ՀՀ տարածքային կառավարման նախարարին կից կոլեգիայի այսօրվա նիստում  ներկայացվել են 2013թ. հուլիսի 1-ի դրությամբ ՀՀ համայնքների եկամուտների հավաքագրման ցուցանիշները: Ըստ նախարարության հասարակայնության հետ կապերի բաժնի տարածած հաղորդագրության՝  համայնքների  ընդամենը եկամուտներն առաջին  կիսամյակում  կազմել են 44 մլրդ 359 մլն 664 հազար դրամ`նախատեսված 45 մլրդ 460 մլն 841 հազարի դիմաց (Երեւանը  ներառյալ)` 97,6 տոկոս կատարողական, ինչը նախորդ տարվա նույն ժամակահատվածի համեմատ աճել է 9,5 տոկոսով:

Ըստ ՏԿՆ աշխատակազմի տեղական ինքնակառավարման վարչության պետ Աշոտ  Գիլոյանի, ով զեկուցել է կոլեգիայի նիստում, համայնքների  սեփական եկամուտների կատարողականը կազմել է 96,3 տոկոս, արձանագրվել է 14,3  տոկոս աճ`2012թ. նույն ժամանակահատվածի համեմատ: Չնայած անցած տարվա համեմատ գրանցված  աճին` սեփական եկամուտների հավաքագրման մասով հանրապետական միջին ցուցանիշից ցածր արդյունքներ են գրանցվել Շիրակի, Արմավիրի, Գեղարքունիքի եւ Տավուշի մարզերում:

Նիստը վարող ՀՀ փոխվարչապետ, տարածքային կառավարման նախարար Արմեն  Գեւորգյանը  հանձնարարել է քննարկումներ կազմակերպել  սեփական եկամուտների հավաքագրման խնդիրներ ունեցող մարզերում, տեղում ուսումնասիրել  պատճառները եւ հետեւողական աշխատանքներ տանել ցուցանիշների բարելավման ուղղությամբ:

Կոլեգիայում անդրադարձ է կատարվել նաեւ նախորդ տարիներին կուտակված աշխատավարձերի պարտքի մարման ընթացքին եւ  համայնքներում ընթացիկ պարտքերի կուտակման պատճառներին: Քննարկվել է, մասնավորապես, Սեւան քաղաքում  աշխատավարձի գծով կուտակված ընթացիկ պարտքի հարցը:

Փոխվարչապետը  հանձնարարել է մեկ անգամ եւս  ուսումնասիրել Սեւանի քաղաքապետարանում աշխատավարձի ընթացիկ պարտքի առաջացման պատճառները, հարցը քննարկել Գեղարքունիքի մարզպետի եւ քաղաքապետի հետ:     

Նա անթույլատրելի է համարել համայնքների կողմից ընթացիկ  պարտքերի կուտակումը եւ նշել, որ հնարավորինս  պետք է բացառել նոր պարտքերի կուտակումը` հաշվի առնելով, որ նախորդ տարիներին կուտակված աշխատավարձերի շուրջ 2,3 մլրդ դրամ պարտքից մարվել եւ  հուլիսի 15-ի դրությամբ մնացել է ընդամենը 57 մլն 720  հազար դրամ պարտք: