Հուլիսի 16-ին ահազանգ է ստացվել, որ Սյունիքի մարզի Կապան քաղաքի թիվ 2 ավագ դպրոցի շենքում տեղի է ունեցել ինքնափլուզում: Դեպքի վայր են մեկնել մեկ մարտական հաշվարկ, մարզային փրկարարական վարչության փրկարար ջոկատը:

Տեղում պարզվել է, որ ինքնափլուզվել են 4 հարկանի դպրոցի կենտրոնական մասի միջհարկային ծածկերը (4-ից 1-ին հարկ) և ետնամասի հիմնական պատը' 180 քմ մակերեսով:

Դպրոցը կառուցվել է 1962թ.: Հուլիսի 9-ից Սիսիանի «Նոր բաց» (Նորոքշին) բաց բաժնետիրական ընկերությունը կատարում էր դպրոցի վերանորոգման աշխատանքներ:

«Տուժածներ չկան: Ինքնափլուզման պատճառները պարզաբանվում են»,- հայտնում է արտակարգ իրավիճակների նախարարությունը:

Նույն օրը՝ ժամը 19.30-ին, Արագածոտնի մարզի Նոր Եդեսիայի գյուղապետ Վ.Աբգարյանից ահազանգ է ստացվել, որ ժ.17.10-ի սահմաններում, ուժեղ քամու հետևանքով, պոկվել և քշվել է միջնակարգ դպրոցի տանիքի թիթեղյա ծածկը' մոտ 1000 ք.մ. մակերեսով:

Մեկ օր անց՝ հուլիսի 17-ին, հաղորդագրություն է ստացվել, որ հուլիսի 16-ի երեկոյան քամու հետևանքով Երևան քաղաքի Ռ.Մելիքյան փողոցի թիվ 81 տան տանիքից պոկվել է թիթեղյա ծածկը և ընկել հարակից թիվ 102 տան վրա:

Դեպքի վայր է մեկնել Փրկարար ուժերի վարչության հատուկ փրկարար ջոկատի 1-ին հերթապահ խումբը, որն ապամոնտաժել և իջեցրել է թիթեղյա ծածկը: