Աշխատանքային այցով Լեռնային Ղարաբաղի Հանրապետությունում գտնվող ՀՀ փաստաբանների պալատի նախագահ Արա Զոհրաբյանի գլխավորած պատվիրակությունն այսօր հանդիպել է Արցախի վարչապետ Արա Հարությունյանին:

Ըստ Պալատի լրատվական ծառայության տարածած մամլո հաղորդագրության՝ ԼՂՀ գործադիրի ղեկավարի հետ քննարկվել են Արցախի փաստաբանների պալատի շենքային պայմանների լավացման հնարավորությունները:

Վարչապետ Հարությունյանը նշել է, որ Փաստաբանների պալատի այցելությունը Լեռնային Ղարաբաղ ազդեցություն է ունենալու տեղի փաստաբանների հետագագործունեության վրա: Քննարկվել են նաև ԼՂՀ փաստաբանների հեռավար ուսուցմանն ուղղված պլանային աշխատանքների կազմակերպումը:

Աշխատանքային այցի շրջանակներում տեղի է ունեցել հանդիպում ԼՂՀ Գերագույն դատարանի նախագահ Նարինե Նարիմանյանի հետ:Գերագույն դատարանի նախագահը հայտնեց, որ ԼՂՀ-ում անհրաժեշտ է կայացած փաստաբանական ինստիտուտ և ողջունեց ՀՀ փաստաբանների պալատի նախաձեռնությունը:

Ապա պատվիրակությանն ընդունել է Արցախի Նախագահ Բակո Սահակյանը: Նա ընդգծել է երկրում փաստաբանական ինստիտուտի կայացման կարևորությունը: «Անհրաժեշտ է իրավական մշակույթը և հանրային իրավագիտակցությունը բարձրացնել Արցախում, քանի որ այն հանդիսանում է անվտանգության երաշխիք: Բացի դրանից՝ շատ կարևոր է, որ ԼեռնայինՂարաբաղում նույնպես բարձրանա հանրության վստահությունը փաստաբանի և ընդհանրապես իրավական համակարգի հանդեպ»,- նշել է Բակո Սահակյանը: Նրա խոսքով՝ փաստաբանների պալատի պատվիրակության այցը պահանջված է ԼեռնայինՂարաբաղում:

Շնորհակալություն հայտնելով ԼՂՀ նախագահին ընդունելության համար՝ Արա Զոհրաբյանը համառոտ ներկայացրել է, որ ՀՀ փաստաբանների պալատը մտադիր է ԼՂՀ փաստաբանների պալատի հետ համագործակցել՝ փաստաբանների վերապատրաստման և ունկնդիրների փաստաբանական դասընթացները կազմակերպելու հարցերում: Այս տեսանկյունից ՓՊ նախագահը հայտնել է, որ նախատեսում են հեռահար ուսուցման համակարգ ներդնել, ինչը հնարավորություն կտա ԼՂՀ փաստաբանին իր բնակավայրից համակարգչով մասնակցել դասընթացին, իսկ ԼՂՀ իրավաբանին՝ սովորել ՀՀ փաստաբանական դպրոցում:

Կողմերը քննարկել են նաև ԼՂՀ զորամասերում իրավագիտակցության բարձրացման նպատակով Հայաստանից փաստաբաններ Արցախ գործուղելու հարցը՝ զորամասերում դասախոսություններ և խորհրդատվություն անցկացնելու նպատակով: