրա` ամբողջ աշխարհում չես գտնի որևէ երկիր, որի շարքային քաղաքացին դժգոհություն չհայտնի թանկացումների վերաբերյալ:

Վարդան Արամյանը որպես ընտանիքի հայր գնում է շուկա եւ զգում է գնային տատանումները: Նա համեմատաբար ավելի քիչ է օգտվում սուպերմարկետներից: 

«Հիմնականում մեր բակի խանութներից եմ առևտուր անում, որտեղ ավելի ակնհայտ են գնային տատանումները: Հենց մի ապրանքի գին բարձրանում է, բակիս խանութպանն անմիջապես ինձ բողոքում և տեղեկացնում է, որ արդեն նոր գնով են մատակարարում: Իսկ գնաճն իմ ընտանեկան բյուջեի վրա ազդել է այնքանով, որքանով այսօրվա հրապարակված միջին գնաճի ցուցաիշն է»,- նշեց ֆինանսների փոխնախարարը: 

Ինչ վերաբերում է քաղաքային տրանսպորտի թանկացմանը, Վարդան Արամյանը նշեց, որ իր շրջապատի մարդիկ էլ սովորական քաղաքացիներ են եւ օգտվում են հասարակական տրանսպորտից: 

«Թանկացումների վերաբերյալ երկու բան պետք է նայենք` արդարացիություն և օբյեկտիվություն: Եթե նայում ես առաջինի պրիզմայով, ես ինքս էլ որպես սպառող հիացմունքով չեմ վերաբերվում: Իսկ օբյեկտիվության տեսանկյունից, այսինքն` այդ նոր գներն իրական պատճառներ և հիմքեր ունեն, թե ոչ, կարծում եմ՝ դրա պատասխանը պետք է տա այն մարմինը կամ անձը, ով մանրակրկիտ ուսումնասիրել է հիմքերը սակագների թանկացման»,- ավելացրեց Վ. Արամյանը:

Անդրադառնալով տրանսպորտի թանկացման վերաբերյալ Երեւանում կազմակերպվող զանազան բողոքի ակցիաներին՝ ֆինանսների փոխնախարարը նշեց, որ մեզ մոտ դեմոկրատական արժեքները վերելք են ապրում, և հենց դա է վկայում, որ մարդիկ կարողանում են իրենց դժգոհությունը որևէ կերպ արտահայտել:

«Դեմոկրատական արժեքներին ձգտող երկրի համար բողոքի ակցիաները շատ նորմալ եմ համարում, բայց ճիշտ կլինի, որ ամեն դեպքում կարգուկանոնը որքան հնարավոր է հասարակության շարքերում պահպանվի, որպեսզի հանկարծ դա չվերածվի ներհասարակական թշնամանքի, երբ քույրը եղբոր հետ է վիճում, ընկերը` ընկերոջ և այլն: Դա մեր ազգին պետք չէ»,- ավելացրեց Վարդամ Արամյանը: