ԼՂՀ պաշտպանության նախարար, պաշտպանության բանակի հրամանատար, գեներալ-լեյտենանտ Մովսես Հակոբյանը օրերս ՀՀ եւ ԼՂՀ մի խումբ լրագրողների հետ հանդիպման ժամանակ անդրադարձել է 2013 թ. առաջին կիսամյակում ՊԲ-ում գրանցված արդյունքներին եւ պատասխանել լրագրողների հարցերին: 

Սյունիքի նախկին մարզպետի տան մոտ կատարվածի վերաբերյալ, որում քրգործով իբրեւ մեղադրյալ ներգրավված է նաեւ ՊԲ գնդապետ Արտակ Բուդաղյանը, նախարարը նշեց. «Արտակ Բուդաղյանն այսօր մեր բանակի հպարտությունն է, եւ մեր լավագույն զորմասերից մեկի հրամանատարն է: Նրա զորամասը ճանաչվել է լավագույն զորամաս, եւ որեւէ խոսք չի կարող լինել նրա ծառայողական պարտականությունների մասին: Ինքն իր ծառայությունը կատարում է, եւ այս պահին նրա համար որեւէ խոչընդոտ չկա: Բայց ոչ մի քաղաքացի չի ազատվում պատասխանատվությունից: Ինքը կրելու է իր պատասխանատվությունը եւ կրելու է պատվով»:

Հակոբյանը վստահ է, որ նախաքննությունն ընթանալու է արդար ուղղությամբ, եւ բոլոր մեղավորները ստանալու են իրենց պատիժները՝ անկախ դիրքից ու պաշտոնից: Նա նշեց, որ Բուդաղյանի հետ մի քանի անգամ զրուցել է դեպքից հետո, սակայն մանրամասներ չհայտնեց՝ շեշտելով, որ դա ոչ թե հրապարակելու, այլ իր անձնական կարծիքը ձեւավորելու համար է:

Ադրբեջանի վերջին ռազմական գնումների մասին ՊԲ հրամանատարն ասում է, որ չնայած այդ ամենը մտահոգիչ է, սակայն ԼՂՀ-ն էլ շարունակում է նոր զինատեսակներով հարստացնել բանակի շարքերը: Ըստ նախարարի՝ եթե նախկինում հակառակորդին մեր սպառազինությամբ զիջում էինք գուցե 20 անգամ, ապա այսօր ուժերի հարաբեկացությունը չի գերազանցում 2-ը: Այսինքն՝ թշնամին առավել է միայն կրկնակի: Ընդ որում՝ որոշ ուղղություններում մենք ենք գերազանցում հակառակորդին: Դա, Հակոբյանի հավաստմամբ, մեզ հնարավորություն է տալիս ասել, որ Ադրբեջանն այս պահին չի կարող պատերազմ վերսկսել եւ հաղթել: 

ԼՂՀ բարձրաստիճան պաշտոնյան չի մեկնաբանում ՌԴ արտգործնախարար Լավրովի հայտարարությունը «ադրբեջանական տարածքների» մասին. «Մոսկվայի քայլը կարող է մեկնաբանել միայն Մոսկվան: Իմ խնդիրն այն է, որ իրենց ստացածը (գնված սպառազինությունը- հեղ.) հաշվառենք, դնենք մարտի դաշտում իրենց գործողությունների հավանական վայրերում եւ դրան համահունչ միջոցներ կիրառենք, որպեսզի այդ զենքն իրենք արդյունավետ չկիրառեն: Իսկ Լավրովի հայտարարությունը երբեք չի կարող իրականություն դառնալ: Դուք լսեք մեր պետական այրերին, որոնք իրավունք ունեն նման հայտարարություն անելու: Ադրբեջանի տարածքային ամբողջականությունը կարող է որոշել Ադրբեջանի ժողովուրդը, եւ դա որեւէ կապ չունի Արցախի հետ: Իրենց ամբողջականությունը թող իրենք ապահովեն: Արցախը Ադրբեջանի հետ որեւէ կապ չունի արդեն 20 տարուց ավելի»:

Ստեփանակերտի օդանավակայանի շահագործումը, նախարարի համոզմամբ, ժամանակի հարց է: Ադրբեջանի կողմից ռազմաշունչ հայտարարություններին նա պատասխանում է ձեռք բերված տեղեկություններով. «Մենք այս վերջին 3 ամսվա ընթացքում Ադրբեջանի հակաօդային պաշտպանության 4 դիվիզիոնի հրամանատար ենք «փոխել»: Այսինքն՝ ամեն անգամ իրենք իմանում են մեր՝ ուղղաթիռներով Ստեփանակերտ գալու մասին, ինչը պատճառ է դառնում հրամանատարներին ազատելու: Մեր ինքնաթիռներն ու ուղղաթիռները սահմանին շատ մոտ են թռչում, իսկ իրենք դեռ 15 կմ-ից ավելի մոտեցած չկան: Եթե հնարավորություն ունենան խփելու, կխփեն: Եթե քաղաքացիական ինքնաթիռ պիտի խփեն, ասեմ, որ մենք օրական 260-280 քաղաքացիական ինքնաթիռ ենք ուղեկցում Ադրբեջանի տարածքում, որոնք մտնում են մեր կրակային խոցելիության գոտու մեջ: Բայց երբեք նման բան չենք հայտարարում: Երբ մեր օդանավակայանը պատրաստ լինի շահագործման, կշահագործենք առանց որեւէ մեկին հարցնելու»:   

Մ. Հակոբյանը շեշտում է նաեւ, որ հիմնազուրկ են բոլոր այն խոսակցությունները, թե մոտակա ժամանակներում պարտադիր ժամկետային զինծառայության 2 տարի ժամկետն ավելացվելու է: Նման բան չի նախատեսվում:

«Հետքի» այն դիտարկմանը, որ վերջին հատվածում «Շուշի» քրեակատարողական հիմնարկում ավելացել է զինծառայողների թիվը, նախարարը պատասխանում է, որ տեղեկություն չունի, թե ինչքան մարդ կա այնտեղ: «Բայց դատապարտված զինծառայողների ընդհանուր թվի նվազում ունենք: Չնչին է, բայց նվազում է»,- ավելացնում է նա:

Անդրադառնալով նորամուծություն հանդիսացող կարգապահական վաշտերին էլ՝ ասում է, որ դեռ չեն կարող գնահատական տալ, բայց բոլոր դեպքերում այնպես պետք է անեն, որ զինծառայողը չցանկանա հայտնվել այնտեղ:  

Ներկայացնենք այս տարվա առաջին կիսամյակում ՊԲ-ում գրանցված մի քանի տվյալ.

1.Հակառակորդի կողմից կատարվել է դիվերսիայի 2 փորձ. երկուսն էլ մինչեւ մեր դիրքեր հասնելը կասեցվել են:

2.Կրակոցների քանակը նվազել է մոտ 2300-ով:

3.Ժամկետային զինծառայողների մահվան դեպքով ելքերը կրճատվել են 2 անգամ, վիրավորվելու դեպքերը 22-ից հասել են 15-ի:

4.Գրանցվել է համածառայողի կողմից սպանության 1 դեպք, թշնամու կողմից սպանության 2 դեպք, երբ մեր զինծառայողները խախտել են անվտանգության կանոնները: Ինքնասպան է եղել ժամկետային 2 եւ պայմանագրային 1 զինծառայող: