Նվազագույն ամսական աշխատավարձը 45 000 դրամ սահմանելու մասին «ՀՀ նվազագույն աշխատավարձի մասին» օրենքը հուլիսի 1-ից ուժի մտնելուց հետո Ալավերդի համայնքի ավագանին հուլիսի 30-ին N 26-Ա որոշմամբ հաստատել է քաղաքի ոչ առևտրային կազմակերպությունների 2013թ.-ի  աշխատակիցների նոր թվաքանակը, հաստիքացուցակները և դրույքաչափերը: Ալավերդու քաղաքապետ Արտավազդ Վարոսյանը երեկ «Հետքին» հայտնեց, որ քաղաքապետարանի համակարգի 323 աշխատողներից 200-ից ավելին կստանան նվազագույն աշխատավարձ:

Ավագանու N 26-Ա որոշմամբ «Ալավերդու Ռոմանոս Մելիքյանի անվան երաժշտական դպրոց» և «Ալավերդու մանկական արվեստի դպրոց» ՀՈԱԿ-ների կոնսերվատորիա ավարտած և մասնագիտական այլ կրթությամբ դասատուների համար գործավարին և պահակին հավասար սահմանվել են նվազագույն 45 000 դրամ աշխատավարձ: Սա խոսում է այն մասին, որ մեզանում խնդրի հետ առնչվող օրենսդրական դաշտը համակարգված չէ, և Հայաստանի օրենսդիրը դեռևս չի պատկերացնում, թե ում համար պետք է նախատեսել նվազագույն աշխատավարձը:

Որոշմամբ իրենց համար սահմանված աշխատավարձի չափից դժգոհություն հայտնեցին Ալավերդու 6 նախադպրոցական ուսումնական հաստատությունների դաստիարակների օգնականների մի մասը, որոնց անուններն իրենց խնդրանքով չենք հրապարակում` անախորժություններից զերծ պահելու համար. «Մենք օրը աշխատում ենք 9,5 ժամ: Օրենքը մեր 8 աշխատանքային ժամվա համար նվազագույն աշխատավարձ է սահմանել 45 000 դրամ: Մեր աշխատանքային հավելյալ 1,5 ժամվա համար, որը նախադպրոցական ուսումնական հաստատությունների  ամսվա աշխատանքային 22 օրերին կազմում է 33 աշխատանքային ժամ, վճարվում է ընդամենը 6 հազար դրամ աշխատավարձ»,-ասաց զրուցակիցներիցս մեկը: 

Վերջիններս մատնանշում են, որ մեկ դրույքով աշխատող դաստիարակները աշխատանքային մեկ օրվա ընթացքում աշխատում են 7 ժամ 10 րոպե, որի համար նրանց վճարվելու է 70 հազար դրամ աշխատավարձ: Դաստիարակների օգնականներն ասում են, որ իրենց ուսերին է դրված երեխաների ողջ հոգսերը, մինչ ավագանու N 26-Ա որոշումը իրենց աշխատավարձը 2 հազար դրամով բարձր է եղել դաստիարակների աշխատավարձից և անարդարացի են համարում 20 հազար դրամով դաստիարակների աշխատավարձից իրենց աշխատավարձի կտրուկ նվազումը:

Վերջիններս դժգոհեցին նաև ավագանու որոշմամբ թիվ 4 և թիվ 6 մանկապարտեզների դաստիարակ-մեթոդիստների համար սահմանված 93 հազար դրամ աշխատավարձի չափից: Այդ հաստիքներով 3 խումբ ունեցող թիվ 4 մանկապարտեզում դաստիարակ- մեթոդիստ է աշխատում Ալավերդու քաղաքապետարանի ֆինանսական բաժնի պետ Սամվել Աբելյանի հարսը: Հինգ խումբ ունեցող թիվ 6 մանկապարտեզում քաղաքապետարանի կողմից նույն հաստիքը ֆինբաժնի պետի աղջկա`Լիլիթ Աբելյանի համար բացվել է դեռ 2.5 տարի առաջ: Վերջինս նաև քաղաքապետի տեղակալ Արթուր Վարոսյանի կինն է: Քաղաքապետարանի երկու պատասխանատուների հարազատներն էլ նախադպրոցական մասնագիտական կրթություն չունեն, ուստի չեն կարող պատշաճ մեթոդական ցուցումներ տալ իրենցից փորձառու և մասնագետ դաստիարակներին:

Հիշեցնենք, որ անցած տարիներին 4 խումբ ունեցող քաղաքի թիվ 2 և մյուս 3 նախադպրոցական ուսումնական հաստատություններում քաղաքապետարանը դաստիարակ-մեթոդիստի հաստիքներ բացելու խնդիրը չի կարևորել, հավանաբար քաղաքապետարանի պատասխանատուների կողմից իրենց հարազատներից աշխատանքի տեղավորելու հավակնություններ չունենալու պատճառով:

Ըստ ավագանու որոշման` «Ալավերդու քաղաքային համայնքի մշակույթի կենտրոն» ՀՈԱԿ-ի 2013թ.-ի հաստիքացուցակով Ալավերդու ժողգործիքների համույթի գեղարվեստական ղեկավարը, թատրոնի ռեժիսորն ու դերասանները, երգի–պարի մանկական թատրոնի գեղարվեստական ղեկավարն ու պարուսույցը նվազագույն 45 հազար դրամ  աշխատավարձ կստանան 8 ամսվա աշխատանքային պայմանագրով, քանի որ Ալավերդու ավագանին համարել է, որ քաղաքի արվեստի մշակներին տարվա մնացած 4 ամիսներին կարող են կերակրել մուսաները:

«Հետքի» հետ զրույցում Ալավերդու քաղաքապետ Արտավազդ Վարոսյանը հայտնեց, որ նվազագույն աշխատավարձը փոխհատուցելու համար քաղաքապետարանը պետությունից ստացել է շուրջ 21 մլն 600 հազար դրամ: Համայնքապետարանը սեփական միջոցների հաշվին 2,5 մլն դրամ է ներդրել իր ենթակայության ոչ առևտրային կազմակերպությունների աշխատողների աշխատավարձը բարձրացնելու համար. «Տարիներ առաջ ուժի մեջ է մանկապարտեզներում դաստիարակների աշխատավարձերը նվազագույն աշխատավարձի կրկնակի չափով բարձրացնելու մասին օրենքը, որը քաղաքապետարանի կողմից չի կիրառվել պետության կողմից փոխհատուցում չհատկացնելու պատճառով»,- ասաց նա և հավելեց, որ 21 մլն 600 հազար դրամ գումարի մեջ մտել է նաև դաստիարակների աշխատավարձը նվազագույն աշխատավարձի կրկնակի չափով ավելացնելու փոխհատուցման գումարները: Քաղաքապետը նաև նշեց, որ որոշմամբ 73 հազար դրամից 95-100 հազար դրամ է դարձել նախադպրոցական ուսումնական հաստատությունների տնօրենների աշխատավարձը: Արտավազդ Վարոսյանի կարծիքով, դաստիարակի աշխատավարձի ցանկացած փոփոխություն արտացոլվում է դաստիարակի օգնականի աշխատավարձում, սակայն չհիմնավորեց օգնականների աշխատավարձի կտրուկ նվազման շարժառիթները: Նա անարդարացի համարեց երաժշտական և արվեստի դպրոցների դասատուներին վարձատրելու սահմանված կարգը:

Մշակույթի աշխատողների 8-ամսյա աշխատավարձի առնչությամբ Արտավազդ Վարոսյանը հայտնեց, որ նրանց հետ տարեկան կայուն աշխատավարձի պայմանագրեր գուցե չկնքեն, այլ որպես պատվիրատու պահանջ կներկայացնեն քաղաքի մշակութային խմբերին, կհատկացնեն նախնական գումար պատվերը կատարելու համար, կներկայացնեն ժամանակացույց, որից հետո մշակույթի աշխատողները իրենք հնարավորություն կունենան որոշելու իրենց աշխատավարձի չափը`ըստ պրոֆեսիոնալիզմի և մասնակցության չափի: