«Չենք կարող բացառել, որ ընդհանրապես ապօրինի անտառահատումներ չեն լինում»
Հարցազրույց Դսեղի անտառատնտեսության տնօրեն Վահե Քառյանի հետ
Ի՞նչ աշխատանքային ռեժիմով է աշխատում Դսեղի անտառտնտեսությունը: Այսօր Դսեղում մեզ հայտնեցին, որ Ձեր վարչական շենքում Դուք և Ձեր աշխատողները հազվադեպ եք լինում:
Ճիշտն ասած, մենք ամեն ամիս հաշվետվություն ենք տալիս «Հայանտառ»-ին: Այսօր հենց այդ օրն էր: Գլխավոր անտառապետը և հաշվապահը Երևան են գնացել , դրա համար աշխատասենյակները փակ են եղել:
Իսկ դու՞ք և մյուսնե՞րը, այլ հաստիքներով աշխատողներ չունե՞ք:
Վարչական շենքում ամբողջ օրը իմ նստելու իմաստը չկա: Ինչքան ես էդ գրասենյակում գործ ունեմ, էդքան եմ մնում: Ես Վանաձորում եմ բնակվում: Հեռախոս կա դրա համար, կարող են ինձ զանգահարել և հանդիպել, ի՞նչ կա դրա մեջ: Տարածքները մեծ են, գործս հիմնականում տարածքներում է, ոչ թե գրասենյակում: Մանավանդ էսօր էդ դուրս գրումները հիմնականում ավարտել ենք, էնտեղ անելիք չկա: Ուրիշ հատիքներով 3 անտառապետեր և 14 անտառապահներ ունենք, ունեմ մեկ տեղակալ: Դա գրասենյակային աշխատանք չէ, որ տեղակալը կամ անտառապետը վարչական շենքում նստած լինեն: Մենք վերահսկում ենք մոտ 12 հազար հա անտառներ: Հնարավորին չափ, ինչքան կարողանում ենք, անտառը վերահսկում ենք, բայց ապօրինի անտառահատումները չեն կարող բացառվել:
Որքա՞ն ապօրինի անտառահատումներ են հայտնաբերվել այս տարի Դսեղի անտառտնտեսության կողմից:
Դե էդպես կոնկրետ չեմ հիշում, բայց, եթե պետք է, կարող եմ ստույգ վաղը ասել:
Մոտկորի գյուղերի գյուղացիներն ասում են, որ եթե անտառահատումների տեմպերը այսպես շարունակվեն, 1-2 տարի հետո Մոտկորում այլևս անտառ չի մնա:
Չէ, դե էդ ո՞վ է ասում: Ճիշտն ասած, մեր տարեկան պլանը մոտ 3000 խ.մ. սանիտարական հատում է: Դա քիչ չէ: Նայելով կթվա, թե այդ ամեն ինչը ապօրինություն է, բայց դե լրիվ էդ անտառաշինության պլաններով հաստատված է: Այս տարվա պլանից մի 10 տոկոսի չափով դեռ էլի մնացել է հատելու:
Պարոն Քառյան, ո՞նց եք բացատրում, որ անտառից փայտ տեղափոխելիս, երբ մենք անտառի շեմին խնդրում ենք գնորդին ցույց տալ ֆինանսական փաստաթուղթ, նրանք իրենց ձեռքի տակ այդ փաստաթուղթը երբեք չեն ունենում:
Օրինակ ո՞ւմ ի նկատի ունեք:
Օրինակները մեկը չեն, ես ասում եմ ընդհանրապես, բայց , որպես օրինակ, հենց Մարցի գյուղապետ Ռոբերտ Գալստյանին տնակների տարածքում վերջերս մեր կողմից նկատված մեծ քանակությամբ փայտը:
Ես չգիտեմ` իրենք ինչու չեն Ձեզ փաստաթուղթ ցույց տվել, սակայն տվյալ մարդու տղան մեր մոտից դուրս գրած փայտ ունի:
Որքանո՞վ է Ձեր կողմից վաճառվում 1խ.մ. փայտը:
Վաճառվում է 7,200 դրամ, էդ կանգնած ծառի մեկ խորանարդ մետրի արժեքն է, բայց ինքը դրա վրա արդեն ծախսում է մեքենայի վառելիքի գումար, որ հասնի հատատեղ: Կարող է նաև մարդ լինի, թեկուզ ասենք տանի վերավաճառի: Դա էլ չի օրենքը արգելում:
Այսինքն` Մարցի գյուղապետի որդին կարող է Ձեզանից 1 խ.մ. 7հազար 200 դրամով փայտ առնել և տանել վերավաճառել, թե դուք դրա տերը չեք:
Չէ հա, դա արդեն մեր դաշտից դուրս է :
Ինչպես եք վերաբերվում ապօրինի անտառահատումների մասին մամուլի հրապարակումներին: Լինու՞մ են դեպքեր , որ ուզած -չուզած համաձայնում եք:
Բա ոնց չի լինում: Չենք կարող բացառել, որ ընդհանրապես ապօրինի անտառահատումներ չեն լինում:
Հատատեղերում ծառերը հատելուց հետո ,անտառավերականգման և հակահրդեհային ի՞նչ աշխատանքներ են իրականացվում Ձեր կողմից:
Առայժմ հատատեղերում մնացորդներ ունենք:
Ձեր անտառապետերը կարող ե՞ն առանց Ձեր գիտության փայտի բիզնես անել:
Բա էդ եմ ասում էլի, տարածքում ենք լինում անընդհատ, ոչ թե գրասենյակում: Մենք ասելով` ես, իմ տեղակալը, ավագ անտառապետը: Բայց էլի եմ ասում, չես կարող բացառել, որ էդ էլ կարող է լինել: Էն էլ եմ ասում, որ որևէ անհատ ձեռնարկատեր կամ, ասենք, ինչ-որ ՍՊԸ կարող է մեզնից փայտ գնել, տանել, վերավաճառել ու շահույթ ստանալ: Էդ էլ կարող է լինել, ինչ կա: Դա ոչ լիցենզավորված գործունեություն է, ոչ էլ սահմանափակումներ կան: Մենք միայն այդ 3000խ.մ. փայտի շրջանակներում պետք է վաճառենք:
Մեկնաբանել