Հոկտեմբերի 9-ին` ժամը 19.00-ին, ոստիկանության Տարոնի բաժնում ահազանգ է ստացվել, որ հիսունն անց մի տղամարդ Վանաձորի կենտրոնական հանրախանութի հարևանությամբ վիճաբանել է կնոջ հետ, դանակով հարվածներ հասցրել և դիմել փախուստի: Այս մասին հաղորդում է ոստիկանությունը: 

Ժամը 19.55-ին  շտապօգնության կայանից ոստիկանությունում  հաղորդում է ստացվել, որ մարմնական վնասվածքներով հիվանդանոց է տեղափոխվել 1959 թ. ծնված Սիրանուշ Ա.-ն:

«Ձեռնարկված օպերատիվ-հետախուզական միջոցառումների շնորհիվ պարզվել է, որ նույն օրը, ժամը 19.00-ի սահմաններում, 1956 թ. ծնված Լևոն Ա.-ն վիճաբանել է կնոջ` Սիրանուշ Ա.-ի հետ և դանակով երկու անգամ հարվածել նրա պարանոցին: Լևոն Ա.-ն նույն օրն ինքնակամ ներկայացել է բաժին: Հանցագործության գործիք դանակն առգրավվել է»,- նշված է հաղորդագրության մեջ:

Նշանակվել է դատաբժշկական փորձաքննություն: Փաստի առթիվ  ՀՀ քրեական օրենսգրքի 112 հոդվածի 1-ին մասի մեղադրանքով հարուցվել է  քրեական  գործ: Լևոն Ա.-ն ձերբակալված է: Կատարվում է նախաքննություն` տեղեկացնում է ոստիկանությունը: