«Ամերիաբանկի» «Հետքի» աղբյուրը տեղեկացնում է, որ երեք շաբաթ առաջ մոսկվացի գործարար, բարերար Ռուբեն Վարդանյանի նախաձեռնությամբ աուդիտորների մի խումբ է գործուղվել բանկ: Խումբը սկսել է ուսումնասիրել օֆշորային սկանդալի առանցքը հանդիսացող վարկային փաթեթը: Ռուբեն Վարդանյանը բանկի սեփականատերերից մեկն է, եւ ակամայից նրա անունը կապվել է օֆշորային սկանդալի հետ:

Հիշեցնենք, որ Ամերիաբանկը» ադամանդագործ Սուքիասյանին 12 մլն դոլար վարկ է տրամադրել, որի դիմաց գրավադրվել էր գործարար Փայլակ Հայրապետյանի ունեցվածքը: Վարկային փաթեթի հիմքում դրված բիզնես ծրագրի հեղինակը հենց «Ամերիաբանկ»-ն է: «Ամերիաբանկ» ՓԲԸ-ից ստացված վարկային գումարից 9 մլն 370 հազար 450 ԱՄՆ դոլար փոխանցվել է «HELLENIC BANK PUBLIK COMPANY»` մի քանի օֆշորային ընկերությունների հաշվեհամարներին: Այդ ընկերություններից երկուսում ` «WLISPERA HOLDINGS LIMITED»-ում  եւ «A.B.S. GLOBAL LIMITED» ՍՊԸ-ում բաժնետերեր էին վարչապետ Տիգրան Սարգսյանը եւ Արարատյան թեմի առաջնորդ Նավասարդ Կճոյանը: 

«Հետքի» նույն աղբյուրի հաղորդմամբ` աուդիտորները աղաղակող խախտումներ են հայտնաբերել վարկային փաթեթի մեջ: Չի բացառվում, որ այս փաստերը պատճառ դառնան բանկի ղեկավարության փոփոխության համար: Ակնհայտ է, որ Ռուբեն Վարդանյանը փորձում է պարզել, թե ինչ դերակատարություն է ունեցել իր բանկը օֆշորային սկանդալի մեջ:

Լուսանկարում` ձախից աջ` Արտակ Հանեսյանը, Անդրեյ Մկրտչյանը, Գագիկ Սահակյանը: