Երեկ «Ժառանգություն» կուսակցության վարչության նախագահ Րաֆֆի Կ. Հովհաննիսյանը եւ խորհրդարանական համանուն խմբակցության պատգամավոր Անահիտ Բախշյանը, վարչության անդամներ Կարինե Հակոբյանը եւ Սուսաննա Բարխուդարյանը Էջմիածին քաղաքում հանդիպեցին շրջանի բնակիչների հետ:

Հանդիպման սկզբում ԱԺ պատգամավոր Անահիտ Բախշյանը ներկայացրեց հաշվետվություն` տարածաշրջանից իրեն ուղղված դիմումներին տրված ընթացքների մասին:

Րաֆֆի Հովհաննիսյանը խոսքով դիմեց ներկաներին` ասելով, որ ինքը չի եկել փրկարար դրոշով` ակնկալելով, որ ժողովուրդը կգնա իր հետեւից. «Ես ուզում եմ ձեր հետեւից գալ ձեր հանձնարարականով, ձեր պատգամներով ու առաջարկներով»: Նա քաղաքացիներին հորդորեց մասնակից լինել իշխանության ձեւավորմանը` նշելով, որ ժողովուրդը ինքը պետք է որոշի, թե ինչ պետություն է ուզում, իսկ երկիրն ու նրա վիճակը փոխելու համար քաղաքացիական միասնական զորաշարժ է պետք:

Անդրադառնալով վերջին շրջանում ներքաղաքական զարգացումներին` Հովհաննիսյանը իր բացասական վերաբերմունքը հայտնեց ԿԸՀ անդամների ընտրության մասին` նշելով, որ հերթական անգամ ընդդիմությունը, ուստիեւ ժողովուրդը, մեկուսացվում է քաղաքական գործընթացներից: Ինչ վերաբերում է իշխանություն-ՀԱԿ երկխոսությանը, ապա` «այդ գործընթացից Հայաստանի քաղաքացին եւ իր պետությունը հազիվ թե շահ ունենա: Թող որ բեմականացում չլինի, ոչ էլ կառավարվող դիպաշար. նրանց ամենաբարին մաղթելով` մենք արդեն տեսել ենք, որ կողմերը շատ ավելի ընդհանրություն ունեն, քան տարբերություններ»:

Հանդիպման ավարտին Հովհաննիսյանը կոչ արեց. «Մինչեւ մեր կյանքի վերջին կաթիլը` չընկրկենք եւ Հայաստան երկիրը դարձնենք մե՛րը` հանուն ապագա սերունդների»:

Հարցուպատասխանի ժամանակ ներկաները հանդես եկան ելույթներով, բարձրաձայնեցին իրենց հուզող խնդիրների մասին, որոնք շարունակաբար կլինեն «Ժառանգություն» կուսակցության ուշադրության կենտրոնում:

«Ժառանգություն» կուսակցության լրատվական ծառայություն