Երեկ Բեռլինում տեղի ունեցավ Աֆղանստանին նվիրված արտգործնախարարների մակարդակով Հյուսիսատլանտյան դաշինքի խորհրդի ընդլայնված հանդիպումը, որին մասնակցում էին ՆԱՏՕ-ի անդամ և Աֆղանստանում միջազգային անվտանգության ուժերին մասնակցող շուրջ հինգ տասնյակ երկրի արտաքին քաղաքական գերատեսչությունների ղեկավարներ:

Հայաստանի արտաքին քաղաքական գերատեսչության ղեկավարը վերահաստատեց ՀՀ հանձնառությունը` շարունակելու օժանդակել Աֆղանստանում խաղաղության, անվտանգության, կայունության և ներազգային համերաշխության հաստատման ուղղությամբ գործադրվող ջանքերին: Էդվարդ Նալբանդյանը նաև շնորհակալություն հայտնեց Գերմանիայի իշխանություններին Աֆղանստանում հայկական զորախմբի տեղակայման և ծառայությանն առնչվող հարցերում արդյունավետ համագործակցության համար:

Բեռլինում Էդվարդ Նալբանդյանը նաև հանդիպում ունեցավ Գերմանիայի կանցլեր Անգելա Մերկելի արտաքին քաղաքականության և անվտանգության հարցերով գլխավոր խորհրդական Քրիստոֆ Հոյսգենի հետ: Զրուցակիցները մանրամասն անդրադարձան հայ-գերմանական բարեկամական հարաբերությունների առավել ամրապնդման ուղիներին, քննարկեցին միջազգային և տարածաշրջանային խնդիրների լայն շրջանակ:

Երկուստեք նշվեց, որ երկու երկրի միջև հաստատված է բարձր մակարդակի քաղաքական երկխոսություն, երկկողմ և բազմակողմ ձևաչափերով զարգանում է փոխգործակցությունը, ստեղծվել է ամուր իրավապայմանագրային դաշտ, ընդլայնվում են գործարար կապերը, համագործակցությունը՝ մշակութային և կրթական ոլորտներում:

Քրիստոֆ Հոյսգենի խնդրանքով նախարար Նալբանդյանը ներկայացրեց ղարաբաղյան հիմնախնդրի կարգավորման գործընթացի վերջին զարգացումները:

Էդվարդ Նալբանդյանի հաջորդ հանդիպումը Ավստրալիայի արտգործնախարար Քևին Ռուդի հետ էր: ՀՀ արտգործնախարարության մամուլի, տեղեկատվության և հասարակայնության հետ կապի վարչության տեղեկացմամբ` նախարարները մանրամասն քննարկեցին ղարաբաղյան հիմնախնդրի հանգուցալուծմանն ուղղված միջազգային հանրության ջանքերը: