Կախված նրանից՝ վաղը Կարմիր Խաչի միջազգային կոմիտեի (ԿԽՄԿ) երևանյան գրասենյակից կզանգահարե՞ն Ադրբեջանում 12 օր առաջ գերեվարված զինծառայող Հակոբ Ինջիղուլյանի հարազատներն՝ վերջինները կորոշեն վաղվա իրենց անելիքները, ակցիաները: Այս մասին «Հետքին» ասաց Հակոբի հորեղբոր որդին՝ Արման Ինջիղուլյանը:

«Ծնողները հույսով սպասում են: Կողքից բարեկամություն, հարազատություն, հարևանությունն էլ միշտ հույս են տալիս, հանգստացնում են: Դեռ հույսով սպասում ենք: Էսօր մեզ մոտ Կարմիր խաչում աշխատանքային օր չի, բայց Բաքվում աշխատանքային օր է: Բայց իրենք մեզ տեղեկացրին, որ կապ չունի՝ մեզ մոտ աշխատանքայի՞ն է, թե՞ ոչ, համենայնդեպս, երբ Բաքվում ինչ-որ փոփոխություն լինի, հաստատ կզանգեն էստեղ կասեն, ու էստեղից էլ մեզ կզանգեն, հերթապահ մաս կա»,- ասաց Արման Ինջիղուլյանը:

Նրա խոսքով՝ Հակոբի հարազատ Ոսկեվազ գյուղում շատերն են ուզում գալ ԿԽՄԿ-ի գրասենյակի առջև, բայց ինքը չի ուզում, մտածում է, որ եթե շատերը հավաքվեն գրասենյակի դիմաց, ԿԽՄԿ-ի աշխատակիցները կզբաղվեն հարազատներին հանգստացնելով, ոչ թե իրենց գործով:

Մինչ այժմ Հակոբի հարազատները մի քանի անգամ հավաքվել են ԿԽՄԿ-ի երևանյան գրասենյակի դիմաց՝ «ինչ-որ պատասխան լսելու, բայց չեն լսել»: Արմանի խոսքով՝ այս պահին ընտանիքը նորություն չունի նաև Հայաստանի պաշտպանության նախարարությունից:

Հիշեցնենք, որ օգոստոսի 7-ի լույս 8-ի գիշերը՝ ծառայությունն իրականացնելու ժամանակ, ըստ նախնական տեղեկությունների, տեղանքում չկողմնորոշվելու հետևանքով, 22-ամյա շարքային զինծառայող Հակոբ Ինջիղուլյանը հատել էր ղարաբաղաադրբեջանական սահմանը և հայտնվել Ադրբեջանի պահպանության տակ գտնվող տարածքում:

Հակոբի գերեվարումից հետո Ադրբեջանը մի քանի անգամ խախտել է իր ստորագրած Ժնևյան կոնվենցիան, ըստ որի՝ ռազմագերին 7 օրվա ընթացքում պետք է ընտանիքին նամակով հայտնի իր որպիսության և գտնվելու վայրի մասին: Մինչ այժմ ԿԽՄԿ Բաքվի գրասենյակի ներկայացուցիչներին չի հաջողվել Ադրբեջանի իշխանություններից ստանալ Հակոբին այցելելու թույլտվություն, իսկ ադրբեջանական հեռուստաընկերությունը «հարցազրույց» է անցկացրել ռազմագերու հետ, որոնք ևս գերու իրավունքների կոպիտ խախտումներ են: