HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Վահե Սարուխանյան

Ավիացիոն ոլորտի պաշտոնյաները աչք են դրել Հայաստանի օդային ուղիների վրա

Այս տարվա հունիսի 6-ին կառավարությունը հավանություն տվեց ՀՀ օդային փոխադրումների բնագավառի ազատականացման հայեցակարգի նախագծին: Ըստ այդմ՝ նախատեսվում է առանձնացնել ավիափոխադրումների 3 խումբ-ուղղություններ (ԱՊՀ, Եվրոպա, Մերձավոր Արեւելք, սակայն բոլոր խմբերում էլ լինելու է դեպի Մոսկվա ուղղությունը), որոնք շահագործելու են 3 ընկերություններ: Վերջիններս հայտնի են դառնալու աշնանն անցկացվելիք մրցույթի ընթացքում: Ըստ հայեցակարգի՝ շահագործողներին կարող է մինչեւ 5 տարով թռիչքների լիցենզիա տրվել:  

Մոնոպոլիստ «Արմավիա»-ի»՝ ապրիլի 1-ից ոլորտից դուրս գալուց հետո այս փոփոխությունը կարծես դրական ազդեցություն կարող է ունենալ շուկայի վրա, սակայն մամուլում արդեն կարծիք է հնչել, որ 3 խմբերից ամենաեկամտաբերը ԱՊՀ-ի ուղղություններն են, հետեւաբար այդ խմբի շահագործող է դառնալու այն ընկերությունը, որի թիկունքն ամենաուժեղն է: Մամուլում նշվել է նաեւ, որ ամեն խմբում լինելու է 14 ուղղություն, սակայն հարցն այստեղ նախեւառաջ ոչ թե դրանց հավասար քանակն է, այլ տարբեր հաճախականությունն ու, բնականաբար, եկամտաբերությունը:

Արդեն առիթ ունեցել ենք նշելու, որ քաղավիացիայի ոլորտը բավականին եկամտաբեր է, սակայն այն ունի նաեւ լայն զանգվածներին անհայտ բազմաթիվ մութ էջեր: Մասնավորապես, պարբերաբար բացվող-փակվող, վերանվանվող ընկերությունների թիկունքում կանգնած են մարդիկ, որոնք նախկին ու ներկա պաշտոնյաներ են, սակայն նրանց «ներկայությունը» միշտ չէ, որ աչքի է զարնվում:  

Այսօր քաղավիացիայի գլխավոր վարչության կողմից տրված օդանավ շահագործողի վկայական ունի 11 ընկերություն: Նրանք բոլոր էլ առաջիկա մրցույթների հավանական մասնակիցներ են: 

Անունը 

Հիմնադրման  տարեթիվը 

Մասնակից/բաժնետեր 

Բաժնեմաս 

Գործադիր մարմնի ղեկավար 

Atlantis European Airways LLC

1999

«Ատլանտիս Գրուպ» ՍՊԸ, «Սատուրն Ռայզեբյուրո» ՍՊԸ (Ավստրիա)

90 %,
10 %

Ռոլլանդ Մարգարյան

Ark Airways LLC

2009

Ռոբերտ Բաղդասարյան, 
Եվգենի Լավրեցկի (ՌԴ)

51 %,
49 %

Ռոբերտ Բաղդասարյան

Air Armenia CJSC

2003

Ռուզաննա Թովմասյան,
Վահան Հարությունյան

50 %,
50 %

Արսեն Ավետիսյան

Armenia Airways Air Company CJSC

2013

«Մեյն Ավիէյշըն Տեքնիքս» ՍՊԸ,
Արմեն Սարգսյան

50 %,
50 %

Կարեն Մովսիսյան

Ayk Avia Air Company CJSC

2002

Շահեն Աղաբաբյան,
Արմեն Վանցյան

50 %,
50 %

Հայկանուշ Մխիթարյան

Reliable Unique Services Aviation LLC

2009

Հրաչյա Հովհաննիսյան, 
Սերգեյ Աստիոնով (Ղրղզստան)

51 %,
49 %

Անուշ Մարգարյան

South Airlines LLC

2000

Ջանիկ Սիմոնյան,
Դանուտե Սիմոնյան,
Կարինե Սիմոնյան

42 %,
29 %,
29%

Սամվել Հարութունյան

Skiva Air LLC

2011

Լուսինե Խաչատրյան,
Վահրամ Սիմոնյան

51 %,
49 %

Սամվել Հարութունյան

Sky Net Airline LLC

2011

«Ազգային ավիացիոն միավորում» ՀԿ

100 %

Գրիգորի Վարդանյան

Veteran Avia LLC

2010

Սոնա Գեւորգյան,
Բիլալ Մալիկ (ՌԴ),
Ամիր Մուհամմադ (ՌԴ)

52 %,
24 %,
24 %

Արտաշես Գեւորգյան

Taron-Avia LLC

2007

Գառնիկ Պապիկյան

100 %

Գառնիկ Պապիկյան

Ներկայացնենք այն 3 առաջին ավիաընկերությունները, որոնց մասին վերջին շրջանում առավել շատ է խոսվել, եւ որոնք այս պահին կարող են համարվել հաղթողի թեկնածուներ:

«Ատլանտա Յուրոփիան Էյուեյս» ՍՊԸ (Atlantis European Airways LLC)- Այս ընկերությունը հիմնադրվել է 1999-ին: Համագործակցում է «Չեխական ավիաուղիներ» եւ «Ավստրիական ավիաուղիներ» ընկերությունների հետ, որոնք Երեւանից թռիչքներ են իրականացնում Պրահա եւ Վիեննա, այնտեղից էլ՝ աշխարհի այլ կետեր: Ներկայում «Ատլանտա Յուրոփիան Էյուեյս»-ի 10 տոկոսի փայատերը «Սատուրն Ռայզեբյուրո» ավստրիական ընկերությունն է, որը գրանցված է Վիեննայում: 90 տոկոսի սեփականատերն էլ երեւանյան գրանցումով «Ատլանտիս Գրուպ» ՍՊԸ-ն է: Բայց իր հերթին «Ատլանտիս Գրուպ»-ի 48 տոկոսը պատկանում է նույն «Սատուրն Ռայզեբյուրո»-ին, 32 տոկոսը՝ ՀՀ քաղաքացի Սպարտակ Գիշյանին, 10-ական տոկոս էլ՝ Սուրեն Ավագյանին եւ Ռոլլանդ Մարգարյանին: Վերջինս նաեւ  «Ատլանտա Յուրոփիան Էյուեյս»-ի տնօրենն է:

Ընկերության հատկանշական կետերից մեկն այն է, որ հիմնադրման օրվանից (19.01.1999) մինչեւ 2004-ի հունվարի 19-ը՝ ուղիղ 5 տարի, ընկերության բաժնետերերից մեկը եղել է Արամ Նովելի Մարությանը, որն այժմ ՔԱԳՎ պետի տեղակալն է, իսկ 2001-2003 թթ. եղել է «Հայկական ավիաուղիներ» ՓԲԸ-ի կոմերցիոն տնօրենը: 2008-2010 թթ. «Ատլանտա Յուրոփիան Էյուեյս»-ի սեփականատերերն են եղել Մարությանին պատկանող «Մարութ Գրուպ» ՍՊԸ-ն եւ «Մարուտ Գրուպ Չեկ» չեխական գրանցումով ընկերությունը: Այն, որ այժմ էլ պետական պաշտոնյան առնչություն ունի տվյալ ավիաընկերության հետ, փաստվում է վերջինիս կայքում առկա գործընկերների ցանկով: Իբրեւ այդպիսիք, մասնավորապես, նշվում են «Մարուտ Գրուպ Չեկ»-ը, Սեւանի ափին գտնվող «Բոհեմիան Ռեսորթ» ՍՊԸ-ն («Բեսթ Վեսթերն Բոհեմյան Ռեզորթ» հյուրանոցային համալիր), ուղեւորափոխադրող «Գասուռ» ՍՊԸ-ն (Երեւան-Վանաձոր-Երեւան միկրոավտոբուսային երթուղի, ըստ atlantis.am կայքի՝ այս ընկերության միկրոավտոբուսներով կազմակերպվում են նաեւ տուրիստական այցելություններ), որոնք նույնպես Մարությանինն են:  

«Ատլանտա Յուրոփիան Էյուեյս»-ի ինքնաթիռների մասին որեւէ տեղեկություն համացանցային ավիացիոն տեղեկատուներում չկա: Միայն «Վիքիպեդիա» օնլայն-հանրագիտարանն է հայտնում, որ ընկերությունը բազավորված է Երեւանի «Զվարթնոց» օդանավակայանում եւ շահագործում է 1 հատ «Airbus A320»: Սակայն օդանավակայանի պաշտոնական կայքում տեղադրված են դրանից օգտվող օպերատորների անունները, որոնց մեջ այս ընկերությունը չկա:

«Էյր Արմենիա» ՓԲԸ (Air Armenia CJSC)- Հիմնադրվել է 2003-ին: Բաժնետերերը ի սզբանե երկուսն են: 50 տոկոսը պատկանում է ՀՀ քաղաքացի Ռուզաննա Թովմասյանին, որը ընկերության տնօրեն Արսեն Վարդգեսի Ավետիսյանի մայրն է: Իրականում հենց Ավետիսյանն է բաժնետերը, ինչի մասին նա հայտարարել է նաեւ մամուլում: Մյուս 50 տոկոսն էլ պատկանում է Վահան Էդոնիսի Հարությունյանին, որը ԱԺ ՀՀԿ-ական պատգամավոր, արդարադատության նախկին նախարար Դավիթ Հարությունյանի հարազատ կրտսեր եղբայրն է:

«Արմավիա»-ի՝ շուկան լքելուց հետո այս տարվա հուլիսին ՔԱԳՎ-ը դեպի Մոսկվա, Սանկտ Պետերբուրգ, Սոչի, Ռոստով, Կրասնոդար, Սամարա ուղղություններով թռիչքներ իրականացնելու ժամանակավոր արտոնագիր է տվել «Էյր Արմենիա»-ին, ինչը բազմաթիվ կարծիքների տեղիք է տվել: Մասնավորապես, հավանական է համարվում, որ հենց այս ընկերությունն էլ կշարունակի ԱՊՀ խմբի չվերթների իրականացումը:

Վահան Հարությունյանն իր հարցազրույցներից մեկում նշել է, որ ժամանակին ընկերությունն իրականացրել է «Արմավիա»-ին պատկանող որոշ չվերթներ, եւ նորեկ չէ մարդատար թռիչքներ իրականացնելու գործում: Արսեն Ավետիսյանն էլ հաստատել է, որ «Էյր Արմենիա»-ն գալիք մրցույթներում մասնակցելու հայտ կներկայացնի: Քաղավիացիայի ոլորտում ներգրավված շատ այլ անձանց նման Հարությունյանն ու Ավետիսյանը նույնպես նախկինում աշխատել են «Հայկական ավիաուղիներ»-ում, որը 2004-ին սնանկ հայտարարվեց եւ իր տեղն աստիճանաբար զիջեց «Արմավիա»-ին: Հարությունյանը եղել է պետական այդ ընկերության կոմերցիոն տնօրենը, իսկ Ավետիսյանը՝ գլխավոր տնօրենը: Վերջինս հայտարարել է, որ «Հայկական ավիաուղիներ»-ի սնանկացումից հետո հենց «Էյր Արմենիա»-ն է գնել նրա ավիատեխնիկական բազայի լաբորատոր սարքավորումները, իսկ գոյացած գումարով փակվել են նախկին հզոր ընկերության աշխատավարձերի պարտքերը:   

Ըստ aerotransport.org տեղեկատվական բազայի՝ ներկայում «Էյր Արմենիա»-ն (բազավորված է «Զվարթնոց» օդանավակայանում), որը մինչ այս առավել հայտնի էր բեռնափոխադրումներով, ունի 5 ակտիվ բեռնափոխադրող ինքնաթիռ՝ 1 հատ «Իլ-76ՏԴ», 3 հատ «Ան-12» եւ 1 հատ «Ան-32Բ» (վերջինս լիզինգով ձեռք է բերվել «Հայք Ավիա»-ից):

Տնօրեն Արսեն Ավետիսյանը հուլիսին հայտնել էր, որ ժամանակավորապես իրենց վստահված 6 ուղղությունները շահագործելու համար 2 հատ «Airbus» են ձեռք բերելու: Հարկ է նշել, որ «Զվարթնոցի» պաշտոնական կայքում առ այսօր չկա «Էյր Արմենիա»-ի անունը՝ իբրեւ օդանավակայանով մարդատար չվերթներ իրականացնողի: Իսկ դրա պատճառն այն է, որ ընկերությունը դեռեւս չի իրականացնում չվերթներ, քանի որ ինքնաթիռներ ձեռք բերելու գործընթացի մեջ է: Այս մասին մեզ հայտնեցին «Էյր Արմենիա»-ի գրասենյակից: Մի քանի օր առաջ Ա. Ավետիսյանը «Ինտերֆաքս» գործակալությանը հայտնել էր, որ օգոստոսի 18-ին նախատեսված առաջին Երեւան-Մոսկվա չվերթը տեխնիկական պատճառներով հետաձգվում է երկու շաբաթով: Ըստ նրա՝ լիզինգով արդեն իսկ ձեռք բերված առաջին «A320» օդանավը պետք է ներկվի ընկերության գույներով: Նույնը կարվի նաեւ երկրորդի հետ, որը կրկին լիզինգով ձեռք կբերեն աշնան սկզբին:   

«Արմենիա Էյրվեյզ ավիաընկերություն» ՓԲԸ (Armenia Airways Air Company CJSC)- Հիմնադրվել է այս տարվա ապրիլին, ըստ էության, գալիք մրցույթներին մասնակցելու նպատակով: 50-ական տոկոսով սեփականատերերն են «Մեյն Ավիէյշըն Տեքնիքս» ՍՊԸ-ն եւ ՀՀ քաղաքացի Արմեն Արարատի Սարգսյանը: Ներկայում ՍՊԸ-ի միակ սեփականատերը «Արմենիա Էյրվեյզ ավիաընկերություն» ՓԲԸ-ի տնօրեն Կարեն Ռաֆիկի Մովսիսյանն է, որը ՔԱԳՎ պետ Արտյոմ Մովսեսյանի ազգականն է: «Հրապարակը» գրել էր (22.06.2013), որ, ըստ մերձկառավարական շրջանակներում պտտվող լուրերի, առաջիկա մրցույթներին մասնակցելու ֆավորիտ ընկերությունը փաստացի պատկանում է ՔԱԳՎ պետի եղբորը կամ նրա տանիքի տակ է: ՔԱԳՎ-ից հերքել էին՝ նշելով, թե Մովսեսյանը չունի ավիաընկերություն ունեցող եղբայր: Հունիսի 30-ին «Արմենիա» հեռուստաընկերության «Ռ-Էվոլյուցիա» հաղորդաշարի ժամանակ ՔԱԳՎ պետը նշեց, որ դա իր հորեղբոր որդին է, որին ինքը կցանկանար մրցույթի մասնակից եւ հաղթող տեսնել:   

Ինչպես երեւում է, խոշոր գործարար Միխայիլ Բաղդասարովի «Արմավիա»-ի հեռանալուց հետո այս շուկան համեղ պատառ է դարձել հատկապես ավիացիոն ոլորտի պաշտոնյաների ու նրանց հարազատների համար, որոնք առաջիկայում համերաշխաբար իրար միջեւ կբաժանեն Հայաստանի օդային ուղիները: 

Մեկնաբանություններ (1)

Lyusi
Միակ ազնիվ ու աշխատող, ավիացիայից բան հասկացողը Արսեն Ավեստիսյանն է, բախտ եմ ունեցել իր ղեկավարության տարիներին աշխատել ՀԱՈՒ-ում ու տեսել եմ ինչ ջանասիրությամբ ու սրտացավությամբ էր մոտենում խնդիրներին, ափսոս չկարողացավ կանգնեցնել սնանկացման գործընթացը, որովհետև իշխանություններն արդեն ծրագրել էին արհեստական այդ սնանկությունը...

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter