Մաշտոցի պուրակում երեկոյան ժամը 20:00-ին տեղի ունեցող հանրային քաղաքացիական  քննարկմանն այս անգամ ներկա էր Հանրային խորհրդի նախագահ Վազգեն Մանուկյանը, ով այսօր նախապես արդեն ողջունել էր քաղաքային տրանսպորտի թանկացման դեմ ակտիվիստների հաղթանակը և համաձայնել հանդիպել քաղաքացիների հետ պուրակում:

Քննարկման հենց սկզբից ակտիվիստների պահանջով պուրակից հեռացան մի շարք հեռուստաընկերությունների նկարահանման խմբեր, մնացին միայն այն ԶԼՄ-ները, որոնք նախկին պուրակային քննարկումները և քաղաքացիական պայքարի մյուս դրվագները պարբերաբար և համեմատաբար օբյեկտիվ լուսաբանել էին:

Իսկ այն ԶԼՄ-ները, որոնք, այդուհանդերձ, չէին ցանկանում ընդհատել իրենց նկարահանումը, այդպես էլ չկարողացան այն ավարտին հասցնել, քանի որ մի քանի ակտիվիստ, քննարկման մյուս մասնակիցների համաձայնությամբ, իրենց մարմնով փակեցին այդ ԶԼՄ-ների նկարահանող սարքերի դիմացը: