ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունեց Չեխիայի Հանրապետության Կարլովի Վարիի երկրամասի պատվիրակությանը` նահանգապետ Յոզեֆ Նովոտնիի ղեկավարությամբ: Հանդիպմանը ներկա էին նաեւ Վայոց ձորի մարզպետ Էդգար Ղազարյանը եւ Ջերմուկի քաղաքապետ Վարդան Հովհաննիսյանը: Պատվիրակությունն այցելել է Վայոց ձորի մարզ, եղել  Ջերմուկում, մարզային եւ քաղաքային իշխանությունների հետ քննարկվել են Վայոց ձորի մարզի և Կարլովի Վարիի երկրամասի, ինչպես  նաեւ Ջերմուկ և Կարլովի Վարի քաղաքների միջև գործընկերային հարաբերությունների հաստատման  հնարավորությունները:

Փոխվարչապետը գոհունակություն հայտնեց, որ Հայաստանի և Չեխիայի միջև բարեկամական հարաբերությունները տեղափոխվում են նաև միջտարածաշրջանային մակարդակ: Նա նկատեց, որ  Ջերմուկն ու Կարլովի Վարին  բավականին ընդհանրություններ ունեն, և  առողջարանային երկու քաղաքների միջև կարող է հետաքրքիր ու  արդյունավետ համագործակցություն հաստատվել: Փոխվարչապետը տեղեկացրեց հանրապետությունում և, մասնավորապես, Վայոց ձորի մարզում  իրականացվող  զբոսաշրջային ծրագրերի մասին` նկատելով, որ զբոսաշրջային ավանդույթներ ունեցող Կարլովի Վարիի փորձը կարող է օգտակար լինել հայ գործընկերների համար:

Հյուրերն իրենց հերթին նշեցին, որ հետաքրքրված  են համագործակցությամբ եւ տպավորված են Ջերմուկի բնությամբ ու առողջարանային հնարավորություններով: Նահանգապետ Յոզեֆ Նովոտնին տեղեկություններ ներկայացրեց  երկրամասի մասին` նշելով, որ  այն տարեկան մոտ 0,5 մլն զբոսաշրջիկ է  ընդունում: Նա նաեւ առաջարկեց քննարկել Կարլովի Վարիի երկրամասի հետ ուղիղ օդային կապի հաստատման հնարավորությունը, ինչը կնպաստի կողմերի միջեւ ինչպես զբոսաշրջության զարգացմանը, այնպես էլ կապերի աշխուժացմանը:

Հանդիպմանը կողմերը պատրաստակամություն  հայտնեցին աջակցել  փոխշահավետ ծրագրերի իրականացմանը:

ՏԿՆ հասարակայնության հետ կապերի բաժին