Երևանի քաղաքապետարանի 2013 թվականի ծրագրով սահմանված ժամանակացույցի համաձայն շարունակվում են քաղաքապետարանի ենթակայության նախադպրոցական ուսումնական հաստատությունների նորոգման, հիմնանորոգման, ինչպես նաև մշակութային հաստատությունների  ջեռուցման ապահովման ու վերանորոգման  աշխատանքները:  Այս մասին տեղեկացնում է քաղաքապետարանի տեղեկատվության և հասարակայնության հետ կապերի վարչությունը` նշելով, որ ծրագրի արդյունքում ջեռուցման համակարգերով կապահովվի մայրաքաղաքի 16 գրադարան:

«Դրանցից 12-ում աշխատանքներն արդեն ավարտվել են: Նշենք, որ ծրագիրն այս տարի ամբողջանում է, և մայրաքաղաքի բոլոր գրադարանները մինչև տարեվերջ ապահովված կլինեն  ջեռուցման համակարգերով»,- նշված է հաղորդագրության մեջ: 

Ջեռուցման համակարգերով են համալրվում նաև քաղաքապետարանի ենթակայության երաժշտական ու արվեստի դպրոցները, մշակույթի կենտրոնները: Քաղաքապետարանը տեղեկացնում է, որ մշակութային օջախների ջեռուցման ծրագրում ընդգրկված են նաև «Էրեբունի» պատմահնագիտական արգելոց-թանգարանը, «ՀայԱրտ» մշակութային կենտրոնը և Կարեն Դեմիրճյանի անվան թանգարանը, հիմնանորոգման և մասնակի նորոգման աշխատանքներ են ընթանում մայրաքաղաքի 28 մանկապարտեզներում, որոնց մեծ մասն ավարտված է:

Լուսանկարը` yerevan.am-ի