Ժողովրդական կուսակցության նախագահ Տիգրան Կարապետյանն անցել է տղայական հաճույքների: Երեկ նա մասնակցել է ճանապարհային ոստիկանության կազմակերպած պետհամարանիշների աճուրդին եւ մեկ միլիոն 2 հարյուր հազար դրամով գնել 55 LD 555 համարանիշը: Թերթի հարցին, թե ինչով է պայմանավորված կտրուկ անցումն այսօրինակ հաճույքներին, Կարապետիչն ասել է. «Ինչ է, ես իրավունք չունե՟մ ինձ համար որեւէ բան անեմ: Ալամ աշխարհի համար արեցի, իմ տիկնոջ, ընտանիքի համար իրավունք չունե՟մ որեւէ բան անելու: Իմ համարները սովորական համար ա, տիկնոջս համար եմ արել, կնոջս գեղեցիկ «Մերսեդես» եմ առել, վաղուց խոստացել էի ու գնացի համարանիշներն աճուրդով վերցրեցի»: 

Անդրադառնալով «ալամ աշխարհին» մատուցած ծառայություններին` նշեց, որ չնայած այս տարվա իր ձախորդություններին` այնուամենայնիվ, շարունակում է քաղաքացիների հանգիստը կազմակերպել Սեւանի ափին, իհարկե, ոչ նախկին քանակով: Ինքն առայժմ շարունակում է հանգիստը հայաստանյան հանգստավայրերում, իսկ ակտիվ քաղաքական գործունեությամբ կզբաղվի աշնանը: