ՀՀ կառավարության բուհերի միավորման նախագիծը քննարկումների բուռն ալիք է բարձրացրել Երևանի Կոմիտասի անվան պետական կոնսերվատորիայի, Թատրոնի և կինոյի պետական ինստիտուտի ու Գեղարվեստի պետական ակադեմիայի` Գյումրու մասնաճյուղերում: Միավորման դեպքում դադարեցվում է մասնաճյուղերի գործունեությունը: Փոխարենը ձևավորվում է մեկ բուհ՝ Գյումրու արվեստների ակադեմիա անվամբ: Մասնաճյուղերի 3 ռեկտորներից միայն Երևանի Կոմիտասի անվան պետական կոնսերվատորիայի Գյումրու մասնաճյուղի ղեկավար Կարինե Ավդալյանն է կողմ միավորմանը:

Լրատվամիջոցների ներկայացուցիչներին տված իր բազմաթիվ հարցազրույցներում Գեղարվեստի պետական ակադեմիայի Գյումրու մասնաճյուղի ղեկավար Համբարձում Ղուկասյանը նշել է, որ անհնար է մեկտեղել կերպարվեստը, թատրոնն ու երաժշտությունը, նաև մտավախություն էր հայտնել, որ կլինի ուսանողների արտահոսք Երևանի մայր բուհ: Իսկ այս կարգավիճակով ուսանողը, սովորելով Գյումրու մասնաճյուղում, հստակ գիտի, որ ստանալու է մայր բուհի դիպլոմ: Թատրոնի և կինոյի պետական ինստիտուտի Գյումրու մասնաճյուղի փոխտնօրեն Սամվել Գրիգորյանն էլ կարծիք էր հայտնել, թե միավորման դեպքում կստեղծվի այնպիսի մի իրավիճակ, որ «կլինենք մենք մերոնցով. մենք կչալենք, մենք կպարենք»:

Բուհերի միավորման դեպքում բնականաբար առաջ է քաշվելու մեկ ղեկավարի խնդիրը: Խոսակցություններ են գնում, թե նորաստեղծ Արվեստների ակադեմիայի ռեկտոր է նշանակվելու Երևանի Կոմիտասի անվան պետական կոնսերվատորիայի մասնաճյուղի ներկայիս ղեկավարը՝ Կարինե Ավդալյանը, որովհետեւ նա վերևներում «լավ կապեր» ունի եւ կողմ է միավորմանը:

«Ես ուղղակի տեղս չեմ գտնում վրդովմունքից: Ես չգիտեմ, թե ովքեր են նման խոսակցություններ տարածողները,- «Հետք»-ի հետ զրույցում վրդովմունքը չի թաքցնում Կարինե Ավդալյանը,- էս հարցով օրը մի լրագրող գալիս է, չենք կարողանում նորմալ ուսումնական պրոցեսները կազմակերպել: Գործերս թողած զբաղված ենք պարզաբանումներ տալով: Ու դա էն դեպքում, երբ հստակ ոչ մի բան չկա: Որեւէ մեկին պաշտոնապես բան չեն ասել, մեզ որեւէ նախագիծ ցույց չեն տվել»:

Կարինե Ավդալյանի փոխանցմամբ` իրենք չունեն իրենց ձեռքի տակ պաշտոնական որոշում, որ բուհերը միավորվում են: Ըստ տիկին Ավդալյանի` դրանք ասեկոսներ են, որ ինքը լսում է տարբեր մարդկանցից: Իսկ եթե իր կարծիքն է պետք, ապա այն հետեւյալն է. «Ամբողջ աշխարհը գնում է գլոբալիզացիայի և կարծում եմ, որ շատ ճիշտ կլինի միացումը, էն առումով, որ կստեղծվի առանձին մի միավոր՝ Արվեստի ակադեմիա: Մասնաճյուղի կարգավիճակը քեզ ստիպում է մշտապես կառչած մնալ մայր բուհ-ին: Մի կողմից դա լավ է, մյուս կողմից էլ զրկված ես ինքնուրույն որոշումներ կայացնելուց և սեփական նախաձեռնությունները կյանքի կոչելուց»:

Ըստ Կարինե Ավդալյանի` պետք չէ այդքան դրամատիկ ընկալել այն փաստը, որ բուհերի միավորումից հետո ուսանողի դիպլոմի մեջ գրվելու է, որ նա ավարտում է ոչ թե Երեւանի, այլ Գյումրու Արվեստի ակադեմիան, ասենք՝ երաժշտական արվեստ բակալավր մասնագիտությամբ: «Սրանից ոչ դասավանդող մանկավարժի գիտելիքն է պակասում, ոչ ուսանողի իսկապես սովորելու ցանկությունը,- ասում է Կարինե Ավդալյանը,- և ես էլ համարում եմ, որ դա ցածր ստատուս չէ՝ Գյուրմու Արվեստի ակադեմիա ավարտելը»:

Երևանի Կոմիտասի անվան պետական կոնսերվատորիայի Գյումրու մասնաճյուղում ներկայումս սովորում է 200 ուսանող: Յուրաքանչյուր տարի աշխատում են այդ թիվը պահել, թեպետ ուսումնական հաստատությունները չգիտես ինչու ձգտում են աշխատանքի վերցնել ոչ թե բարձրագույն, այլ միջին մասնագիտական կրթությամբ մասնագետների: Դա է պատճառը, որ ամեն անգամ որոշակի խնդիրներ են ունենում ուսանողների թվաքանակը չպակասեցնելու առումով:

«Մեր բուհում սովորող ուսանողների վարձավճարը բարձր է բոլոր բուհերից, որովհետեւ մեր մոտ անհատական պարապմունքներ կան: Կոնսերվատորիայի մեկ ուսանողը պետության վրա նստում է  880 հազար դրամ: Մենք հավաքում ենք վարձավճար 450 հազար դրամ: Այս տարի ուսման վճարները չենք բարձրացրել, թեպետ մայր բուհը գնացել է այդ քայլին,- փաստում է Կարինե Ավդալյանը,- մենք հրաժարվեցինք այդ մտքից՝ նկատի ունենալով մարզի սոցիալական վիճակը»:

Կարինե Ավդալյանն արդեն 10-րդ տարին է ղեկավարում է Երևանի պետական կոնսերվատորիայի Գյումրու մասնաճյուղը: Համարում է, որ այս տարիների ընթացքում շատ մեծ առաջընթաց են գրանցել: Կապեր են հաստատել Սանկտ Պետերբուրգի եւ Մոսկվայի կոնսերվատորիաների հետ, որտեղից մասնագետներ են այցելում Գյումրի 10 օրով իրենց փորձը ուսանողներին փոխանցելու նպատակով: Մեծ հաջողությամբ՝ արդեն 5-րդ տարին է անցկացնում են երաժիշտ-կատարողների «Վերածնունդ»  միջազգային փառատոնը:

«Եթե պետությունը ընդունում է որոշում, որ պիտի մասնաճյուղերը միավորվեն եւ ստեղծվի ակադեմիա, նշանակում է ինչ-ինչ պատճառներ կան: Ենթադրում եմ, որ նոր աշխատատեղեր կստեղծվեն, որովհետև ակադեմիա լինելով` ինքը չի կարող երեք մասնաճյուղեր ունենալ: Նոր ֆակուլտետներ պիտի ունենա անպայման: Ինքը պետք է ունենա արվեստի մենեջմենթի, մարկետինգի ֆակուլտետ և այլն, որոնք շատ համահունչ կլինեն այսօրվա աշխարհի պանանջմունքներին»,-կարծիք է հայտնում Կարինե Ավդալյանը:

Եվ իհարկե Գյումրու Արվեստների ակադեմիան պիտի ունենան նոր ռեկտոր: Թերևս ամենախնդրահարույց և ամենաքննարկվող հարցն առաջին իսկ օրվանից, երբ շրջանառության մեջ դրվեց նախագծի մասին լուրերը: Զրուցակիցս վստահ է, որ չի լինի պարզ նշանակում, կլինի մրցույթ, ինքն էլ բնականաբար կմասնակցի հայտարարված մրցույթին:

«ՀՀ ցանկացած քաղաքացի, եթե ունի համապատասխան կրթություն եւ բավարարում է մրցույթի պահանջներին կարող է մասնակցել եւ հաղթել: Իսկ ինչու չեմ կարող այդ մեկը լինել ես: Ունեմ անցած ճանապարհ, մեծ աշխատանքային փորձ, կոչում: Չեմ անցնի, դա ամեն դեպքում մեծ դժբախտություն չեմ համարի: Ես ունեմ իմ արվեստի դպրոցը, իմ բիզնեսը: Հակառակ դեպքում կգնամ իմ դպրոցը կղեկավարեմ: Ով էլ որ անցնի, առաջինը ես նրա ձեռքը կսեղմեմ, կշնորհավորեմ: Բայց քանի դեռ չկա միավորման նախագիծ, բարձրացված խուճապի ու իրարանցման իմաստը չեմ հասկանում»,- զրույցն ամփոփում է Կարինե Ավդալյանը: