![](/static/articles/02/97/82/l-gPjTwFp8Av.jpg)
Նիկոլ Փաշինյանն ու վարչապետը վիճեցին. պատճառը Փակ շուկան էր
ԱԺ ՀԱԿ խմբակցության պատգամավոր Նիկոլ Փաշինյանը կառավարություն-ԱԺ հարցուպատասխանի ժամանակ վարչապետ Տիգրան Սարգսյանից հետաքրքրվեց, թե ինչու կառավարությունը չի իրականացրել պատմամշակութային հուշարձան հանդիսացող Փակ շուկայի պահպանության համար անհրաժեշտ գործառույթները, երբ մի շարք օրենքների պահանջով լիազորված էր անել:
Պատգամավորի հարցին ի պատասխան՝ վարչապետը տվեց վերացական պատասխան: Ըստ նրան` մշակույթի եւ քաղաքաշինության նախարարները իրեն զեկուցել են, որ իրենց վերապահված լիազորությունների շրջանակներում քննարկել են հարցը: Նրանք նաեւ վարչապետին զեկուցել են, բանակցել են նաեւ քաղաքապետարանի հետ, որպեսզի ընդունվի այնպիսի որոշում, որով հաշվի կառնվի օրենսդրությամբ բոլոր պահանջները:
Վարչապետի պատասխանը դուր չեկավ Նիկոլ Փաշինյանին: «Անկեղծ ասած Ձեր՝ Չինաստանում գտնվելն ավելի խոսուն էր, քան հիմիկվա Ձեր պատասխանը: Ես չկասակացա, թե Դուք ինչ եք ասում: Խնդիրը շատ պարզ է, քաղաքաշինության ոլորտի մարմինը եւ հուշարձանների պաշտպանության գործակալությունը հստակ սահմանել են նախագիծ, թե ինչ նախագծով պետք է տեղի ունենար հուշարձանի նկատմամբ աշխատանքը եւ հստակ արձանագրվել է, որ շեղվել են: Քաղաքաշինության նախարարությունը եւ մյուս կառույցները, որ պետք է հսկեին եւ դադարեցնեին, չեն արել: Հիմա ասում եք, որ զեկուցել են Ձեզ, թե ինչ են զեկուցել հասկանալի չեղավ»,- արձագանքեց Նիկոլ Փաշինյանը:
Պատգամավորը վարչապետի պատասխանից հասկացել էր, որ վերջինս հերթական անգամ չունի պատասխաններ եւ ամբիոն է բարձրացել ուղղակի ժամանակ սպառելու համար: «Գոնե 3 րոպե խոսեիք, կհասկանայինք, որ բան ունեք ասելու»,- նշեց Ն. Փաշինյանը եւ հավելեց, որ Տ. Սարգսյանի գլխավորած կառավարությունն ի զորու չէ իրականացնել օրենքով նախատեսված գործառույթներ, որոնք հակասում են ոչ միայն օլիգարխների շահերին, այլեւ քմահաճույքներին:
«Ձեզ համար ընդհանրապես կարեւոր չէ ինչ հարց է քննարկվում Ազգային ժողովում, ինչ հարց եք բարձրացնում, Ձեզ բովանդակային խնդիրները չեն հետաքրքրում: Ձեզ հետաքրքրում է այն գնահատականները, որ դուք տալիս եք: Ցանկացած հարցի շուրջ մենք լսում ենք Ձեր նույն գնահատականները եւ ձանձրացել ենք Ձեր գնահատականներից: Բովանդակային քննարկմանը մենք միշտ պատրաստ ենք, նույնիսկ այն դեպքերում, երբ կառավարությունն ունի խնդիրներ, բայց Ձեր գնահատականները դառնում են արդեն անհետաքրքիր, որովհետեւ պարբերաբար կրկնվում են»,- ասաց վարչապետ Տիգրան Սարգսյանը:
Վարչապետն ասաց, որ կարող է Նիկոլ Փաշինյանի նախադասություններով, վիրավորական արտահայտություններով նրան պատասխանել, սակայն «հարգում եմ Ազգային ժողովը եւ ինձ թույլ չեմ տալիս իջնել այդ մակարդակին»:
Այնուամենայնիվ վարչապետը նշեց, որ կան խնդիրներ, այդ թվում Փակ շուկան, սակայն կիրառվել են բազմաթիվ բանավեճեր, քննարկումներ, կիրառվել են բազմաթիվ սանկցիաներ, որպեսզի ճիշտ լուծումներ գտնվեն «եւ հանրությունն էլ հետեւել է դրան»:
Մեկնաբանություններ (2)
Մեկնաբանել