Երեկ Ռիո դե Ժանեյրոյի հայտնի Կոբակաբանա ափին էին հավաքվել հազարավոր նույնասեռականներ՝ գունավոր հագուստներով ու թմբուկներով՝ նշելու Ռիոյի 18-րդ գեյ շքերթը, որը շարունակվեց մինչեւ ուշ գիշեր: Կոբակաբանա էին ժամանել միասեռականներ Բրազիլիայի տարբեր քաղաքներից: Նրանք փոքրիկ համերգներ ու դիսկոտեկներ էին կազմակերպել փողոցներում: Տոնակատարությանն էին միացել նաեւ այլ տեղացիներ ու զբոսաշրջիկներ:

Շքերթը նվիրված էր նույնասեռականներին ուղղված խտրականությունների դեմ պայքարին: Միջոցառման վերաբերյալ գովազդային պաստառներում հատուկ նշված էր 1996 թ.-ի սեպտեմբերի 12-ին ընդունված քաղաքային օրենքի մասին, որը կիրառում է պատժամիջոցներ՝ նույնասեռականների հանդեպ խտրական վերաբերմունքի դեպքում:

Հիշեցնենք, որ այս տարվա մայիսին Բրազիլիան  հաստատեց դատարանի միջոցով նույնասեռականների ամուսնությունը, սակայն վերջնական օրենքը դեռ պետք է ընդունվի: Բրազիլիան աշխարհի ամենամեծ բնակչություն ունեցող կաթոլիկ երկիրն է, որտեղ ապրում են ավելի քան 60 հազար նույնասեռական զույգեր: