Այսօր՝ Երեւանի ժամանակով 20:00-ին, «Հրազդան» մարզադաշտում կմեկնարկի ֆուտբոլի աշխարհի 2014 թ. առաջնության Հայաստան-Դանիա պատասխան հանդիպումը: Հիշեցնենք, որ Կոպենհագենում կայացած խաղում մեր ընտրանին 4-0 հաշվով հաղթել էր դաշտի տերերին: Երկու անգամ աչքի էր ընկել Յուրա Մովսիսյանը, մեկական գոլ էլ խփել էին Արաս Օզբիլիզն ու Հենրիխ Մխիթարյանը: Այդ հաղթանակից հետո Հայաստանի հավաքականը եւս մեկ հաղթանակ տարավ, այս անգամ Պրահայում չեխերի հանդեպ՝ 2-1:

Եվ չնայած այսօրվա հանդիպումից առաջ Վարդան Մինասյանի սաները ընտրական երկրորդ խմբում հավասար միավորներով 3-5-րդ տեղերը կիսում են Չեխիայի ու Դանիայի հետ, այդուհանդերձ, դժվարին հանդիպում է սպասվում, ինչի մասին խոսել են նաեւ իրենք՝ ֆուտբոլիստները: Բանն այն է, որ պրահյան հանդիպման ժամանակ վնասվածք է ստացել թիմի ավագ եւ դարպասապահ Ռոման Բերեզովսկին, որի վերականգնման համար մոտ 20 օր կպահանջվի: Յուրա Մովսիսյանն ու թիմի փոխավագ, կենտրոնական պաշտպան Ռոբերտ Արզումանյանը հերթական (երկրորդ) դեղինները ստացան չեխերի հետ խաղում եւ այս հանդիպումը բաց կթողնեն: Պաշտպանությունում առկա խնդիրները, ցավոք, այսօր էլ առկա են, քանի որ այդ օղակի որոշ ֆուտբոլիստների ֆունկցիոնալ վիճակը կաղում է:

Այս պահին մրցաշարային աղյուսակն ունի հետեւյալ տեսքը.

Խմբում երկրորդ տեղ զբաղեցնելու եւ ուղեգիր ձեռք բերելու տեսական հնարավորություն մեր թիմը դեռ ունի, սակայն ամեն ինչ բարդանում է նրանով, որ բուլղարները, չեխերն ու դանիացիները դեռ հանդիպելու են խմբի հետնապահ մալթացիների հետ, եւ հավանաբար անչափ կարեւոր երեքական միավոր կվաստակեն, իսկ մեր ընտրանին միակն է, որ միավոր է տվել Մալթային՝ Երեւանում 0-1 հաշվով պարտվելով գաճաճ երկրի ներկայացուցիչներին: Գալիք խաղում պարտվողը գրեթե զրկվում է Բրազիլիա մեկնելու հնարավորությունից, չնայած հոկտեմբերին թիմերը դեռ  երկուական խաղ պիտի անցկացնեն: 

Այսօրվա խաղի մրցավարական բրիգադը կլինի Հոլանդիայից. գլխավոր մրցավարը կլինի Հենդրիկուս Նիյհույսը, նրան կօգնեն Անջելո Բոնմանը եւ Հուբերտուս վան դե Վենը, չորրորդ պաշտոնյան է Ռիխարդ Լիսվելդը: 

Մեր խմբում կկայանան նաեւ Մալթա-Բուլղարիա, Իտալիա-Չեխիա հանդիպումները:  

Լուս.՝ ffa.am-ի