Հայաստանի Մաքսային միություն մտնելու հարցով այսօր առավոտյան Ազգային ժողովում փակ նիստ է տեղի ունեցել: Պատգամավորներին պարզաբանումներ է տվել արտաքին գործերի նախարար Էդվարդ Նալբանդյանը: ՀԱԿ խմբակցության պատգամավոր Նիկոլ Փաշինյանը խորհրդարանում հայտարարեց, որ իր համար հանդիպումը կարեւոր էր հասկանալու համար, թե ինչ է իրագործում Հայաստանի գործող իշխանությունը, որից հետո հնարավոր կլիներ ճշտել սեփական դիրքորոշումը տեղի ունեցողի վերաբերյալ:

«Ցավով պետք է արձանագրեմ, որ Էդուարդ Նալբանդյանը որեւէ հարցի պատասխան ըստ էության չտվեց, ինչից կարելի է անել երկու եզրակացություն. կամ` տեղի ունեցողի մասին տեղեկատվությունն այնքան անբարենպաստ է, որ իշխանությունը չի կարող ներկայացնել, կամ էլ որքան էլ ծիծաղելի է հնչում՝ իշխանությունը տեղյակ չէ, թե ինչ է կատարվում այս պրոցեսի մեջ: Ուստի ես, արձանագրելով այս փաստը, արտահայտում եմ իմ հիասթափությունը հանդիպման կապակցությամբ»,-հայտարարեց Նիկոլ Փաշինյանը:

ԱԺ նախագահ Հովիկ Աբրահամյանը դիմելով պատգամավորին նշեց, որ հանրապետության նախագահը հայտնել է իր մտադրության մասին` Մաքսային միությանը միանալու վերաբերյալ, իսկ մնացած գործընթացների մասին պատգամավորները կտեղեկանան, երբ այդ գործընթացները սկսվեն:

«Դրանք դեռ չեն սկսվել, երբ կսկսվեն պատգամավորները եւ բոլորը տեղյակ կլինեն»,-հավելեց ԱԺ նախագահը: