Այսօր տեղի ունեցած ՀՀ կառավարության հերթական նիստի ժամանակ վարչապետ Տիգրան Սարգսյանը կառավարության անդամներին տեղեկացրել է, որ դեկտեմբերին պետք է պատրաստ լինի Մաքսային միությանը Հայաստանի անդամակցության ճանապարհային քարտեզը:

Բացելով կառավարության նիստը՝ վարչապետը դիմել է ներկաներին. «Երկու օր առաջ Մոսկվայում Եվրասիական հանձնաժողովում չորս երկրների նախագահների հանձնարարությամբ ձևավորվել է աշխատանքային խումբ, որի նպատակն է քննարկել Հայաստանի Հանրապետության միացումը Մաքսային միությանը և միասնական տնտեսական տարածքին։ Աշխատանքային խմբում ընդգրկված են Ռուսաստանի, Ղազախստանի, Բելառուսի, Հայաստանի, Եվրասիական տնտեսական հանձնաժողովի մասնագետները։ Աշխատանքային խմբի առջև խնդիր է դրված, որպեսզի հստակ պատկերացում կազմվի, թե մենք ինչ ծավալի աշխատանք ենք կատարելու այդ գործընթացն իրականացնելու համար, և աշխատանքային խումբը պետք է նախապատրաստի ճանապարհային քարտեզը։ 

Դրա համար մեր բոլոր գերատեսչություններին լարված աշխատանք է սպասում: Եվ, իհարկե, առաջին հերթին մեր աշխատանքով է պայմանավորված լինելու, թե ինչ ժամանակահատվածում ի վիճակի կլինենք այդ բոլոր միջոցառումներն իրականացնել: 

Քանի որ դեկտեմբերի 5-ին նախատեսվում է աշխատանքային խմբի առաջին հանդիպումը, մենք արդեն պետք է պատրաստ լինենք ներկայացնելու ըստ ոլորտների մեր անելիքները, մեր կարողությունները և թե ինչ ժամանակահատվածում կկարողանանք իրականացնել այս գործընթացը, որպեսզի հասցնենք դեկտեմբերին ունենալ ճանապարհային քարտեզ և այն ներկայացնել նախագահների հաստատմանը։ Սրանք Մաքսային միությանն անդամակցելու մեր մոտակա անելիքներն են»: 

Վարչապետը տեղեկացրել է, որ Սանկտ-Պետերբուրգում հանդիպում է ունեցել Ռուսաստանի, Ղազախստանի և Բելառուսի վարչապետների հետ, որի ընթացքում քննարկել են Մաքսային միությանն անդամակցելու խնդիրները։ Երեք երկրների վարչապետներն էլ, ըստ Տ. Սարգսյանի, խոստացել են օժանդակել Հայաստանին, որպեսզի ՀՀ-ն կարողանա պատշաճ ձևով այդ փաստաթղթերը նախապատրաստել և այդ միջոցառումներն իրականացնել։