ՀՀ փոխվարչապետ, տարածքային կառավարման նախարար Արմեն Գեւորգյանը, որն աշխատաքային այցով գտնվում է Ֆրանսիայում, երեկ՝ հոկտեմբերի 14-ին, հանդիպել է Ֆրանսիայի ներքին գործերի նախարար Մանուել Վալսի հետ:

Կողմերը քննարկել են ինչպես երկկողմ, այնպես էլ Եվրամիության հետ իրականացվող ծրագրերին ու հետագա համագործակցությանը վերաբերող հարցեր: Ինչպես նշված է նախարարության հասարակայնության հետ կապերի բաժնի տարածած հաղորդագրության մեջ, բարձր գնահատելով  երկու բարեկամ երկրների միջեւ փոխգործակցության մակարդակը` նրանք կարեւորել են նաեւ Եվրամիության ծրագրերի շրջանակում համագործակցության խորացումը:

Զրուցակիցները մասնավորապես անդրադարձել են միգրացիայի ոլորտում թե՛  երկկողմ եւ թե՛ Եվրամիության հետ իրականացվող ծրագրերին: Երկուստեք դրական է գնահատվել օրերս Եվրոպական խորհրդարանի կողմից Հայաստանի հետ մուտքի արտոնագրի ռեժիմի դյուրացման եւ հետընդունման համաձայնագրերին հավանության տալու որոշումը, ինչը մարդկանց տեղաշարժի եւ նրանց ապահով վերադարձի ոլորտում նոր հնարավորություններ է ստեղծում:

Այս համատեքստում անդրադարձ է եղել ապաստան հայցող ՀՀ քաղաքացիների խնդրին: Կարեւորվել է նրանց ապահով վերադարձի համար անհրաժեշտ  պայմանների ստեղծումը: Նշվել է, որ  դրան է միտված Եվրամիության`  «Միգրացիայի կառավարման ոլորտում Հայաստանի կարողությունների հզորացում, վերաինտեգրմանն ուղղված միջոցառումներ» ծրագիրը, որն  իրականացվում է Ֆրանսիայի ներգաղթի եւ ինտեգրման գործակալության կողմից եւ ուղղված է Հայաստան վերադարձողների վերաինտեգրման աջակցմանը:

Առաջիկայում ՀՀ Ազգային ժողով կներկայացվի ապրիլին Բրյուսելում Հայաստանի եւ ԵՄ-ի միջեւ ստորագրված ռեադմիսիայի (հետընդունման) մասին համաձայնագիրը, ըստ որի՝ Հայաստանը փաստաթուղթը ստորագրած ԵՄ անդամ պետությանների հետ պետք է կազմի համաձայնագրի կիրարկման արձանագրություն: Փոխվարչապետը նշել է, որ հայկական կողմը պատրաստակամ է արդեն իսկ սկսել այդ հարցով  քննարկումները ֆրանսիացի գործընկերների հետ: Նա նաեւ տեղեկացրել է, որ մի շարք աշխատանքներ են իրականացվում սահմանային կառավարման բարելավման եւ անցակետերի արդիականացման ուղղությամբ, արդեն ներդրվել է կենսաչափական անձնագրերի համակարգը:

Երկուստեք  կարեւորվել է վերոնշյալ ուղղություններով համագործակցության խորացումը: Պրն Վալսը  նշել է, որ ֆրանսիական կողմը պատրաստակամ է ամենայն աջակցություն ցուցաբերել հայ գործընկերներին` անհրաժեշտ աշխատանքների իրականացման հարցում:

Զրուցակիցները բարձր են գնահատել նաեւ ապօրինի միգրացիայի, կազմակերպված հանցավորության,  թմրամիջոցների ապօրինի տարանցման եւ թրաֆիքինգի դեմ  պայքարի հարցում, ինչպես նաեւ քաղաքացիական պաշտպանության ոլորտում առկա փոխգործակցությունը: