![](/static/articles/29/25/l-ACCoZXN07a.jpg)
Բժիշկի դեմ քրեական գործ հարուցվեց
«Հետքի» մի քանի հրապարակումներից եւ հարազատների անդադար պայքարից հետո այս տարվա հուլիսի 8-ին Երեւան քաղաքի դատախազը «Արթմեդ» ԲՎԿ-ի բժիշկ Աշոտ Քոսյանի կողմից մասնագիտական պարտականությունները ոչ պատշաճ կատարելու փաստի առթիվ ՀՀ քրեական օրենսգրքի 130-րդ հոդվածի հատկանիշներով (բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը) հարուցել է քրեական գործ:
Վերա Ղազարյանի դուստրը` Նոնա Սարգսյանը բողոք էր ներկայացրել ՀՀ գլխավոր դատախազին: Այնտեղից էլ գրությունով մահացածի դստեր բողոքը հասցեագրվել էր Երեւան քաղաքի դատախազությանը:
Հիշեցնենք, որ Ֆինանսատնտեսագիտական քոլեջի դասախոս, 63-ամյա Վերա Ղազարյանն այս տարվա մարտի 9-ին, հարազատների պնդմամբ, նորմալ ինքնազգացողությամբ գնացել է աշխատանքի եւ դասերը վերջացնելուց հետո` ժամը 12.30-ի սահմաններում, անձնական ավտոմեքենայով ուղեւորվել «Արթմեդ» կենտրոն, որտեղ ողնաշարի ճողվածքի բուժման համար պետք է ստանար երկրորդ ներարկումը: Մինչդեռ ժամեր անց հիվանդանոցից տեղեկացրել են, որ Վերա Ղազարյանը, ներարկումը դեռ չստացած, մահացել է:
Հարազատները պնդում են, որ մահը վրա է հասել բժիշկ Քոսյանի մասնագիտական պարտականությունները չկատարելու կամ ոչ պատշաճ կատարելու, դրանց նկատմամբ անփույթ եւ անբարեխիղճ վերաբերմունքի հետեւանքով:
Նշենք, որ Ավան եւ Նոր Նորք վարչական շրջանների դատախազության ավագ դատախազ Մ. Ենգիբարյանը այս տարվա մայիսի 23-ին մերժել էր նույն վարչական շրջանի ոստիկանության քննիչ Վ. Պողոսյանի որոշման դեմ Վ. Ղազարյանի դստեր`Նոնա Սարգսյանի բողոքը` անհիմն լինելու պատճառաբանությամբ:
Մահացածի դուստրը պահանջում էր բժիշկի դեմ քրեական գործ հարուցել, մինչդեռ իրար հետեւից մերժման գրություններ էր ստանում:
Մահացածի հարազատները հույս ունեն, որ ի վերջո կապացուցվի, որ Վերա Ղազարյանի մահը վրա է հասել բժիշկի մեղքով, եւ նա կենթարկվի պատասխանատվության:
Մեկնաբանություններ (3)
Մեկնաբանել