Տոկիոյի օտար լեզուների համալսարանի Ասիայի և Աֆրիկայի լեզուների և մշակույթների ինստիտուտի կրտսեր գիտաշխատող Տակայուկի Յոշիմուրան առաջին անգամ Ճապոնիայում գրել է արևելահայերենի դասագիրք: Այն լույս կտեսնի 2014 կամ 2015 թվականին: Մինչ այդ հեղինակը ուղղում է դասագրքի վրիպակներն ու բարելավում վարժությունները:

Դասագիրքը գրված է միայն ճապոներենով, նախատեսված է բոլոր այն ճապոնացիների համար, ովքեր հետաքրքրվում են հայոց լեզվով ու հայ հասարակությամբ, և կոչվում է շատ պարզ՝ «Արևելահայերենի դասագիրք»:

Տակայուկի Յոշիմուրան «Հետքին» տեղեկացրեց, որ ի տարբերություն արևելահայերենի դասագրքի՝ արևմտահայերենի ու գրաբարի դասագրքեր Ճապոնիայում նախկինում լույս տեսել են (հեղինակներից են Նոբուո Սատոն և Շինիչի Շիգուսան): Կրտսեր գիտաշխատողն ինքն էլ է արդեն Հայաստանի վերաբերյալ գիրք հրատարակել՝ «Հայաստանի նորագույն պատմության ուղեցույց», որը նախատեսված է զբոսաշրջիկների և ուսանողների համար:

Տակայուկի Յոշիմուրան ժամանակակից հայոց պատմություն է դասավանդում Տոկիոյի օտար լեզուների համալսարանի Ասիայի և Աֆրիկայի լեզուների և մշակույթների ինստիտուտում: Նա հայերեն սովորել է Երևանի պետական համալսարանում 2001-2003 թթ. և դրանից առաջ ու հետո մի քանի անգամ այցելել Հայաստան:

Այս տարի՝ օգոստոսի 5-ից սեպտեմբերի 4-ը, Ասիայի և Աֆրիկայի լեզուների և մշակույթների ինստիտուտն առաջին անգամ Ճապոնիայում անցկացնում է նաև հայոց լեզվի ինտենսիվ դասընթաց, որը վարում է Տակայուկի Յոշիմուրան: Դասընթացի անցկացմանն օգնում է Ճապոնիայում ապրող մի քանի հայ: Տակայուկի Յոշիմուրան դասընթացի մասնակիցներին դասավանդում է հիմնականում հայոց լեզու, բայց անդրադառնալու է նաև հայոց գրականությանն ու պատմությանը, իսկ հայերը պատմելու են հայկական մշակույթի մասին:

«Դասընթացն ազատ է յուրաքանչյուր հետաքրքրվողի համար: Հատկապես հայերենի դասին գրանցվեց 12 հոգի: Ասում են, որ դասընթացի պատմության մեջ ամենաշատ մարդիկ մասնակցեցին: Իհարկե, բոլորը ճապանացիներն են: Մասնակցում են մյուս լեզուներն ուսումնասիրող ուսանողները, լեզվաբաններ, լեզվաբանության սիրողական աշխատողները և այլն»,- ասում է Տակայուկի Յոշիմուրան:

Օտար լեզուների նման դասընթացներ ինստիտուտն անցկացնում է արդեն 46 տարի՝ ամեն տարի առաջարկելով սովորել 2-3 լեզու: Բացի հայերենից՝ այս տարի ուսուցանվող լեզուներն են ուզբեկերենը և աֆրոասիական լեզվաընտանիքի ճյուղերից չադական լեզու հաուսայերենը:

Տակայուկի Յոշիմուրայի մասին «Հետքի» հոդվածը տես այստեղ: