ՀՀ քաղաքացի - Կարո՞ղ եք կոնկրետ պատասխանել. ու՞մ կպաշտպանեք 2-րդ փուլում, եթե անցնեն Լեւոնը եւ Սերժը: Խնդրում եմ Վազգեն Մանուկյանի նման չասել, որ դա չի լինի, որովհետեւ եթե մենք ապրում ենք դեմոկրատական հասարակարգում, ապա ամեն ինչ հնարավոր է:

Վահան Հովհաննեսյան - Երկրորդ փուլում հավանական երկու թեկնածուների միջեւ ընտրություն կատարելու մասին մի շարք ընթերցողներ են հարցեր ուղղել, եւ ես կմիավորեմ դրանք: Իհարկե, ժողովրդավարական հասարակությունում ընտրություններում ամեն արդյունք էլ հնարավոր է: Սակայն հնարավորի ու տրամաբանության, իրականության միջեւ անբաժանելի միասնություն կա եւ այդ առումով միանշանակ է, որ լինելու է երկրորդ փուլ: Սակայն մեր առջեւ նման ընտրանքի խնդիր դրված չէ: Նախ` որ եթե-ներով չէինք ցանկանա խոսել եւ գործել: Եվ, վերջապես, այն իրավիճակը, որ այսօր կա մեր երկրում, մեր ուսումնասիրությունները, մեր համակիրների ու ընկերների աշխատանքը, մեզ վստահություն է տալիս ասելու, որ երկրորդ փուլում ընտրություն կատարելու հարց առաջ է գալու մնացյալ թեկնածուների պարագայում, քանի որ փետրվարի 19-ից հետո պետք է ընտրություն կատարեն իմ եւ մեկ այլ թեկնածուի միջեւ: Այդ մասին առավել մանրամասն խոսել եմ երկուշաբթի օրը կայացած մամուլի ասուլիսի ժամանակ, որին կարող եք ծանոթանալ «Երկիր» շաբաթաթերթի կայքէջում` www.yerkir.am:

Մանվել Սարդարյան - Հարգելի պարոն Հովհաննեսյան
1. Ըստ Ձեր հաշվարկների` հայաստանյան ընտրություններում պետական ապարատը հավելյալ քանի՞ տոկոս է կարողանում ապահովել իր նախընտրած կողմի համար: Հույս կա՞, որ առաջիկա ընտրություններում ՀՅԴ-ի թեկնածուին այդ «ռեսուրսից բաժին կհասնի (հուսով եմ` չեք հերքի, որ այս տարվա խորհրդարանական ընտրություններում, թեև քիչ, բայց ՀՅԴ-ն օգտվեց այդ «ռեսուրսից»):

Վ. Հովհաննեսյան - Նախ ասեմ, որ այս տարի կայացած խորհրդարանական ընտրությունների պարագայում, որեւէ մեկի համար էլ գաղտնիք չէր, թե որ կուսակցություններն էին օգտվում վարչական ռեսուրսներից եւ ինչու այդ առումով հատուկենտ կուսակցություններ տրամաբանության սահմաններից դուրս քվե ապահովեցին:

Մեր կուսակցության եւ իմ զինակից ու պատասխանատու շատ ընկերներ անգամ խորհրդարանական քարոզարշավի օրերին (Գյումրու Աբելյանի անվան թատրոնի դահլիճում, Վանաձոր քաղաքի կենտրոնական հրապարակում, մայիսի 10-ին Երեւանում` Օպերայի դահլիճում, եւ Հայաստանի բազում այլ բնակավայրերում հնչեցրած ելույթներին կարող եք ծանոթանալ www.yerkir.am կայքէջում տեղադրված լրատվության մեջ) հնչեցրած ելույթներում խոսել են վարչական լծակների օգտագործման անթույլատրելիության եւ դրա դեմ ընդվզման մասին: Իսկ Ձեր հարցի երկրորդ մասին անդրադառնալով` երբ հարցնում եք`«հույս կա՞», դա մեզ համար անընդունելի է: Մենք չենք ցանկանա քվե ստանալ վարչական լծակների միջոցով, քանի որ հավատում ենք, որ դա այսրոպեական եւ ժամանակավոր երեւույթ է: Այդ է պատճառը, որ այսօրվանից նախաձեռնել ենք ՀՀ քաղաքացիների հետ հանրային համաձայնագրի կնքման արշավը: Մեզ համար անգնահատելի է այն քաղաքացին, ով կամավոր է անդամագրվում մեր արշավին եւ հավատքով է մասնակցում այդ ամենին: Տոկոսային առումով դժվարանում եմ նշել, թե ի՞նչ մասնաբաժնով է վարչական ռեսուրսը գործում հօգուտ կոնկրետ թեկնածուների կամ թեկնածուի, սակայն մեկ հաշվարկ, անկասկած, ակնառու է. խորհրդարանական ընտրություններում 1500 ընտրատեղամասերից 500-ում ձայները բաշխվել են անտրամաբանական համամասնությամբ:

Մանվել Սարդարյան - Այս օրերին, երբ շատ քաղաքական ու լրատվական ուժեր իրար հայհոյելն ու սևացնելը անհավանական չափերի են հասցրել, երբ քաղաքական մթնոլորտի թունավորումը գերազանցում է բոլոր թույլատրելի սահմանները, ինչու՞ առավել կոշտ գնահատականներ չեք տալիս այդ երևույթներին:

Վ. Հովհաննեսյան -«Կոշտ գնահատական» ասվածը հարաբերական հասկացություն է:  Իմ հրապարակային ելույթներում եւ հարցազրույցներում (կարող եք ծանոթանալ «Առավոտ» օրաթերթում, «Երկիր» շաբաթաթերթում) խիստ քննադատաբար խոսել եմ եւ’ հայաստանյան հեռուստաեթերի միակողմանիության, եւ’ պարզապես կոնկրետ թեկնածուների կողմից իրար վրա ցեխ շպրտելու եւ առավել պարզ` թուրք անվանելու անթույլատրելիության մասին: Կարծում եմ, որ յուրաքանչյուր գիտակից մարդու որեւէ խնդրի շուրջ մեկ անգամ են ասում: Վերջին նման հրապարակային ելույթը եղել է ՀՅԴ 117-ամյակին նվիրված բազմահազարանոց հավաքում, որի տեքստին կարող եք ծանոթանալ www.yerkir.am կայքէջում: 

Մանվել Սարդարյան - Նախագահ դառնալով` էական բարեփոխումներ ծրագրու՞մ եք կրթության ու գիտության ոլորտներում: Եթե այո, արդյոք դա նշանակու՞մ է, որ քանի որ այժմ այդ գերատեսչությունը Ձեր կուսակցության ներկայացուցիչն է ղեկավարում, ապա ՀՀԿ-ն կամ իշխող ռեժիմն է Դաշնակցությանը խանգարում բարեփոխումներ իրականացնել:

Վ. Հովհաննեսյան - Ցանկացած ոլորտում էլ բարեփոխումների իրականացումը կենսական անհրաժեշտություն է: Ժամանակի ընթացքում նկատելի են դառնում այն բոլոր բացերը, որոնք պետք է շտկվեն: Նույնը վերաբերում է նաեւ կրթության ոլորտին: Այս հարցը միշտ եղել է մեր ուշադրության կենտրոնում: Մեր կազմակերպությունը, մասնավորաբար «Նիկոլ Աղբալյան» ուսանողական միությունը մշտապես լուսարձակի տակ է պահել կրթական ոլորտի խնդիրները, այդ թվում` այդ ոլորտում գոյություն ունեցող կոռուպցիոն երեւույթները վերացնելու հարցը: Եթե հիշում եք, դեռ երեք տարի առաջ մեր ուսանողների կողմից կազմակերպված ուսումնասիրությունը, որը բացահայտում էր կոռուպցիոն փազմաթիվ փաստեր բուհերում, մեծ արձագանք առաջացրեց: Անգամ որոշ տեղերում փորձ արվեց պատժել համարձակներին: Իսկ կրթական ոլորտում համակարգային բարեփոխումների մասին առավել մանրամասն կարող եք ծանոթանալ իմ նախընտրական պլատֆորմում, որտեղ այժմ վերջին սրբագրումներն են արվում եւ շատ շուտով հրապարակվելու է, այդ ժամանակ էլ առիթ կունենամ առավել մանրամասն խոսել ինչպես այս, այնպես էլ այլ հարցերի շուրջ: Ի դեպ, այդ խնդրով հանգամանալից ներկայացրել եմ իմ մոտեցումները դեկտեմբերի 22-ին երիտասարդության հետ կայացած հանդիպման ժամանակ` www.yerkir.am 23.12.2007:

Մանվել Սարդարյան - Դուք կարո՞ղ եք ցանկացած քաղաքացու լուրջ երաշխիք տալ, որ եթե նա, օրինակ, սկսի դրսից բենզին, շաքարավազ, ալյուր, բջջային հեռախոս կամ որոշ այլ ապրանքներ ներկրել Հայաստան, ապա իրեն չեն գնդակահարի: Ի վերջո, Դուք ոչ միայն նախագահության թեկնածու եք, այլ նաև գործող շատ բարձր պաշտոնյա:

Վ. Հովհաննեսյան - Օրերս իմ կողմից տրված մամուլի ասուլիսում ես հանդես եկա նոր նախաձեռնությամբ, երբ հրապարակային համաձայնագիր եմ ստորագրել ՀՀ քաղաքացու հետ ու նաեւ պարտավորվել եմ, իբրեւ ՀՀ ապագա նախագահ, երկրում ապահովել ազատ ընտրություններ, սոցիալական համերաշխություն, սոցիալական փոփոխություններ, քաղաքական կայունության պայմաններում, ինչպես նաեւ` ձեւավորել մի մթնոլորտ, երբ մեր քաղաքացին ազատ կլինի արդար համակարգում: Ազատությունը եւ արդար համակարգը ենթադրում է նաեւ ցանկացած անհատի ազատ գործունեություն, այդ թվում` տնտեսական ոլորտում: Հավատացած եմ, որ մարդ ազատ չի կարող լինել, երբ համակարգն արդար չէ, եւ համակարգն արդար չի կարող լինել, երբ քաղաքացին ազատ չէ:

Վարդան Կարապետյան - Հարգելի պ-ն Հովհաննեսյան,
Թույլ տվեք հաջողություն ցանկանալ Ձեզ առաջիկա նախագահական ընտրություններում: Հարցս հետևյալն է՝ ինչու՞ ժամանակին քաղաքական գնահատական չտրվեց ՀՀՇ-ի ապազգային վարչակարգին ու պատասխանատվության չկանչվեցին մեղավորները, այսօր էլ իրենց արժանի պատիժը կրելուց կլինեին, և ոչ թե փրփրոտ երախներով վայնասուն կկապեին:

Վ. Հովհաննեսյան - Շնորհակալ եմ մաղթանքների համար: Համաձայն չեմ քաղաքական գնահատականի բացակայության Ձեր դիտարկման հետ: Դեռ 1998 թվականին մենք առաջիններից էինք, որ հանդես եկանք նախկին իշխանություններին քաղաքական գնահատական տալու նախաձեռնությամբ: Այդ ժամանակ ձեւավորվեց բազմակուսակցական հանձնաժողով, որն էլ մշակեց զույգ փաստաթղթեր, ուր համակողմանի գնահատական էր տրված նախկին իշխանությունների գործունեությանը: Իհարկե, լիակատար համաձայնություն չգոյացավ այն ժամանակ, սակայն, ամեն դեպքում, նման փաստաթուղթ հրապարակվեց, որը, ի դեպ, վերջերս կրկին տպագրվեց մամուլում:

Մինո - Ինչպե՞ս եք վերաբերվում, որ Ժիրայր Սեֆիլյանը միացավ ոչ թե իր հարազատ «Դաշնակցությանը», այլ ՀՀ առաջին նախագահին: 

Վ. Հովհաննեսյան - Ցանկացած քաղաքացի ազատ է որոշում կայացնել: Դա նրա սահմանադրական եւ բարոյական իրավունքն է: Այլ հարց է, եթե այդ անհատը չի անդամակցում քաղաքական կազմակերպության եւ, բնականաբար, ունի նաեւ այլ պարտավորություններ: Ժիրայր Սեֆիլյանը ներկայումս ՀՅԴ անդամ չէ եւ ազատ է իր որոշումների կայացման խնդրում:

Միհրան - 1. Ինչպե՞ս կարելի է, որ մեր Սեֆիլյանը հայտնվի բանտում, իսկ դավաճան ՀՀՇ-ի անդամները ընտրության են մասնակցում:
2. Ի՞նչ եք անելու, եթե ընտրվեք նախագահ, Արցախի եւ ահավոր կաշառակերության, անօրինականության եւ արտագաղթի հարցերի կապակցությամբ:
3. Ինչպիսի՞ն կլինի Ձեր տեսակետը, եթե ազատագրված տարածքները Սարգսյանը որոշի հանձնել ընտրվելուց հետո:

Վ. Հովհաննեսյան - Հասկանում եմ Ձեր վրդովմունքը, միաժամանակ չեմ կիսում Ձեր մոտեցումը, թե ամեն ինչ սեւ եւ սպիտակ ու մարդկանց առանց իրավական հիմնավորման կարելի է պիտակավորել:
Ոչ միայն Արցախի, կոռուպցիայի, այլեւ մնացյալ բոլոր կենսական խնդիրների շուրջ իմ մոտեցումները հանգամանալից ներկայացնելու հնարավորություն դեռ կունենամ, երբ հրապարակվի իմ նախընտրական ծրագիրը: Հույս ունեմ` առիթ կունենաք հետեւել այդ քննարկմանը:

ԱՐԹՈՒՐ - Դուք կո՞ղմ եք հայ-թուրքական սահմանի բացմանը: Դուք կցանկանայի՞ք հենց հիմա այն բաց տեսնել, թե՞ զգուշանում եք հնարավոր հետևանքներից:

Վ. Հովհաննեսյան - Այս հարցում կա մեծ թյուրիմացություն մեր երկրում: ՀՅԴ-ն չի մերժում հայ-թուրքական սահմանի բացումը, քանի որ Հայաստանը չէ, որ փակել է այն: Թուրքիան է փակել մեր երկրի հետ սահմանը եւ դրանով արդեն խախտել միջազգային բոլոր սկզբունքները: Թուրքիան է, որ պետք է բացի սահմանը:

Գևորգ Պողոսյան - Ե՞րբ է ՀՅԴ-ն հնարավոր համարում վերջնականապես վերականգնել Հայաստանի Հանրապետությունում պառլամենտական կարգերը, որպիսիք գործում էին արդեն առաջին հանրապետության ժամանակ` 1918-1920-ին:
Ուրիշ խոսքով` այդ պատուհաս պապայի կոմպլեքսից, որ մարմնավորվել է պրեզիդենտի պաշտոնում, դուք ձեր հաղթանակի դեպքում կհամարձակվե՞ք զրոյացնել, դարձնել այդ պաշտոնը ոչինչ չորոշող սիմվոլիկ:

Վ. Հովհաննեսյան - Խորհրդարանական հանրապետության գաղափարն, իրոք, ՀՅԴ ծրագրային դրույթներից է, որը, ցավոք, առաջին Սահմանադրության քննարկման ժամանակ չստացավ բավարար աջակցություն մեր քաղաքական վերնախավի կողմից: Իհարկե, վերջին բարեփոխումների մեջ հատակապես, մեր պնդումով էական փոփոխություններ կատարվեցին, եւ երկիրը դարձավ արդեն կիսանախագահական կառավարման համակարգով պետություն: Սակայն, մեծ ճանապարհ ունենք անցնելու այդ խնդրում, իշխանությունն ամբողջությամբ ժողովրդի քվեով ձեւավորված խորհրդարանին հանձնելու համար: Իբրեւ առաջին քայլ` մենք պնդում եք, որ երկրում ամրագրվի 100%-անոց համամասնական ընտրակարգ, որի արդյունքում ընտրապայքարը կտեղափոխվի քաղաքական եւ կուսակցական դաշտ, եվ մենք կազատվենք մեծամասնական կոչված այդ այլանդակ երեւույթից: Վստահ եմ, որ Հայաստանի Հանրապետությունը հասնելու է խորհրդարանական լիակատար կառավարման համակարգին:

Ե.Մ. - Պարոն Հովհաննեսյան, ՀՅԴ-ն 1998 և 2003 թթ. նախագահական ընտրություններում, սատարել է Ռ. Քոչարյանին, ով երբեք նախագահ չի ընտրվել, ու մինչև օրս հանդիսանում եք նրա իրական հենարանը` չնայած նվիրյալ դաշնակցական Պ. Պողոսյանի սպանությանը: Փոխարենը նախագահի բարձր հովանավորությամբ միշտ ունեցել եք կոռումպացված նախարարական պորտֆելներ: Սկսած 98-ից` մասնակցել եք բոլոր ընտրությունների կեղծման գործին, խորհրդարանում հայտնվել եք հիմնականում վարչական լծակների և քաղաքական առեւտրի հաշվին: Այս ամենով հանդերձ` նախընտրական այս շրջանում Դաշնակցության պահվածքն, իրոք, արժանի է գնահատանքի:
Սեփական թեկնածուով մաասնակցելով ընտրություններին` արդյոք պատրաստվու՞մ եք փոխել ձեր քաղաքական մարտավարությունը, այսինքն` փորձու՞մ եք ճշտել ՀՅԴ-ի իրական հնարավորությունները` առանց վարչական լծակների, քաղաքական առևտրի, նախագահի հովանավորչության: Ձեր այս քայլը ենթադրու՞մ է, որ Դաշնակցությունը պատրաստ է գնալ Ինքնամաքրման...
Թե՞ հերթական խարդախ բլեֆն է. նախագահի պաշտոն ուզել և բավարարվել Ռ. Քոչարյանին վարչապետի հուսալի պաշտոն պոկելով...

Վ. Հովհաննեսյան - Ձեր ասած «բլեֆ» ձեւակերպման մասին ես խոսել եմ դեկտեմբերի 24-ի մամուլի ասուլիսի ժամանակ, որին կարող եք ծանոթանալ www.yerkir.am կայքում, ուր խոսել եմ մի շարք լեգենդների մասին, այդ թվում` այն հարցի շուրջ, թե արդյո՞ք ՀՅԴ-ն պայմանավորվածությունների շրջանակում չի գործում: Պատասխանեմ խիստ կարճ` ոչ: Առավել մանրամասն պատասխանս խնդրում եմ կարդալ հիշատակածս կայքում: 

Վայք - Ինչպե՞ս եք վերաբերվում այն բանին, որ ձեր կուսակցություն մտնելը հեշտ է, իսկ դուրս գալը` մահացու վտանգավոր, ծանոթ եմ մի մարդու, որն արդեն 8 տարի է դուրս է եկել, բայց իրեն շարունակում են «հետապնդել» կուսակցության անդամները` զանգելով եւ հանդիպում նշանակելով եւ այլն, փոխել է բնակավայրը, աշխատանքը, բայց ձեր կուսակցությունից նորից շարունակում են զանգել եւ պահանջել, որ մասնակցի ձեր գործունեությանը: Չնայած որ տպավորությունս տհաճ էր, բայց այսպիսի պատմություններ ես բազմիցս եմ լսել Դաշնակցության վերաբերյալ:
 
Վ. Հովհաննեսյան - Ցավում եմ, սակայն Դուք թյուր պատկերացում ունեք ՀՅԴ կազմակերպական կառույցի մասին: Դա հասկանալի է: Ցավոք սրտի, տարիներ շարունակ հակադաշնակցական քարոզչության դրույթներից մեկն էլ Ձեր հիշատակած թեզն էր: Դաշնակցությանն անդամագրվելու արարողության ժամանակ, ամեն նորագրի ավանդաբար ուղղվող պատգամում մեր կուսակցական ընկերներն օգտագործում են մի թեւավոր արտահայտություն` «Դաշնակցություն ընդունվելը հեշտ է, մնալն է դժվար»:Ասել կուզեմ, որ կուսակցական մեր կարգապահությունը, ՀՅԴ անդամների նկատմամբ եղած բարոյական, քաղաքական, ազգային ու հասարակական պահանջներն այնքան տարողունակ են, որ շատ անգամ նորագիրներին դժվարին ընտրության առջեւ են կանգնեցնում: Արդյունքում, շատերը կամ ինքնակամ են հրաժարվում ՀՅԴ անդամությունից, կամ էլ կարգապահական խախտումների պատճառով նրան հեռացնում են ՀՅԴ շարքերից: Ձեր նշած դեպքն ինձ անհայտ է: Համոզված եմ, որ նման երեւույթ բացառված է մեր կազմակերպությունում: Ամեն պարագայում, շնորհակալ կլինեմ, եթե զանգահարեք իմ գրասենյակ փաստը ճշտելու համար (Հեռ. 521874):

Հարութ - Կարո՞ղ եք պաշտպանել ձեր ձայները:

Վ. Հովհաննեսյան - ՀՅԴ-ն այն եզակի կազմակերպություններից է, որ կարողանում է բոլոր հանձնաժողովներում ապահովել իր անդամների ներկայությունը, ինչը, ցավոք, չենք կարող ասել շատ այլ կազմակերպությունների համար, որն էլ պարարտ հող է ստեղծում լցոնումների, ընտրական խախտումների համար: Մենք միշտ էլ պաշտպանել ենք մեր ձայները: Վկան վերջին խորհրդարանական ընտրություններն էին:

Մասնավոր մտածող - Ամենաընդգրկուն իմաստով հայ հավաքականության զգացումը Դաշնակցության նկատմամբ երկակի է: Այդ ամբիվալենտությունն ամենացայտուն կերպով արտահայտվում է հենց ձեր կազմակերպության նկատմամբ: Դրա բացատրությունն ինձ համար պարզ է: Մեր ժողովրդի հաջողված ու չհաջողված ապրածի վկան ու կրողն եք դուք խոշոր հաշվով: Վերջին մի քանի տարում, կարծես թե, ազգը դառնում է ավելի դաշնակ, այսինքն` ավելի է գալիս ազգային ինքնագիտակցության: Մի փոքր ավելի ճկուն գործելու պայմաններում դուք ունեք 2 - րդ փուլ դուրս գալու և ընդդիմությանը ձեր շուրջը համախմբելու ռեալ շանսեր: Փակվածությունը, մի տեսակ քողարկվածությունն է խանգարում Դաշնակցությանը ժողովրդի լայն զանգվածների մեջ մտնելու ու առաջնորդությունը ստանձնելու համար: 
Հարցեր.
1. Չե՞ք մտածել նախընտրական շտաբերի ձևավորման պրոցեսում ընդգրկել նաև ոչ դաշնակցականների: 
2. Փորձե՞լ եք համոզել Վազգեն Մանուկյանին, որպեսզի նա միանա ու սատարի ձեզ: Վերջիվերջո, նա ասում է նույն բանը, ինչ որ դուք անում եք:
3. Րաֆֆի Հովհաննիսյանը լինելով, ըստ իս, ձեր գաղափարախոսության կրողը, իր բաց գործելակերպի շնորհիվ տարավ ձեր ձայների ահռելի մասը: Փորձե՞լ եք նրան գրավել ձեր կողմը կամ վերցնել նրա գործելակերպից օրինակ:

Վ. Հովհաննեսյան - Մենք բաց ենք մեր համակիրների ու զորակիցների համար: Այսօր արդեն կարող եք մասնակիցը դառնալ «Ես Վահանի հետ եմ» արշավի, որը հնարավորություն է տալիս ցանկացած կամավորի ակտիվ մասնակցել մեր նախընտրական արշավին:
Մենք բաց ենք այլ քաղաքական գործիչների համար եւս եւ ակտիվ շփումներ ու քննարկումներ ունենք բոլորի հետ էլ:

Նվարդ Սարուխանյան - Պրն Հովհաննեսյան, ինչպե՞ս եք գնահատում Հանրային հեռուստաընկերության գործունեությունը, Ձեր կարծիքով` այդ հեռուստաընկերությունը կատարու՞մ է իր վրա դրված առաքելությունը: 

Վ. Հովհաննեսյան - Այդ հարցին ես անդրադարձա քիչ ավելի վաղ: Ընդ որում` ոչ առաջին անգամ: Բազմիցս իմ դիտողություններն եմ արել Հանրային հեռուստաընկերության գործունեության շուրջ:

Փոքր մարդ - Պարոն կամ ընկեր Հովհաննեսյան, Դուք ձեզ պարկեշտ, խելամիտ, արդար, բարի կամ խոհեմ մարդ համարու՞մ եք, թե՞ ոչ: Կամ վերը նշված այս արժանիքներից որո՞վ եք օժտված: 
Եթե իմ նշածներից ոչ մեկը չունեք, ասացեք, խնդրեմ, ո՞րն եք համարում ձեր ամենամեծ արժանիքը: Շնորհակալություն:

Վ. Հովհաննեսյան - Թերեւս, անհամեստություն կլինի, որ իմ մասին գնահատականը ես տամ: Շնորհակալություն:

Ռոմեո - Հարգելի պարոն Հովհաննեսյան, վերջերս դուք կոչ արեցիք քաղաքական գործիչներին իրար չանվանել թուրք կամ թաթար-մոնղոլ: Իսկ ինչպե՞ս եք վերաբերվում ձեր երիտասարդ համակիրների կողմից Տեր-Պետրոսյանին էֆենդի Լևոն անվանելուն, ինչին ի պատասխան` նրա համակիրներն էլ ձեզ են էֆենդի Վահան անվանում: Ո՞վ է սրանում մեղավոր: 

Վ. Հովհաննեսյան - Նման արտահայտություն մեր երիտասարդների կողմից ինձ հայտնի չէ եւ անթույլատրելի է:

Նարեկ - Եթե կարելի է, երկու հարց:
1. Պարոն Հովհաննեսյան, եթե ազնվագույն ընտրությունների դեպքում երկրորդ փուլ դուրս գան Սերժ Սարգսյանն ու Լևոն Տեր-Պետրոսյանը , հնարավո՞ր է, արդյոք, զերծ մնաք Սերժ Սարգսյանին սատարելուց: 
2. Ըստ նախագահի թեկնածուների հայտարարագրերի` ամենահարուստը Դուք եք: Արդյոք համաձա՞յն եք դրա հետ, եթե ոչ, ապա, ըստ Ձեզ, ֆինանսական կարողությամբ իրականում ո՞ր տեղում եք թեկնածուների մեջ:

Վ. Հովհաննեսյան - Առաջին հարցին արդեն առիթ ունեցա պատասխանել: Ինչ վերաբերում է իմ` ամենահարուստ թեկնածու լինելու հանգամանքին, ես ուրախ եմ: Քանի որ պատրաստ եմ հանգիստ խղճով եւ պարզորոշ ներկայացնել ունեցվածքս: Միաժամանակ, տխուր եմ մեր երկրի եւ հասարակության համար: Քանի որ քաղաքացիները տեսան իրականության եւ պաշտոնական խոսքերի նման ցցուն տարբերությունը:

Սրտացաւ սփիւռքահայ - Յարգելի պրն Յովհաննէսեան,
Յաճախ ըսուած է, որ երկրի մը նախագահը անպայման ժողովուրդին համակրանքը վայելելու համար որոշումներ անցկացնող մը պէտք չէ ըլլայ, այլ պէտք է կարենայ երկիրն ու ժողովուրդը ճշգրիտ ուղղութեամբ առաջնորդել, համաքաղաքացիներին ապրուստի վիճակը բարելաւել, երկիրը տնտեսապէս հզորացնել:
Հարց ա. Այս գծով Չիլիի նախկին նախագահ Փինոշէն յաջողուեց. դուք արդարացնո՞ւմ էք նրա գործելակերպը:
Հարց բ. Կաշառակերութեան դէմ պայքարիլ կտրուկ եւ խիզախ միջոցառումներ կ'ենթադրէ. ցարդ ի՞նչ էք արել այդ գծով եւ որպէս նախագահ ի՞նչ էք անելու:
Հարց գ. Արդարութեան կողքին լինելը պէտք չէ պայմանաւորուած ըլլայ կուսակցական հաշիւներով կամ դիրքային փոփոխութիւններով. 1998-էն ի վեր, դաշնակցութիւնն ու դուք անհատապէս, քանի՞ առիթներով դատապարտած էք իշխանութիւններուն կողմէ գործադրուած անրդարութիւնները ու բրտութիւնները հանդէպ պարզ քաղաքացիներու, լրագրողներու, ձեզի հակառակորդ կազմակերպութիւններու: Օրինակնե՞ր:
Շնորհակալութիւն:

Վ. Հովհաննեսյան - ա/ Նպատակը չի արդարացնում միջոցները: Չի կարելի տասնյակ հազարավոր մարդկանց դիակների միջոցով երկիր շենացնեք: Պինոչետը պետական հանցագործ էր:

բ/ Կոռուպցիայի խնդրին արդեն անդրադարձա:

գ/ Մի քանի էջերն անգամ քիչ կլինեն` ներկայացնելու մեր բոլոր գնահատականների մի փոքրիկ մասն անգամ: Խորհուրդ կտամ գնահատականների հանրագումարին ծանոթանալ մեր վերջին տարիների բոլոր Բարձրագույն ժողովներում իմ եւ մեր կուակցության մյուս ղեկավարների ելույթներում: 

Մտածող - Ինչու՞ եք ուզում դառնալ նախագահ:
Եթե ընտրվեք նախագահ, ստիպված եք լինելու նախարարներ նշանակել հանրապետականներից: Ովքե՞ր են լինելու այդ նախարարները:

Վ. Հովհաննեսյան - Առաջիկայում ես պատրաստվում եմ ընտրողներին հրապարակային ներկայացնել իմ կադրային քաղաքականության հիմնական դրույթները: Վստահ եղեք, կխոսվի նաեւ Ձեր բարձրացրած հարցի շուրջ:

Ռուզան - «Մխիթար Սեբաստացի» կրթահամալիրում Աշոտ Բլեյանը կազմակերպել է Ադրբեջանի օրեր: Դուք ինչպե՞ս եք ընդունում նման միջոցառումների կազմակերպումը: Մի քանի ամիս առաջ «Արմենիա» հեռուստաընկերությամբ նույն Բլեյանը կոչ էր անում տղաներին բանակում չծառայել: Չե՞ք կարծում, որ այս քաղաքական գործչին չի կարելի թույլ տալ նման գաղափարախոսությամբ դաստիարակել երեխաներին: 

Վ. Հովհաննեսյան - Այս քաղաքական գործչի մոտեցումների մասին բազում առիթներ ունեցել եմ արտահայտվելու: Միաժամանակ, անթույլատրելի եմ համարում պետական ուսումնական հաստատությունում նման ծրագրերի կազմակերպումը: Պատասխանատուները պետք է հետեւություններ անեն: Ի դեպ, այս հարցով օրերս հատուկ հայտարարությամբ հանդես եկավ ՀՅԴ «Նիկոլ Աղբալյան» ուսանողական միությունը:

Նաիրա, Արցախ - Ձեր կուսակցությունն ի՞նչ է արել ազատագրված տարածքների վերաբնակեցման ուղղությամբ: Դիցմայրի գյուղում կուսակցության աջակցությամբ տեղավորված բոլոր սփյուռքահայերը թողել-հեռացել են: Որո՞նք են դրա պատճառները, ինչու ՀՅԴ-ն չկարողացավ նույնիսկ մեկ գյուղ բնակեցնել իր աշխարհասփյուռ անդամներից: Խնդրում եմ ասեք` կուսակցությունում քննարկվե՞լ է այս գյուղում տեղի ունեցածը, եւ քանի՞ մլն դոլար է ծախսվել այդ ձախողված ծրագրի համար: 

Վ. Հովհաննեսյան - Մենք համոզված ենք, որ ազատագրված տարածքների վերաբնակեցումը մեկ առանձին կազմակերպության, անգամ այնքան հզոր, ինչպես ՀՅԴ-ն է, ուժերից վեր է: Դա համահայկական եւ համապետական աշխատանք է, եւ իշխանություններին պարտավոր ենք մղել այդ գործը լիարժեք կազմակերպել: Այդ ոլորտում եղել են բազում թերացումներ, որի շուրջ մեր մտահոգությունները, սուր քննադատությունը բազում առիթներով հայտնել ենք ԼՂՀ եւ ՀՀ իշխանություններին:

ՀՀ քաղաքացի, Բեռլին, Գերմանիա - 1. Պատրաստվու՞մ եք, արդյոք, մանրամասնորեն պատասխանել «Ժառանգություն» կուսակցության հարցաշարին: Եթե ոչ, կամ մասնակի, ապա ինչպե՞ս եք հիմնավորում Ձեր չպատասխանելը: Չէ՞ որ նախագահի ցանկացած թեկնածու պետք է պատասխանի ցանկացած գրագետ ու էթիկայի կանոններին համապատասխան հարցերի:
2. Որպես ՀՀ նախագահի թեկնածու` նշեք, խնդրեմ, երեք ամենակարեւոր խնդիրները, որոնք դուք կարողացել եք լուծել կոալիցիոն կառավարության շրջանակում: 
3. Ի՞նչ մոտավոր առավելագույն փոխզիջում եք ակնկալում Ադրբեջանից (իհարկե, տրամաբանության սահմաններում),եւ ի՞նչ առավելագույն զիջման եք պատրաստ դրա դիմաց` որպես ՀՀ նախագահի թեկնածու: Խնդրում եմ պատասխանել հնարավորինս կոնկրետ:  

Վ. Հովհաննեսյան - Ես  պատրաստ եմ բոլոր հարցերին պատասխանել իմ ընտրողների եւ մեր համաքաղաքացիների առջեւ:

Հ.Գ. Շնորհակալություն եմ հայտնում բոլոր ընթերցողներին հետաքրքիր եւ բովանդակալից հարցերի համար: Փորձեցի լիարժեք պատասխանել հարցերին: Ցավոք, անհնար էր բոլոր հարցերին պատասխանել: Բայց ամեն ինչ դեռ առջեւում է:
Տեղեկացնեմ, որ հունվարի 5-ից գործելու է նաեւ իմ նախընտրական կայքէջը www.vahanpresident.am հասցեով, որտեղ կպատասխանեմ մնացյալ բոլոր հարցերին, ինչպես նաեւ` հնարավորություն կունենաք Ձեր կարծիքները, առաջարկությունները եւ հարցերն ուղղել ինձ:

Շնորհակալություն:
Ձեր հին ընկեր` Վահան Հովհաննիսյան