Լեհական ‹‹Արի Արի›› հիմնադրամի կողմից անցկացվող ‹‹Անկախություն IV՝ չտեսնողների օգնության համակարգի զարգացում›› ծրագրի շրջանակներում օգոստոսի 24-ից 30-ն ընկած ժամանակահատվածում Հայաստանում կգտնվեն լեհ հիպոթերապիստները:

Երեք մասնագետներ այց կկատարեն Ուշիում գտնվող Կենտավր հիպոթերապիայի կենտրոն, որտեղ աշխատում են հայ հիպոթերապիստներ: Արդեն չորս տարի է, ինչ Հասմիկ Հովհաննիսյանը, Բորիս և Անդրեյ Պոդորովսկիները զբաղվում են հիպոթերապիայի ժամանակակից կենտրոնի ստեղծմամբ և համագործակցում են լեհ մասնագետների հետ՝ սովորելով սահմանափակ կարողություններով մարդկանց օգնելու տարբեր մեթոդներ: 

Լեհ հիպոթերապիստները՝ Մալգոժատա Գուրնևիչը Լեհաստանի Հիպոթերապիայի միությունից, Բիդգոշչից, և Մագդալենա ու Դարիուշ Մացերը Յակշիցեի ‹‹Tęcza›› հիպոթերապիայի կենտրոնից Ուշիի Կենտավր կենտրոնում կանցկացնեն մի շարք դասախոսություններ և ցուցադրումներ, ինչպես նաև կստուգեն հայ հրահանգիչների աշխատանքը Լեհաստանում այս տարի անցկացված թրեյնինգներից հետո, որոնց իրենց մասնակցությունն են ցուցաբերել երկու հայ հրահանգիչներ:

Այս տարվա աշխատանքը նվիրված կլինի հատկապես չտեսնողների թերապիային «Արի Արի» հիմնադրամի ընդլայնված ծրագրի շրջանակներում, որն իրականացվում է Հայաստանում 2009 թվականից ի վեր: Ուշիում հիպոթերապիստների և տիֆլոթերապիստների համագործակցությունը գիտելիքներ ու հմտություններ ձեռք բերելու հիանալի հնարավորություններ կընձեռի 10 հայ հրահանգիչների, ովքեր Լեհաստանում և Հայաստանում վերապատրաստվել են տարածական կողմնորոշման և սպիտակ փայտիկի օգնությամբ տեղաշարժվելու ոլորտում:

Ողջ նախագիծը ֆինանսավորվում է Լեհաստանի արտգործնախարարության ‹‹Լեհական զարգացման համագործակցություն›› և ‹‹Միջազգային համերաշխություն›› հիմնադրամի ‹‹Ժողովրդավարության օժանդակություն 2013›› ծրագրերի շրջանակներում: