Փոխվարչապետ, տարածքային կառավարման նախարար Արմեն Գեւորգյանն այսօր այցելեց  Լոռու մարզի  Մեղվահովիտ, Նորաշեն, Սարչապետ, Լեռնահովիտ համայնքներ:

Լոռու մարզպետ Արթուր Նալբանդյանի ուղեկցությամբ Արմեն Գեւորգյանն իր աշխատանքային այցը սկսեց  Տաշիրի տարածաշրջանի Մեղվահովիտ համայնքից, որտեղ  մարզի առաջնահերթ խնդիրների լուծման  ծրագրով կառուցվել է խմելու ջրագիծ` համայնքն ապահովելով շուրջօրյա ջրամատակարարմամբ:

Ջրագիծը կառուցվել է երկու փուլով`  առաջնահերթ խնդիրների լուծման առաջին եւ երկրորդ ծրագրերով հատկացվել է  56 մլն դրամ: Մարզպետարանի պատասխանատուները փոխվարչապետին տեղեկացրին, որ հետագայում նախատեսվում է ջրագծի հնարավորություններն օգտագործել հարեւան երկու համայնքները  եւս խմելու ջրով ապահովելու նպատակով:

Նորաշեն համայնքում ամբողջովին վերանորոգվել է մշակույթի տան տանիքը, այս աշխատանքների համար առաջնահերթ խնդիրների լուծման երրորդ ծրագրով հատկացվել էր  6 մլն դրամով: 

Այնուհետեւ Արմեն Գեւորգյանը Նորաշեն համայնքից մեկնեց Սարչապետ համայնք: Համայնքի դպրոցի շենքը, որտեղ տեղակայված է նաեւ մանկապարտեզը, ծրագրի երրորդ եւ չորրորդ փուլերով հատկացված 25 մլն դրամով ապահովված է ջեռուցման համակարգով, իսկ համայնքին հատկացված  5 մլն դրամ սուբվենցիայով հնարավոր է եղել մանկապարտեզը կահավորել նոր գույքով:  

Փոխվարչապետը գոհունակություն հայտնեց շենքային պայմաններից եւ  նշեց, որ  ինչպես առաջնահերթ խնդիրների լուծման, այնպես էլ այլ ծրագրերով  արվում է  հնարավորը` համայնքները կրթական բարեկարգ հաստատություններով ապահովելու ուղղությամբ:

Արմեն Գեւորգյանը ծանոթացավ նաեւ հիմնանորոգված Նորաշեն-Սարչապետ միջհամայնքային ճանապարհի աշխատանքներին, որոնք իրականացվել են պետբյուջեից հատկացված 157 մլն դրամով:

Լեռնահովիտ համայնքում փոխվարչապետը  եղավ նորակառույց համայնքային կենտրոնում: Կենտրոնի  հին շենքը հիմնովին քանդվել էր երկրաշարժից հետո, եւ համայնքապետարանը գործում էր տնակային պայմաններում: Համայնքային կենտրոնի նոր շենքը  նույնպես կառուցվել է առաջնահերթ խնդիրների լուծման  ծրագրով`երրորդ փուլով  հատկացվելով 40 մլն դրամ:  Փոխվարչապետին տեղեկացվեց, որ համայնքում տարբեր ծրագրերով ենթակառուցվածքների վերականգման այլ աշխատանքներ եւս իրականացվել են`մասնավորապես,   հիմնանորոգվել են խմելու ջրագիծը  եւ մշակույթի տունը: 

Լոռու մարզ  կատարած այցի ընթացքում փոխվարչապետը հանդիպումներ ունեցավ նաեւ համայնքների բնակիչների հետ,որոնց բարձրացրած հարցերը հիմնականում վերաբերում էին  գյուղտեխնիկայի ձեռք բերմանը եւ  գյուղմթերքի իրացմանը, հակակարկտային կայանների տեղադրմանը, միջհամայնքային ճանապարհների բարեկարգմանը , խմելու ջրի խնդիրներին:    

Փոխվարչապետը  Տաշիրի եւ Ստեփանավանի քաղաքապետերի հետ քննարկեց  նաեւ Ստեփանավան եւ Տաշիր քաղաքներում իրականացվող ծրագրերի ընթացքը, համայնքի ղեկավարների կողմից ներկայացվեցին առկա հիմախնդիրները: Այս մասին տեղեկացնում է ՏԿՆ հասարակայնության հետ կապերի բաժինը: