![](/static/articles/02/85/20/l-LNZ2d0K8bF.jpg)
Ո՞վ էր սպառնում լրագրողին...
Այս տարվա մայիսի 8-ին «Հետքի» լրագրող Անի Հովհաննիսյանին զանգահարել էին ՌԴ-ում գրանցված 0079260042178 բջջային հեռախոսահամարից եւ սպառնացել, որ եթե նա շարունակի «քիթը խոթել» այնտեղ, որտեղ պետք չէ, ոչ միայն իր, այլեւ ընտանիքի անդամների համար շատ վատ կլինի:
Ոստիկանության Էրեբունու քննչական բաժնում դեպքի առթիվ մայիսի 16-ին հարուցվեց քրեական գործ՝ «Սպանության, առողջությանը ծանր վնաս պատճառելու կամ գույք ոչնչացնելու սպառնալիքը» հոդվածի հատկանիշներով (ՀՀ. Քր.օր.-ի 137 հոդվածի 1-ին մաս):
Ոստիկանությունը «ԱրմենՏել», «Վիվասել ՄՏՍ» և «Օրանժ Արմենիա» ՓԲԸ-ներից դատարանի որոշմամբ պահանջել է տեղեկություններ, թե արդյոք 0079260042178 հեռախոսահամարը «ռոումինգ» գրանցում ստացել է: Գրանցված լինելու դեպքում նախաքննական մարմինը խնդրել է տրամադրել վերոնշյալ հեռախոսահամարից կատարված մուտքային և ելքային հեռախոսազանգերի վերծանումները, ինչպես նաև գրանցված ժամանակահատվածում հեռախոսահամարը շահագործած բջջային հեռախոսների ապարատների նույնականացման համարները, հեռախոսազանգերը սպասարկած հեռախոսակայանների տեղակայման հասցեները և հեռախոսազանգերի բաժանորդների տվյալները։
«ԱրմնեՏել» ընկերությունը տրամադրել է 0079260042178 հեռախոսահամարից բաժանորդներին կատարված և ընդունված հեռախոսազանգերի վերծանումները, որի շրջանակներում հարցաքննվել է 5 քաղաքացի: Ոստիկանությունը հարցաքննել է նաև 4 վկայի։
«Դեպքի առթիվ հանձնարարություններ են տրվել ոստիկանության Էրեբունու բաժնին ձեռնարկել օպերատիվ-հետախուզական միջոցառումներ ականատես վկաների շրջանակը ճշտելու և հանցանք կատարած անձին հայտնաբերելու ուղղությամբ։
Քննչական պահանջ է ուղարկվել Ռուսաստանի Դաշնություն` հեռախոսահամարի պատկանելիությունը և հանցագործություն կատարած անձի ինքնությունը պարզելու համար:
Նախաքննությունը շարունակվում է»,- «Հետքի» հարցմանն ի պատասխան՝ հայտնում է ոստիկանության ՀԿԼ վարչությունը։
Հավանաբար, հարցաքննվածները ոստիկանությանը չեն ասել, թե նշված հեռախոսահամարից իրենց ով է զանգահարել, կամ իրենք, այդ համարին զանգելով, ում էին ուզում: Իսկ Ռուսաստանը, չնայած իրավական ոլորտում համագործակցության համապատասխան պայմանագրերի առկայությանը, Հայաստանից ուղարկված քննչական պահանջին դեռ չի պատասխանել:
Անցել է մոտ 4 ամիս, ուստի «Հետքը» դժվար կացության մեջ հայտնված իրավապահներին օգնելու ակնկալիքով դիմում է ընթերցողներին. եթե տեղեկություններ ունեք, թե ում է պատկանում 0079260042178 հեռախոսահամարը, խնդրում ենք հայտնել խմբագրություն:
Մեկնաբանություններ (4)
Մեկնաբանել